「唔殺你真係開恩。」清瘦的賴桑，只點了一杯水喝：「個艾康出名陰毒，聽聞鐘意殘害對自己不利嘅官員。」
「佢自我膨脹得太快，做咗兩年王子，就真係當自己王子。」奎斯嘴嚼著京蔥牛粒：「但冇計，開國功臣係佢老豆，當初艾寶琳倖存區所有物資、食糧、知識，都係由佢帶嚟。」
「聽講過～佢哋一家以前喺病者未出現之前，就係寶琳區嘅大企業，新都城所有商場都係佢哋家族名下。」
白魂又再大口吃肉，大口喝酒：「點都好......！至少暫時唔洗再對住皇室嗰班假人！喺走廊咁啱遇到，都規定要躬身打個招呼，都痴線！」
「所謂文明社會嘅禮儀就係咁～」賴桑翹起二朗腿。
「真係唔明！」白魂用力打了桌子一下。
「老闆～！貨到。」忽地，烤串店外來了個送貨的人。
我從他的腳掃視到其上半身，他的肩上背住一斤新鮮的肉，再望上臉部才發現是犬京本人。
「喂......狗仔！請你食。」白魂掉了塊豬仔脾骨頭，犬京的狗。
「你哋又會喺到...？」犬京好奇地，問。
「我哋返咗大本營之後，你去咗邊？」說起來，本身和犬京都失去聯絡了，要不是這次巧合地遇見了雙方。
「打工啊，如果唔係...點喺呢到生存。」犬京把肩上那斤肉，交了給老闆。
「你做送貨？」艾寶琳倖存區處處說錢，看來酷愛流浪的犬京也接受了。
「啱一半啦，我係做狩獵。」犬京問也不問，就隨手執起我們一串沙嗲雞肉來吃：「呢間鋪啲肉啊～大部份都係我喺出面搵番嚟。」
「加埋隻狗幫手，聞啲獵物喺邊？」奎斯對犬京的狗，展露出感興趣的眼神。
「係，佢追蹤動物嘅能力好高，我以前有訓練過。」犬京捏住肩膊，說：「同埋...我發覺喺呢到賺錢買嘢食，仲方便過自己慢慢搵完再煮嚟食。」
「自己可以專注喺一件事上面，其他範疇就由其他人處理。」我默然地點頭：「正常社會可以運作到，呢個基本因素之一。」
「嘿～咁你隻狗應該更加值錢？識得打獵。」王達尼又再打響起如意算盤，放了一碟水煮牛肉落地：「Come！認住我，今日請你食水煮牛肉，他日你要請返我食香煎和牛。」
「汪！」那隻狗吠了王達尼一聲。
「既然都嚟到～坐低！好好飲番杯先！」白魂向他招手。
恭敬不如從命，犬京就直接坐到王達尼旁邊，跟我們吃起肉、喝起酒來。
向來作為流浪人的白魂和犬京，在艾寶琳倖存區中，都似乎找到了一個落根地。
大家終於能好好坐在檯，於是都各自談起了辛酸和夢想。
首先，是賴桑和奎斯。
雖然一個貴族出生，一個草根出生，
可是兩個人的想法，都接近一樣──想要重振「病獵公會」。
把流離失所的少年和孤兒，都收留到裡面。
至於白魂，他什麼都說不出、想不到，彷彿做人一點辛酸一點夢想也沒有。
單純的他說自己，只想按當下的想法活下去。
這句聽起來，是有多蠢？可是，沒有多少人做到。
單是他不久前想一拳打在艾康臉上，並確切地實行了，已經沒人超越到。
很多人都說，要按自己生活的方式，活下去、走下去......
事實上，又有多少人，能真的做到白魂這樣子？
王達尼，是一個商人。
問他賺那麼多錢有什麼用，他不會答得出實際上的例子。
說得行商賺錢，只是他的習慣之一，生命中的一部份。
王達尼酒喝多了的時候，更意外透露自己非法買賣賺來的艾幣，已經超越艾寶琳倖存區的所有富豪級人物，雖然不知他是胡言亂語還是真情透露......
