...
從監視器畫面中，我能夠清楚看見，少佐偷偷潛入到康城倖存區之中。
繼而，我把該天其餘監測器所錄到的畫面，都一一調撥到少佐進入倖存區之後的那段時間。
畫面中，可以看見他急匆匆的身影在倖存區中四處張望，彷彿要眾裡尋她。
一段時間之後，有幾名酷似哨兵的保安，上前把他攔截，說了些什麼，就被帶到保安室了。
可惜的是，這硬碟資料中，沒有保安室的錄影畫面。
時間再調快一點，便能見到幾個小時後，少佐從終於出來了，不過已經離開倖存區。
到底中間發生了什麼事......
看來，得再去保安室一敞看看。
「咔」我把硬碟從主機箱拔出來。
「咦...！？你睇完啦？」被我驚醒的IT男，問。
「嗯。」我步出這橦大樓。
冒著小毛雨，我踏著濕漉漉的地板回到保安室中，且先把硬碟的位置放回。
「有冇帶早餐俾我～？」昨晚那位阻我出去的胖大叔，睡眼惺忪地說：「你新嚟？兩手空空嘅......」
「上個星期，係咪有個戴斜帽、披肩、眼神銳利嘅男人入過嚟。」我把保安室的門鎖住，回頭望著他肥碩的身軀：「你睇落似係成日坐喺辦公室？肯定有留意到。」
「喀──」門鎖了。
「哦～你就係琴晚好大口氣嗰個哨兵仔。」這個空有膽量的胖大叔，緩緩地展笑：「你點可以直接同上司咁講嘢...仲要......鎖門？」
「你問非所答。」
「我冇話要答你問題喎！」他站了起來，厲厲地盯住我。
「我只係問你一條簡單嘅問題。」我走過去咖啡機前，倒了杯熱騰騰的咖啡。
「你有本事就喺我把口到挖出嚟～」他輕蔑地笑了一聲。
「請你飲。」我握住咖啡紙杯，走到其面前。
「幾識做～不過你呢啲兵仔，知嚟有乜用。」胖男人取過我手上的咖啡：「同埋我好似冇見過你？」
「點解知嚟都冇用。」
他喝了口咖啡，聲音頓時精神不少：「唔好嘅事，就當然要收埋佢～唔好俾人知」
「你意思係...」我問下去。
那男人放下咖啡，從袋中取出根煙咬住：「你描述嘅男人，上星期的確俾我哋請咗入嚟，因為佢係康城倖存區嘅非法入侵者，俾我哋哨兵發現到～」
我從他的辦公桌上，取走個小火機為他點火，並用另一隻手掩火擋風：「佢入咗嚟之後......？」
「當然進行過一輪盤問，不過佢都只係不斷問......有冇見過一個女仔。」他鬆了口氣地，吐出一口煙：「好耐無你啲咁醒目嘅o靚仔～幾識照顧主任。。」
這下子，我才得知他的身份是主任。
「我哋當然唔會答佢問題，只會問佢問題。」胖主任揚起圓滑的嘴角，說：「我哋當然問佢係咪不法者先～話哂，外來入侵者十不出九都係佢哋。」
「不法者......」
「就係嗰堆搞事份子～」主任用訝異的目光盯住我：「你連呢啲大事都唔知？喺康城嘅「十二元老會」槍殺事件發生之後，成個地方群龍無首，大家各自為政。一堆堆潛藏罪犯就慢慢浮出水面，做啲犯罪嘅嘢～不過最後我哋嘅明雲都用佢老豆嘅名義，將佢哋一網打盡，囚禁喺不法者監獄。」
「略略聽過，但冇聽過明雲講佢一網打盡所有不法者嘅事情......」
