可能香港一般讀者或多或少受粵語殘片教育，腦海中認爲不論什麼故事，創作者必須先界定正邪兩方，例如黃飛鴻、余麗珍、任劍輝等係忠嘅，石堅、鳳凰女、李香琴等必然係奸。於是乎各類傳媒的創作者亦樂於死守「正邪忠奸絕對觀點」，最後攪到刀劍笑一有新人物出塲，身旁友好讀者立即問：喂，佢係奸定忠架？
八十年代社會層面極爲複雜，劉定堅認爲忠、奸、正、邪、是、非、黑、白，已冇可能有絕對性，只是你站在那一觀點透視問題而已。
譬如說，你同A君對立，幫你的人自然認定A君係奸嘅，相反，A君D朋友亦會指責你先至係大奸。所以正邪忠奸，只乎事件，不在乎人，喺創作故事中明白了其中道理，自然可掌握事件過程轉變帶動人物觀點改動的原則。
因乜大部份讀者會覺得某D故事好戆居呢？原因就是創作者下意識要人認定正邪對立，於是就無厘頭都可以打餐死，白痴過乜。家陣D人好識分析事件架喇，創作者一定要將正邪對立面以合理手法設計，再輔以人類劣根性的影响轉化性格、事件合理改變等等，故事自然更具生氣，同時亦能切合現實環境。
任何事件在任何年代、社會有唔同嘅黑、白界定，從前嫖、賭均是衰仔所爲，今天呢，上夜總會是傾生意的最佳塲所，買鐘出街係榲到銀成功人仕嘅徵像，賭就更加全然改觀，乜重有父母鬧仔女買六合彩咩？乜個仔贏馬買宵夜返屋企係錯事咩？打死我都唔信！
有D人認爲自己守住某D觀念係做人好有原則，唉！原則乜係你定嘅咩？你活在羣體社會，原則是社會界定架！所以在創作故事而言，先要拋掉認定的是非原則，重新設計適合故事時空的是非原則才是較爲理性。