不過，我看得出，他很想明自己賺錢的能力。
但恐怕一輩子也沒人知道自己賺錢能力如此的強，始終賺來的途徑都屬非法。
最後，是犬京。
他暫時唯一的目標，就是把自己的狗養到終老。
在亂世下，像他這種保護寵物的主人，已經少之又少。
大多數都在糧食短缺下變成食糧了。
「嗚...呃......呃呃...」酒過好幾十杯後，大家都醉醺醺地伏在桌子上。
由於天都入黑以久，大家都沒打算離開。
好心的老闆，也讓他們在這裡醉宿。
相比之下，我的酒量似乎遠遠超越他們......
去病者之都的前夕，沒有周圍懷緬一番，沒有貼緊朋友說聲道別。
只喝著杯中的酒，再好好入睡一場。
「白鯨...」賴桑說起夢話。
「居然發開口夢......」我望著最快醉倒的賴桑。
「佢係...我嘅英雄...」
「放心，我哋入去之後，會搵到佢。」
「白鯨......點解唔番嚟...以...以佢嘅實力......出入...病者之都...根本...無任何問題...」
我握住賴桑纖瘦的手指：「我都想搵出，北賢口中嘅真相。」至今，有多少人為了真相而逝？
翌日，大家都從酒醉中醒來。
只是意識有點恍惚，還沒來得及完全清醒，已經有個我們意想不到的人物出現。
是艾匡，她帶同幾名禁軍護衛來到這間烤串店中。附近的場面一瞬間寂靜起來，原本經過的路人都往這邊望去，心中應該滿是訝異。
「白魂大叔，對唔住。」艾匡一來，便跟他道歉。
「對唔住...？」白魂反問。
「係...我聽講咗，你琴日同我哥哥有啲爭執。」
「喔...都訓咗成晚，我唔記得咗啦～哈哈哈哈哈！」白魂大笑。
「但...佢係個好記仇嘅人，你之後要小心。」艾匡提醒。
「放心～我斬人同食生菜冇分別。」白魂拍她的膊，說：「唔會有事。」
「你最好避避風頭......」艾匡憂心地說：「我唔想你出事...你再勁，都唔可以一打十。」
「避風頭～嘿，得罪皇室嘅下場，仲陸續有來咁。」雙手托在後腦的王達尼，說。
「艾康係唔好惹，偏偏得你呢啲......傻佬，先咁惹佢。」賴桑無奈地搖頭。
「都好，反正我都忍受夠呢個艾寶琳嘅錢臭同虛偽！」白魂舔舔嘴角，深深地嘆氣：「只係會有啲掛住老闆燒嘅豬仔脾......同埋艾匡你。」
艾匡反而安慰回白魂，說：「你咪教咗我基本嘅刀法？我唔會俾自己有事，我知你想保護我...但之後更危險嘅，一定會係你，我都唔想你死。」
白魂伸出了粗糙的手，輕撫艾匡的臉頰：「咁...我走啦喎。」
「喂...！」禁軍見到白魂輕撫著公主的臉頰，便想上前阻止。
所以我們五人都抱起雙手，走去擋住禁軍們上前。
「你哋班冷酷無情嘅士兵，係永遠唔會明......有啲真摰嘅感情。」我對那群禁軍，說：「超越年紀，超越地位。」
「喺呢個錢字行頭嘅倖存區～」王達尼深感認同，默然地點頭：「真係好少見。」
「嗯。」艾匡漸漸綻放出真挈的微笑：「呢段時間要你做貼身保鑣，都辛苦你啦，雖然一開始，其係我自己要求。」
「走吧！大個女之後，唔忘記白魂大叔我。」白魂也淺淺地笑著。
生命，就是這般奇妙。
你一世也可能接觸不到的人，偏偏會在你受困苦時，無意進入你的世界。
然後，呼吸住同一的空氣。
「白魂，想去邊到避風頭？你鐘意嘅，我有個地方介紹你去。」說不定，大本營很適合他。