「明雲佢啊！以前其中一個康城元老嘅仔嚟，仲係一個熱心嘅醫生，救過唔少人，所以聲望都幾高。」胖主任坐到電腦椅上，細說往事：「喺佢老豆同所有元老死咗之後～班不法者就走出嚟想用暴力控制成個倖存區，但大家都係知識份子當然抗拒喇！於是明雲主動向不法者佢哋提出合作，話可以用自己聲望嚟幫佢哋實現控制康城嘅目的，咁樣人民都會服從啲。」
「即係做佢哋傀儡？」
胖主任點頭，續說：「當然唔會咁簡單。之後明雲開咗一場宴席，請哂所有不法者嚟大飲大喝談合作......結果啲不法者咪中哂伏。」
「餐飲入面有詭詐？」
「係！可以用嚟麻痺人，明雲講過～但學名太長我都唔記得。總之，最後成個宴會嘅人，都得番明雲一個企喺到，其他飲飽食醉嘅不法者開始一個個咁因為麻痺而跪低，呢個亦係我哋戲稱明雲做「主公」嘅原因，哈哈哈哈哈哈～最後班不法者咪因為全身麻痺俾人一網打盡，收哂入監獄。」
「估唔到明雲...都做得出呢種事。」我看他斯斯文文，十足好醫生的模樣。
「事勢所迫！佢唔想再見到倖存區入面有打打殺殺嘅場面存在......」
「唔...咁之後？講番嗰個搵人嘅男人。」
「我哋問返佢係咪不法者之後～佢就好似有啲愕然、然後有啲失望。」胖主任搖搖頭，表情有點難堪：「再之後佢問不法者喺邊，我就答：「監獄，你之後會到嘅地方」，我真係對佢隻死人眼有啲唔爽......咪叫多幾個哨兵入嚟諗住挫下佢銳氣！」
「結果你哋傷得一敗塗地。」我說。
「條友都癲癲地......周街拎住碌棒球棍都唔知做乜。」胖主任對似乎少佐十分不滿：「嗯啊，我哋輸哂...條友打到我哋一仆一碌。」
「不出所料。」這裡的哨兵都沒有訓練，純粹站崗。
跟在「不良人」歷練過的少佐怎麼相比。
「當時好危險，我覺得生命受到威脅......」胖主任掉了煙，說出當日情況：「糾纏之中佢打傷咗我，我停落嚟...見自己流緊血，我就望住地下，一滴、兩滴、三滴......我就眼前一黑訓低咗。」
「其餘嘅哨兵都係？」
「係...」胖主任不好意思地嘆氣：「呢啲柒事為咗唔好俾人知道，我哋盡量掩蓋住真相，冇同明雲回報，冇同任何人講，你係第一個知。」
「點解講俾我聽。」
「因為啊，你琴日唔理我嘅阻攔，就咁冒住雨行出去嘅畫面......令我諗起見到一個畫面。」胖主任徐徐地微笑，說：「世界未變成咁之前，我都係保安主任級嘅人馬，年年好多人面試，我睇人眼光好准。」
「咁你睇到你啲乜。」
「鷹，一隻......」胖主任認真地打量住我，側側頭地說：「孤鷹。」
「仲以為你會講啲例牌嘢，用動物做比喻......幾新鮮。」或者，比喻用得很差的我以後可以試試。
「哈哈哈哈哈～你信唔信都好，喺呢個世界上，仲可以咁有氣勢嘅男人已經唔多。」胖主任感嘆地說：「同埋可能我都經歷咗和平太耐......已經見唔番。好似之前「十二元老會」仲喺到嗰陣，一期同二期兩派撕殺嘅畫面，兩派元老嘅氣勢...真係令人懷念。」
有氣勢的男人嗎......
