甘醇的香檳配合可口的蛋糕，讓這場為我而設的派對生色不少。
大家沒有哀愁，只有快樂。
因為大家可以坐下來吃吃蛋糕的日子，恐怕再沒有了。痛也痛過，傷也傷過，即使明知之後的路難走，都還得堅持下去。
大本營如是，我亦如是。
「大家埋位，準備大合照。」表情總是木訥的賴三老師，為我們拍照留念。
於是乎，我的大本營朋友們都聚集在我的旁邊，對著鏡頭展露出真摰的微笑。
「M，原本我諗住結婚之後，就可以交個位俾你，自己輕鬆下......」站在我身邊的少佐，說：「不過...你仲有好遠嘅地方要去，而嗰個地方...都係得你有資格去。所以，唔好死，返嚟之後，搶走我嗰位。」
「朋友......」我淺澀地微笑，說：「真係好。」
「當然。」
「咔──」一下的閃爍，這份回憶就永遠收藏到照片裡頭。
「張相真係要好好咁Keep住！」大舊哈哈地大笑：「放喺領導間書房就差唔多！」
「係呀！地位咁崇高。」阿登也點頭讚成：「又唔驚俾其他人知道M嘅身份，領導房唔係任何人可以隨便入嫁嘛！」
無論如何，
雕刻在靈魂中的記憶，怎樣都不會消失的。
派對結束後，大家也各自離去，而房間中只餘下我和少佐。
我們終於能共坐沙發上，談正經的事。
「M，你係唔係要一個人跟你去「病者之都」？」少佐問。
「大本營......有依種唔驚死嘅人？」我反問。
「有，同埋我叫咗佢，喺你走嗰日佢會跟埋你去。」
「呢啲嘢，你哋好好解讀同收藏。」我把林中古宅帶來的線索物品，都一一拿出。
「仲有碟？」
「我仲未睇，你哋呢到會唔會播影片嘅嘢？定係要去康城一敞。」
「有，跟我嚟。」
接下來，我跟少佐前去了B橦的影院室，他以領導的職權強行地停止影院正在播放的《哈利波特：混血王子的背叛》。
「喂...！！搞咩啊，高潮啦！」、「點解停咗嫁！」、「咩事呀......」、「職員...搞搞部機！？」、「呢家先出事？」
大本營的年輕血液，此刻特別地沸騰，叫嚷聲不絕。
「咳...各位。」技術人員負責出面解話：「由於領導人需要使用影院，請你哋暫時出去。」
「吓......嗰個少佐！！？」原本坐著看電影的年輕人們，紛紛有點激動：「佢係我英雄嚟嫁！！俾我見下佢！」
「我都要見呀！話唔定係你個仆街職員想睇AV，先叫走我哋～！」一名少女橫蠻地答。
「係囉！係囉！！我要見少佐領導！」另一名大胖子也道：「我偶像工作咁繁忙！點會嚟呢啲小朋友地方！同我哋睇電影啊。」
其中，有個我認識的學生，是那個釘槍阿文：「佢...佢一定係同病者對戰緊，或者...同惡意倖存者隻揪緊！」
「無錯無錯！！」是廢物三人組之一的奧迪，餘下Chris就湊成一隊了。
「挑～佢咁廢，都唔知你哋崇拜啲乜。」Chris也出現了，看來影院是大本營年輕人熱門的聚集地方。
「你哋走啦...我講真嫁！」技術人員面有難色地說。
此時，少佐才從控制室出來，對著影院的人說：「你哋有十秒時間走，否則在場淨低嘅人要執行大本營服務令二十四小時。」
「噫...噫噫...嗚啊～～！！！」大家見到他本人，聽到了後果，才像見到病者般拔足逃出影院。
不需十秒時間，整個影院都沒人了。
「播哂所有我交俾你嘅碟。」少佐對技術人員，說。
「收到！」
「去揀個位。」少佐望向我。
我隨便地坐了在影院的中間，望了大螢幕被暫停的畫面一眼：「混血王子的背叛......好睇？」
「唔清楚，」坐在我鄰邊的少佐，答：「反正，戲如人生。」
螢幕畫面一黑，就開始播放另一條影片......來自余智海博士的影片。
是一條生活記錄影片，是一個懷孕的女人，在公園中散步。
「哈哈，第時嗰女出世叫咩名好？」拍攝者的聲音，是余智海博士。
「未諗好啊。」我認得影片中的女人是他的老婆，在林中古宅的家庭照可以得知。
之後影片畫面又殘又起格，似乎久經擺放而損毀了。
「呢隻播唔到啦...睇嚟損壞得嚴重......」技術人員在控制室喊道。
「咁下一隻。」少佐淡然地說。
接下來將近半天的時間，我們都坐在影院裡，觀看著大螢幕中余智海博士生活的一點一滴。他很喜歡把自己跟老婆每個快樂、歡笑的時刻，都記錄下來。
包括重大研究的獲獎、老婆懷孕的心路歷程、搬進新市區的大屋住、跟自己家裡的狗玩、為即將出生的女兒佈置房間等，都讓作為觀看者的我們感覺到幸福。
正如余智海博士，在其中一隻光碟上寫的一句──「微笑，就是愛的開端。」
其爽朗的笑聲和知性的沉穩，都讓人難以理解......