「我？或者好似以前咁，喺外面周圍走下先。」白魂說。
「既然係咁，不如加入我哋。」王達尼意圖拉攏白魂加入：「反正我幫咗你破財擋災，咪當買咗你呢個保鑣！」
「好！！！！反正我都坐唔定！要每日喺倖存區企企訓訓，真係唔好叫我。」白魂突然拔出武士刀。
「真係？唔係去玩。」我盯住他：「去嘅賴桑奎斯都好清楚病者特性，王達尼就走佬功夫就一流。」
「我係不良人第一劍客，你睇少我？係咪要食我一刀！」
「刀法冇生疏嘛？」我再問一次。
「唔好咁多廢話，你食我一刀就知！」白魂執意要我吃他一刀。
「我食咗仲有冇命？」我問。
「冇！我唔會斬同一樣嘢超過三刀！！」
「死咗，就唔好怪我。」
「好啊好啊！又可以大展身手！」白魂興高采烈地說。
「點解你哋要執意入去......」唯一沒參與行程的犬京，說：「以前我就見過好多貪婪嘅倖存者，想入去搜括物資，都最後都出唔返嚟。」
「咁係因為，我已經知道，答案只可以喺裡面搵到。」我答下去：「然後......呢場災難嘅幕後黑手，可能就會出現。」
「咁就加埋我。」
「...」
「同我依家做緊嘅嘢相較......我覺得你哋入去嘅意義，更加之大。」犬京堅定地說：「我都唔想，世上再出現類似Bomi嘅事。」
「衰仔......咩呀，呢家要你出去打獵啲豬肉、牛肉返嚟好失禮咩～」老闆突如其來的一句，破壞了我們的氣氛：「喺倖存區打份牛工，唔洗出去痛苦咁受死，咪已經係幸福囉。」
真正的幸福，不該如此。
會前去病者之都的成員，基本上都定好。
除了對付「病者平權組織」那一次，我生涯之中就再無類似的多人調查行動。
奎斯、賴桑、犬京、白魂還有王達尼，都是我仔細考量過，才讓他們加入。
團隊中，有的擁有對抗病者的豐富知識、有的擁有對抗病者的老練經驗、有的擁有對抗病者的強大意志。
最重要的一點，是毫無任何沉重的包袱。
假如少佐或大舊那種人自願加入，我都會斷然拒絕。
我們六個，都是經常在外面的世界與病者周旋的活人。
我們那樣作死的風險，就是進入病者之都最好的本錢。
難道你認為，
我會隨便讓一個，拖後腿的人隨便進入團隊麼。
貿易進去是沒可能，我們要先做好事前準備。
現在病獵公會的座位之上，應該只有白魂不懂何為「事前準備」。
「原來艾寶琳出面仲有橦咁嘅教堂......」坐在教椅上的白魂，橫視著整座宏偉的公會聖堂。
「我無耐之前打獵就見過，只係估唔到...原來未荒廢。」犬京也帶著狗兒周圍參觀。
「坑口區嘅城市規劃喺到。」最遲到來聖堂的王達尼，把一張藍色的圖紙平放到米白樺木製的長桌上：「臨時臨近要我問班手下有冇地圖，都真係考起我，但好彩有～呼。」
「根據情報來源，白鯨喺一座塔入面。」我說。
「好似...叫乜嘢「希望塔」？」當時與我並肩作戰的王達尼，也有印象：「唔記得咗～」
「希望塔...？坑口冇呢橦建築物。」奎斯馬上提出：「我以前住過坑口。」
「不如你講下，係邊個講你聽。」賴桑說。
於是，我把自己與北賢和南愚經歷過的事，還有他們兩人神秘的背景都一一訴說出來。
半小時後。
「即係，佢兩個好可能係人類之中......成功實驗演變出嚟...擁有自我意識嘅病者...」賴桑總合所聽回應。
「但佢哋目的係咩...？」奎斯試想著。