在這個混亂、荒誕的瘋狂時代中，我也遇了很多。
他們，都令我在不自覺之中改變了。
「所以你都唔知佢最後去咗邊？」
「我估佢之後就係去咗不法者監獄～佢拎走咗我哋貼喺通告欄嘅康城區地圖，上面有標記住不法者監獄嘅位置，係喺仁興工業大廈。」胖主任推測：「不過座監獄已經荒廢咗接近半年囉，去到都得番啲發臭嘅死屍，呢樣嘢喺倖存區只係得好少人知～嘻，我呢啲保安嘅主任級人馬當然都會知......仆街，唔小心爆響口...」
收穫了情報的我，正打算凝想下一步行動時，外面傳來了凌厲的尖和玻璃窗破裂的聲音。
「睇嚟有啲事發生咁喎，嘻嘻～」胖主任也留意到外面的情況，卻懶得動地坐到椅上：「唉～應該都係啲居民紛爭姐，你出去搞掂佢啦～我繼續休息。」
「唔...」
離開保安室後，天色已逐漸晴明。
在凌晨時份與日出之間的那段交互，稱之為破曉。
這種天色，是世界短暫的光暗交互期。
「你冷靜啲啊小姐！！！！！」聲音大致上確認了，是從醫療室那邊傳來。
因為那一個單位，正被人胡亂地高空擲物。
而且，更是夏晴和Sona所在的病房。
不出所料，待我跑上三樓後，發現病房中正胡亂發癲的人是Sona，夏晴還處於暈迷狀態之中。
「小姐...！！冷靜啊！！！」護士姑娘正在病房中，勸停發狂亂擲物件的Sona。
「放我出去！！！！！！！」頸側包紮住繃帶的Sona，對周遭的一切都憤恨得咬牙切齒。
「醫生！入嚟幫手啦......再係咁唔掂喇！」護士喊道。
「先...先生...？」而病房外頭，則有個醫生模樣的中年男人，慌張地望著我：「你可唔可以入去幫手制止佢！？」
「你係醫生？」
「我係......不過係心理醫生...不過傷者好似特別憎我咁...」這名心理醫生十分的害怕：「佢原本都好好地...我一入病房想問下佢點解要自殘...佢就即刻發癲...」
「唔...你唔好出現喺佢面前先。」我大致上，明白情況了。
「係...！」心理醫生馬上躲到一邊去。
而我，則推門走進病房之中：「Sona，冷靜啲。」
「嗄...啊......嗄...」她瘋狂的臉孔，終於暫緩下來：「你...你都走開...！！俾我出去！」
「出去？去邊啊。」我問。
「我...要返去嗰到...我要返去啊！！！」Sona又想衝出來。
姑娘又焦慮地打開雙手，作出攔截：「你暫時唔出得去嫁......會死嫁...」
「你又想返嗰個地獄？」我探問。
「嗰到......」Sona咬牙切齒地，一手推開了護士姑娘：「我唔想自己一個...！唔好留低我！！！」
在Sona要衝出病房之際，我把她擁於懷內，擋住了。
「唔好阻我！！！」
「唔好再辛苦自己，雖然我唔知你發生過咩事，但呢個......唔係原本嘅你。」我可以看出，與自殺時的Sona是有所分別：「我講過，我可以做你聆聽者。」
「嗚...嗚嗚...」Sona開始滲淚，並軟坐在地上：「好辛苦...嗰到係我嘅惡夢......我永遠都走唔出去...」
「你已經離開咗，你睇下周圍。」
「唔得啊...！！之後我就會出現番喺嗰到...完全控制唔到......」
「姑娘扶佢番上床先。」我指示。
接著，我出到病房外跟那名心理醫生碰面，原來他正偷偷聽著房間中的內容。
「點？佢依家情緒應該好唔穩定。」我說。
「事出...必有因。」心理醫生拋開剛才的怯色，突然專業起來：「已經可以睇得出，入面嗰位傷者肯定有心理病。」
「我都睇得出，不竟......世界都變成咁。」這種心理有問題的人，到處都是。
「其實大致上可以分為幾類，」心理醫生向我解釋：「喺亂世入面，主要係喪失家庭、受到侵犯、受到暴力對待呢幾種陰影，我都治療過唔少人......大概，就係咁。」
「咁有冇方法，救到佢。」我轉頭，望著病床上痛哭不停的Sona：「我覺得佢......總係好悲傷。」
「有！不過我係有啲好奇...點解佢......唔會驚你或者想攻擊你？」心理醫生好奇地問。
「呢層......」我愣然：「我都唔清楚...」