為何會變成那種頹喪、憤懣的人。
「好難相信......依個人，會係摧毀呢個城市嘅元兇。」我凝視著螢幕中，為出世的女兒閱讀《白雪公主與七個小矮人》故事的余智海。
「佢哋睇落，的確好幸福。」少佐點頭。
途中，有一段較為悲傷的小插曲，是余智海博士的老婆在生下女兒的三年後就死了，原因不太清楚，只是從他一條出席喪禮的影片中得知。
之後余智海博士都有拍攝他與女兒生活的影片，但永遠不會拍攝到其女兒的臉部，而且再沒有出街拍攝的情況，全都在古宅的中拍攝。
最後一條，已經是余智海博士帶著女兒到新屋去，即那一間魔鬼山上的林中小屋。
我和少佐都越看越沉重，彷彿跟著他的心情轉變，感覺很是複雜。
「之後嗰條片都唔係同格式，全部加密過！」技術人員對我們說。
「咁有冇辦法播到。」少佐問。
「有！要等等......」
「睇嚟余智海失去咗老婆之後，傷心咗好多。」就像中場休息，少佐跟我討論起來。
「不過...我唔信呢個會係主因。」
「就算搵到原因，你會點做？」
「搵佢出嚟。」
「...」
「佢研發得出呢隻病毒，就總有可能會有解藥吧？」我說。
少佐冷笑一聲：「我從來冇諗到咁遠。」
「如果真係有解藥......」我逐漸握緊拳頭。
「失敗！應該睇唔到......」技術人員大喊。
「咁即係...我哋咗余智海生活記錄片半日？」少佐說。
「好有用，至少我哋知道......」我站起，說：「佢本身唔係個壞人。」
「M，你覺得，邊到可以搵到佢？」
「或者......就正正係病者之都？我唔知，但見佢之前，我知道仲要搵到一個人先。」
「邊個？」
「白鯨。」
離開影院後，我鬆一鬆坐了半天的骨頭，走到七樓的圖書館去。
在大本營的事，大概都告一段落。
我上去七樓的圖書館，其實是為了在那片落地大玻璃窗下，凝視整片的星空。
那裡很出名的，一到晚上大本營的年輕人特別是情侶，都會一同到來佔個好位子，然後席地而坐。
在兩年間，沒有受到工業污染的夜空，以最真實的面貌展示出璀璨的星光，偶然還能看到一顆劃過的流星，其一絲絢麗為人們帶來無限的喜悅與驚喜。
但這種機會總與我無緣。
「老...師...唔係，M！你喺到嘅？」在幽暗泛光的圖書館中，瑜小六居然留意到我的存在。
「唔歡迎？」抱著雙手的我，抬頭凝視星空。
「...歡迎！見到你，都總係有少少唔習慣......成日諗住叫你老師老師。」瑜小六揚起淺澀的嘴角。
「改唔改口都無謂，反正你唔會成日見到我。」
「係呢，你喺旅程......有冇遇過咩奇妙嘅嘢啊？」瑜小六問。
「奇妙...？」我不太明白，她是指仙子、精靈之類的嗎？
「即係恐怖嘅怪物啊，或者好笑嘅情節。」
「遇過嘅病者太多，有啲甚至呢區唔存在。」抱著手的我，細想一下：「好笑嘅情節...？大概就係有個肥仔，俾我當水魚咁呃。」
「出面嘅世界......肯定好刺激？」
「同危險。」我附加一句。
「...真係好。」
「咁你？仲喺女子搜索隊？」
「冇啦，」瑜小六抿嘴，說：「訓練太辛苦，我頂唔順，已經退咗隊。」
「即係，雙失青年？」
「得閒會去聽下書咁囉～」瑜小六靠在一個圖書櫃旁，說：「仲繼續修讀緊關於病者嘅高級學位。」
