慣性，係人類嘅一種獨特天性，正是習以爲常，慣晒，點改啫！所以「慣性」二字亦成了藉口，成了失敗改革者的藉口！D人慣性乜乜，點會咁易接受改革、創新事物啫！
「慣性」眞係咁霸道？讀者慣性購買眞係會永遠支持雄霸市塲嘅書刊？對唔住，我劉定堅唔信，我相信實力、質素，慣性絕對可以扭轉！可能從事創作年月不淺，一直敢於向慣性挑戰，突破舊有框框，踢開老套、推陳出新，這是自己支持生命成長的重要觀念。如果「慣性」贏晒，慘囉，我明明分析清楚八十年代香港大都會市民鍾意創新架，咁小弟咪錯晒，哈，所以一定要做低「慣性」！
終於喺近期，「慣性」大佬開始凋謝囉！知識水準平均上升嘅讀者，再唔盲目誓死支持，佢哋終於曉得選擇囉。
八八年新出版，分別企喺市塲嘅新書，計有「刀劍笑」、「大哥大」、「漢民夜話」、「魔劍幻影」、「CLUB女」、「午夜奇談」、「怪談」、「漫畫少年」等，數得出都有八本，漫畫刊霸晒個報攤，相互競爭之強，肯定前所未有。依據手頭資料，唔少書刊齊齊銷量下跌個不亦樂乎，跌呀跌，辛苦經營的成果漸漸褪色，跟住個市塲會點呢？放心好了，重有四、五本新書搶閘出籠，所以D書會繼續跌，家陣至學人攪質素嘅同行，慢慢會因爲自己盡了最大努力仍救唔番D書，跟住灰心、脾氣暴燥，繼而話上天唔公平，賴命運弄人，又走去請教吓相土……乜都做齊，偏偏冇檢討自己嘅實力，結局係點，劉定堅唔駛去問卜、求指點，一樣可以斷言——一字記之曰死，抵死個死！
「慣性」的神話被打破了，那應有的恐懼便來到了，希望不要給大家看到有垂死掙扎的現像，但現實又…，唔，一向受「慣性」蔭庇的同業們，在未來的日子裡，你們將要面對最激烈的大清洗。只憑關係、沒有足夠實力的監製、主筆們、要是倒下來，萬計的月薪頓然化爲泡影，離開工作了十餘年的崗位，既沒其他專長，又沒有足夠學歷，大伙兒可有辦法「面對現實」嗎？
我早說過，人生所恃，實力而已，夠依賴別人生存，坐得越高，跌得越痛，三十歲到來了，才轉行謀新出路，確然是前路茫茫，該當檢討啊！