心理醫生打量著我，托住下鄂：「唔......我諗，會唔會係關你個造型事。」
「點？」
「我係指，你個面具。」
「面具...？」
「一般嚟講，如果傷者嘅陰影，係受到某一性別嘅人造成，嚴重嘅話會對佢哋有所抗拒、不信任、憎恨。」心理醫生繼續自己的分析。
「所以，我嘅面具掩蓋咗佢嘅畏懼？」
我從來沒想過這張帶來畏懼的鳥嘴，會為人掩蓋過畏懼。
「係，可以咁諗。」
「唔...」我把面具拿下，交到心理醫生的手上：「拎去用。」
「你......」他有點驚訝地，望住我的面。
「記得還返就得。」我自己走到遠遠的。
心理醫生點頭，便把面具戴上，進入到病房之中。
兩、三個小時後，我再次回到這裡來。
心理醫生亦似乎做了個全面的評估，捧著一份份報告走出來。
「佢情況...有啲嚴重。」醫生搖搖頭，把面具交還給我。
「講嚟聽下。」
「首先，對男性係極度不信任，我諗佢一發癲個陣，就係因為見到男人。因為佢見到姑娘個陣，其實都冇咩特別起伏。所以推測到陰影同男人有關......」心理醫生不樂觀地搖頭不停：「身體上有自殘傾向、皮膚有用水沖到甩皮嘅痕跡、不斷想搵番自己屋企人。」
我凝視病房中，已經沉睡之中的Sona。
「搵出嚟，就係我哋心理醫生嘅職責，不過佢睇落有第二個人格幫佢分擔住一部份嘅痛楚同憎恨，暫時仲者確認，所以...都只可以靠佢親口講述番先明白。」
「佢一直...都想番去二期嘅一間K房入面。」我說。
「二期...K房...？」
「嗯，確實原因我就唔知。」
「嗰間嘢......我印象中，兩年前就已經因為一件事而關閉。」心理醫生回憶起。
「一件事？」
「兩年前，康城仲係兩派撕殺嗰陣......有個殺手闖入咗二期會所嘅K館，將裡面所有人都殺盡。」心理醫生說起時，都極為沉重。
「有冇生還者...」
「冇，官方統計過係零，全部都斷氣。」
「話唔定...佢家人喺入面遇害。」我說出自己的想法：「總之佢咁執著留喺入面，總有原因。」
「我都認同，但係要解開佢嘅心結......我諗都好難下。」心理醫生又點頭：「除非，有人可以走入佢嘅世界入面。」
我望一望掛在醫療室的鐘，見還有一點時間，便出去一會。
昨晚那名要我代班的哨兵，也給在小小的倖存區中遇回了。
「喂！哥仔，你搵到要搵嘅人未啊。」哨兵哥走過來。
「未...佢好似去咗不法者監獄，喺出發之前，我想做埋少少嘢先。」我知道，那座監獄現在只有明雲一個。
如果我明天出發的話，就可以順便向那個巴力拿取做好的鎖匙，放走明雲了。
「好啊～解埋啲支線任，方便了解劇情。」哨兵哥若無其事地說。
「你講咩話？」我聽不明白。
「冇嘢...當我冇講過！我哋交換番件衫先！你件黑袍真係......」哨兵哥好像想快點脫下我的黑袍。
轉眼間，我們已經換回各自的衣服，整個人舒適不少。
「啊～舒服哂。」哨兵哥舒適地嘆口氣，說：「好彩你行嚟行去，我先咁啱遇到你，啱啱去保安室又唔見人。」
「我搵緊......」我說出，自己想找的物品：「送俾女仔嘅嘢。」
「送俾女仔嘅嘢啊？咩女仔啊，哈哈哈哈。」哨兵哥看上去是認識很多女生的那種人，我才問。
「有心理病嘅女仔。」我直接說。
「呃...性格呢？」
「唔...」我低頭，想想：「唔清楚。」
「咁就送你覺得最代表到自己嘅嘢俾佢？因為聽落你哋都唔係太認識對方。」
「代表到自己......」
「嗯！」哨兵哥用力地點頭：「咁樣，佢望到嗰樣嘢，就自然會諗起你。」
「......」
「有呢啲心理疾病嘅人，或者唔係需要你幾關心佢、幾安慰佢、幾體貼佢，可能你俾個寄託佢，等佢自己有個依賴就夠，唔洗太過表現出嚟。」哨兵哥向我舉起姆指。
保持低頭地沉思的我，點了點頭：「我明白。」那些時候，我都會想自己一個靜靜。
「哈哈，咁下次要再見。」總是樂觀的哨兵哥揮揮手，就離開了。
上去病房之前，我在倖存區中央的燒烤場，隨便烤了幾塊方包吃起來，體力不夠的話，做什麼都不行。
治完肚子後，我上到病房裡頭。
推開門的剎那，Sona已經怕得面色憔深。