「有咁嘅嘢？」我走之前，也沒聽說過。
「哈哈哈，呢到都差唔多變成學習對付病者嘅學院咁～」瑜小六哈哈一笑，續說：「D醫生走咗之後，大家喺佢研究室搵到好多關於病者嘅研究，包括病者啲部位可以點樣用！嗱，例如病牙呢，就可以作為硬質物料，拎去維修鐵門令佢更加堅固。」
「所以就開咗一課咁嘅嘢？」
「係啊，賴三老師研究得最深入。」
「嗰條友總係目無表情咁。」
「哈哈哈哈哈～老師佢份人比較木訥姐，」瑜小六狡猾地向我眨眼：「不過，你會唔會有啲參考資料俾我完成論文？我讀緊嗰個高級學位...但係完全諗唔出要寫啲咩...」
「讀呢啲咁紙上談兵嘅嘢，你未來想做咩......」我認真地問。
「我希望做個病者學士。」
「要有好深入研究先得，至少要好似滿天咁。」咳，她應該不清楚滿天是誰。
「滿天？」瑜小六自然不認識他。
「冇嘢，你就當......如果我係病者學士。」突然想起世上還有這個人的存在，內心又多了一分的安全感：「咁佢就係一個病者碩士。」
「其實呢～我未來可以試下做大本營病者學教師呢個建議，都係賴三老師提議嫁，佢話與其殺死永無止盡嘅病者，倒不如研究下病者仲好。」瑜小六雙手苦惱地按額，說：「不過星期六之前我交唔到篇論文俾佢就死喇！！M...你可唔可以幫我代筆啊？！」
「代筆？你寫咩題目。」
「《病者的特有生態文化與行為習慣》，原本我諗好寫病腦嘅......因為佢哋好似係會吸收人類嘅文化，而去演化出自己性格、興趣同生活習慣啊嘛？不過其他病者我真係好少諗到，篇文唔可以太少字......」
「你呢個樣，去做老師誤人子弟就死得。」我說。
「我好努力嫁喇！有時會申請出閘紙，特登出去觀察下病者。」瑜小六說起來，就嘆了一口又一口的氣：「不過申請時間繁長......又要定期去考病學證明書同武術證明書，證明自己有能力喺出面生存，真係好麻煩啊......」
「大舊都係唔想你哋白白咁送條命出去。」我從袍內取出一本日記，給了瑜小六：「代筆就無，俾你參考下呢本嘢都可以。」
「《病者圖鑑》......」儘管圖書館沒光，瑜小六還是瞇住眼掀開一頁又一頁：「我好似有啲印象...」
「睇哂佢，化做自己文字寫落論文到。」我簡而直接地說。
瑜小六特意走到窗邊比較近光的地方，去細看這本圖鑑：「咩話...竊屍賊有食人肉嘅習性？有一隻叫舞者嘅病者...會跟住旋律加強動作？！大耳總會用耳垢爬牆......哇...我真係第一次見！」
「唔洗俾返我。」帶了去病者之都，我都不知能不能拿回來。
「下？但係本嘢你寫嘅...」
「唔緊要，我個腦記住啲內容就得。」我淡然地說。
「咁...你簽自己個名啊。」瑜小六說。
「...唔？」
「呢本珍貴嘅日誌係你，我唔可以白白咁拎走當係佢主人。」瑜小六掀開日誌的最後一頁，給我註名：「佢係用你嘅經歷，一墨一血咁寫出嚟。」
「洗乜咁計較......」但我還是拿起枝筆，打算隨便簽些什麼當作證明。
簽「黑袍賢者」？算了，這名字有點爛，跟我袍沒什麼關係。
黑袍，就改做黑色吧。
最後，我在日誌中正式簽署自己的名字──「黑色賢者」。
這日後聞名遐邇的名字。