「唔清楚......可能，係負責將有能力嘅人類清除。」我推測他們之前說話，所得出的結論：「又或者感染，令到佢哋變成一樣嘅「怪物」。」
「咁咪同有超能力無分別，哈哈哈，正喎鳥嘴兄！」只有白魂聽得大聲地笑。
「唔係...由你接受病者能力嗰一刻，就專定唔係人類。」我反駁。
「吓！！？乜嘢啊！有佢哋呢啲特異能力，咪輕鬆對死堆病者囉！」白魂還不明。
「白魂，唔係殺唔殺病者嘅問題。」我閉起眼睛，說：「而係自我身份嘅認同，如果要變成病者，咁我寧願去死。」
「...唔，鳥嘴都講得有道理。」奎斯點頭，同意我的說法：「與其變成喺條街傻笑嘅怪物......咁不如靚靚仔仔咁戰死仲好。」
「但係變成病者，就有能力保護身邊嘅人啦喎！」白魂又說。
「但同時，你身邊嘅人都會疏遠你，係詛咒，擺脫唔到。」
「飲杯小麥酒先各位。」聖堂的管理員Nina，為我們送上一杯杯冰涼的飲料。
「Nina...記得要代我同奎斯去開會？」賴桑趁機會提醒。
「記得。」Nina答。
「唔係俾嗰班狡猾臣子呃到...記住。」賴桑似乎放心不下：「你係代表住我哋成個公會。」
「冇問題，你哋放心。」
喝過冰涼的飲料後，氣管頓時暢爽無比，讓我們繼續有活力地開會。
「重點係，要搵出所謂嘅希望塔先？」奎斯苦惱地盯著地圖每一處。
「嗰條友真係靠害......」王達尼搖搖頭，說：「啲提示只係俾一半。」
「我哋不如調轉去諗...」既然陷入死胡桃，我只好提出另類的思考法：「點解白鯨會喺所謂嘅希望塔......」
「咁一定係因為...佢查到某啲嘢，先會去。」奎斯托著下鄂，細說。
「嗯，推測好正常。」我把事情廷伸下去，說：「咁佢會調查坑口嘅希望塔。」
「咁一定係......！」賴桑句句有力地說：「白鯨佢發現咗一啲嚴重嘅真相，當年...先會敢出動所有公會成員行動！！」
「好合理，咁調查前夕，點都會有調查檔案留喺公會呢到？」我問。
「冇...唯獨係呢單關乎病者嘅案件，白鯨係冇記錄在案。」賴桑又灰心起來。
「公會入面，有冇白鯨專屬嘅房間？」
「有係有...你想做咩？」賴桑續問。
「我要入去睇下。」
「得嘅...只不過，應該會幾多灰塵。」賴桑站起身，準備帶路：「自從佢消失之後......間房就一直無郁過，保留住兩年前嘅面目。」
「咁我哋有咩做？」飛快地閱讀著病者文獻的白魂，問。
「奎斯，教下佢哋基本戰鬥技巧先。」我向他打個眼色，就跟賴桑離開主聖堂。
沿著端莊的走廊，會走落教堂的地下室。
樓梯兩旁，擺放著火光微亮的蠟燭，使走廊的氣氛更為幽深。
「我哋以前病獵公會太多人，會喺地下室放雙人床，大家都當對方係一家人。」賴桑提起過往的事情，面上依然能夠彎出淡淡的笑意：「觀迎參觀，一代英雄嘅寢室。」
「咔──」門一打開，就一股書氣傳來。
房間為四方型，側面三邊牆壁除了大門，都擺放住一個大書櫃。
而其辦公桌上，除了小部份公會文件、委託文件、申請文件外，更放住一條白色的小鯨魚玩具，十分精緻。
「白鯨...」我拾起那小件玩具，有意無意地問：「點解佢會有咁嘅稱號。」
「因為佢係著住長袖白袍，啱啱好同你件袍差唔多，只係差在顏色方面。」身為服裝設計師的賴桑，解釋一點即通。
這稱號，是意味著，
海上的王者。
「有冇多啲佢嘅故事聽下。」我一邊搜查一邊問，加快效率。