「我知道你一見男人，你就會變第二個人。」進來之前，我已經略略地看了心理醫生幾十頁紙的的報告：「因為佢哋會為你帶嚟痛苦同憎恨。」
「...我自己都唔知，我淨...係想停止呢一切......」Sona幾乎把全身都用被子掩蓋住，只亮出一雙小鹿般的眼神：「啱啱醫生同我講...我有機會係人格分裂...」
「你呢場惡夢，維持咗幾耐。」
「我自己都唔知......」Sona苦惱地低頭，掩住前額：「我甚至唔知...自己依家係咪發緊夢...」
「你知唔知自己家人下落？或者有冇識得你嘅人。」
Sona不斷搖頭：「我唔知...我唔清楚......」
「你連自己都唔拯救，就冇人拯救到你。」
「拯救......」Sona好像被觸動到一樣，想起了什麼：「我...我已經...伸手......不斷對門大喊...點解...！點解當聽唔到啊！！！」
「冷靜，」我捉住她纖瘦的手腕：「唔會有事。」
「你走啊！」Sona一手推開我，喊道：「你就俾我自己死咗去得唔得啊！？我心裡面有隻惡魔...我自己......自己都控制唔到...」
「...咁你想唔想聽故事。」或者，我轉個方法好了。
與其迫她去面對接受，倒不如告訴她一些精彩的故事，讓她對世界有不一樣的看法。
「...」Sona不問也不答。
「從前，有個人叫M......」然後，我把自己五十多萬的長篇歷險，都說給她聽。
Sona一開始都沒什麼反應，直至M被迫要把老賢從D層大樓推下去、被迫目睹不破尚鐵血的戰死、被迫與朋友為敵，這一切的事情，都讓她漸漸地從被子中露出，見回完整的面貌。
「唔攰...？」Sona聽了大半天，終於破腔問。
「攰，但佢總覺得身負重責。」
「但我...唔似佢...我冇咁嘅勇氣......去面對呢一切...我冇嘅勇氣......再去面對所有人。」Sona說。
「有啲陰影，係一世都難以磨滅。」我現在閉起雙眼，都會想起種種畫面：「不過已經唔可以放聲痛哭。因為就算已經撕心裂肺，都要故作堅強，繼續重複住逞強嘅謊言。」
Sona低住頭，沉默良久：「我一直都清楚...自己咩事...」
我望住她，等待她繼續。
「我父母...係俾人...殺...」Sona咬緊牙關，淚水凝珠般落下：「我俾人...侵犯......我向人求救...冇人救我...我嗰陣幾乎斷氣要死...」
「...」
「我醒返嗰陣...已經喺外面嘅埋屍坑......身邊都係死去嘅人，仲有我父母...我癲咗咁大叫！！我想返去報仇......先知道，對方原來係康城倖存區嘅元老之一，我女仔一個...根本乜都做唔到......」Sona擦住淚水，說下去：「我開始變得驚人、周圍嘅人都好恐怖、哪怕佢哋望我一眼，我忍唔住......」
「但十二元老已經死咗。」
「唔夠......我擺脫...唔到...自己冇人救......所以我先一直重複住嗰一日嘅事情，我想不斷嘗試俾人拯救...但最後我都會殺咗佢哋......因為我原諒唔到...我最後都得唔到被救贖嘅感覺......我始終喺個深淵入面，走唔返出嚟...」
「你係另一個Sona？」
「我同佢都無分別...我只係代佢......做唔敢做嘅事。」她答。
「但你令佢不斷出現番喺嗰一日嘅地方，同折磨佢有咩分別。」我想，Sona的主人格大多數時間，都在身在那間曾受過施暴的房間，才會重新掌控意識。
而其餘時間，則是處於要不斷復仇的人格狀態下，包括在那間房做的密室逃脫陷阱。
「我為咗向佢哋報復...我可以做更多......」Sona逐漸握緊拳頭，說：「不法者...好快就會入侵依到，我一個人冇實力，但係佢哋有...」
「咩意思...」
「半年前，我引咗一隻病獸去撞穿咗不法者監獄，幫脫水脫糧咗幾日嘅佢哋離開。」Sona又開始黑化，就連語氣也是：「之後外面有人失蹤，都係之後佢哋捉返嚟，交俾我殘殺......直至捉到嗰個叫夏晴嘅女仔...？終於引到大本營嘅首領出去，咁樣引發到兩幫開戰...不法者就順利攻得入康城，我都成功報到仇，要康城倖存區嘅所有人死......」