「雖然...我好想立即出嚟打你一拳！唔係...應該一拳都唔夠。」在囚房聽完故事的明雲，慢慢地退後到牆壁、靠下：「但你或者講得冇錯...每個人，都背負住睇唔到嘅罪孽......係呃唔到自己。」
董倫帶點嘲笑的意味，說：「你就當喺到反省、贖罪。」
明雲望住地板，沉默良久：「我曾經害過一個女仔。」
「哦～？」董倫有趣的反應表示，有意聆聽下去。
「我後嚟知道，康城二期KTV館入面嘅慘劇...係我老豆指派人去做，原來嗰個執行者係你。」明雲徑自說下去：「喺嗰一晚...我即場去救護嘅人員之一。」
「老豆殺人，個仔救人～有趣！」董倫低頭淺笑，說：「但你唔好同我講～係因為救唔到被斬到重傷嘅人，所以覺得內疚～呢種偽善會令我想嘔。」
「我親眼睇住......」明雲逐字逐字吐出：「我阿爸...當時喺入面，強姦唯一一個嘅倖存者。」
「...」
「我當時入到去第一時間，係搵邊間房仲有未斷氣嘅生還者......結果，俾我睇依一幕。」明雲極為悔恨地說：「我喺房門塊玻璃窗，望住嗰個女仔向我伸手...想要我拯救，但我...淨係企咗喺外面呆住咗，完全唔識反應。」
明雲續說下去：「我冇諗過會見到阿爸...我冇諗過佢會咁做......佢捏住嗰個女仔條頸，直至佢差唔多斷氣...但我最後選擇咗逃走，我唔敢反抗佢。」
「喺籠中未經歷過外面殘酷嘅鳥～係唔會長大。」董倫一句道出明雲心中想：「你畏懼嘅～係你冇諗過自己父親會做出依種事情。」
「乜嘢元老...乜嘢康城一期領導有方嘅領導人、乜嘢親切嘅好男人、好爸爸......全部都係呃人。」明雲用力地捏著身邊的食物，表情痛苦又痛恨：「喺外人讚賞嘅背後...只係一個殺人嘅強姦犯。」
「但你都係一個懦夫。」
「喺佢面前，你何嘗唔係！？」明雲反喝。
「我已經，衝破咗鳥籠～」董倫淡淡地微笑，說：「而你，仲活喺鳥籠嘅陰影之下。」
「......」說到這裡，明雲方才明白董倫說些什麼：「十二元老死咗之後，我亦都因為父親以前嘅名聲...而被推舉繼承倖存區嘅領導人。」
「我無時無刻都記住自己，背負住依種罪。」明雲咬緊牙關，沉實地說：「如果有機會再返多次嗰一日，我會推開到門，拯救嗰個女仔。」
「已經太遲，你乜嘢都改變唔到。」董倫凝望著拐杖，說：「世界無後悔藥。」
「所以，我盡力緊......去做一個好人。」
...
一晚過後。
在加護病房外睡著的我，因為早鳥的叫聲而醒來。
這層由幾個獨立單位打穿牆壁通成，是個擺放住多樣醫療器材的小醫院。從昨晚到現在來看，這裡的使用率都很低，可能是存於物資豐盛，局勢又和平的時代。
在大本營中，醫療室是個永遠缺乏的空間。
上至藥物、下至病床都嚴重缺乏，器材只用最簡單和最重要的。儘管如此，我也聽說過曾在Dr.D依然管治的時期，因為其出色的醫術和診斷大大降低了區內的死亡率。
「你要唔要食啲嘢？見你喺到坐咗成晚。」一位姑娘走過來，問。
「好。」我不會跟人客氣。
之後，我獲得了乾麵包和清水。
「你哋冇人工出...點解仲咁規律咁去做嘢...」我好奇一問，因為這位姑娘也坐在查詢處一整晚了。
「哦...其實我哋區內嘅人呢，本身都冇乜嘢做，講真，哈哈！日日玩都玩夠！總係覺得工作先貼滿到咁悠長嘅時間，果然一返工呢～時間就過得好快，大概就係呢種充實感。」
「返工反而變咗一種享受嘅事？」
「好似退休咁渣嘛～前幾個星期係幾嘆嘅，但幾個月、幾年之後就覺得時間流流長，就係要搵嘢做，參加咩插花班啊、太極班啊、書法班。」姑娘以退休老人作比喻：「不過自己最上手嘅，其實都係以前嘅崗位。」
「我諗...呢啲比喻只係適用喺康城嘅人身上。」我想起了，大本營以前的「懶蟲」們。
也許知識相對豐富的人，就是要用到工作來滿足自己。
「我可唔可以入去睇下佢哋。」我問。
「呃，」姑娘望一望鐘，點頭：「我諗得啦。」
接下來，我進入到病房去探望她們。
Sona頸項的傷勢已經止血了，不過醫生說還未脫離危險期。
相對地，夏晴情況似乎比較好......
只是接收著營養液的輸送管、吊鹽水。
「估唔到......搵到你先，都未搵得到少佐。」我望住暈迷著的夏晴，說。
「你仲有一個朋友喺附近？」整理著物品的姑娘見我提起少佐，便問。
「應該就係。」
「搵唔到佢好大件事嫁？」無聊的姑娘又問。
「佢係一個倖存區嘅領導人，無咗佢，就運作唔到。」我說。
姑娘點頭稱道：「唔......但入得康城呢，基本上就得一條路，同埋附近都得我哋呢個倖存區，基本上得康城一期呢到有人。」
望住夏晴，想起了我們第一次侵入病窩的情景，再到現在這一刻：「希望可以睇到...少佐同你結婚嘅嗰一日。」光陰，真的不饒人。
「話時話啊，你點解要戴住個鳥嘴面具？」估計，這個姑娘獨自在醫療室一晚也真的悶了。
我把沉重的面具脫下來，說：「原本，佢只係用嚟掩藏我嘅身份。但慢慢咁......佢代表住一部份嘅自我。」
「咁...複雜？我以為面具就係面具......」姑娘難以理解地回應：「唔係用嚟打劫，就係用嚟參加蒙面派對。」
「外面嘅世界，同康城係兩回事。」我望著窗外飛著的麻雀，說。
「睇你有你呢個朋友真係好，會特登冒住危險出嚟咁遠搵自己。」姑娘會心一笑。
「冇你想像中咁好。」
「咔」
「聽下電台？係我哋區內嗰班電子工程師用咩短波廣播技術搞出嚟，有短波收音機就可以收到訊號。」姑娘按下了收音機，說：「話唔定啊～聽下電台，都可以刺激到佢哋起身架。」
依坐在窗邊的我，俯視著樓下的居民。
另一邊，則聆聽著電台播放著的歌曲。
這首歌...我有點印象。
是Bon Jovi的《Always》。
「你哋呢到，都幾有八十年代美國嘅感覺。」我淺淺地笑。
「咁幾啊，以前嗰年代都唔錯。」
「啱啱聽你講，嗰個叫...夏晴嘅女仔，」姑娘望過去床上的夏晴，說：「佢係你朋友少佐鐘意嘅人嚟架？哈哈，因為聽到你講乜嘢結婚。」
「嗯。」我一貫地望住烏雲密佈的曇天。
「咁你有冇呀？」姑娘又問。
靠著窗前的我搖搖頭，淡淡地揚起嘴角。
「唉～其實我都好想有個合襯嘅男人一齊！因為喺呢種時勢，更加容易搵得到真心對待自己嘅好男人！」姑娘說起愛情的話題，表情就憂愁起來。
「我下次會再嚟探佢哋。」我戴上面具，就出去了。
「好！再見。」
在病房沒了期地等待，也不是辦法，少佐不會突然出現。
我估計......最壞的情況，就當然是少佐已經遇害，但現階段還不是放棄的時候。
用排除法的話，少佐沿途會遇到的不外乎是康城居民、病者和Sona。
其中有一點，我是比較在意。
就是監獄那群「不法者」的去向，他們都跟少佐一般消失了。
我想，最簡單的方法還是先問問這裡的人，因為代入少佐想法的話，他來到康城的第一件事也肯定先調查這裡，會否有夏晴的下落。
就是說，有機會跟過附近的居民接觸。
有很多事情都能隨便放任，但唯獨......
這件事情，我想放棄也不行。
就算康城的居民，都幾乎一致地回答沒有見過少佐，我還是徹底地問過一遍，這裡足足一百多個的人。
凡是可以進入並有活人的地方，上至樓層單位的高級理髮店，下至廣場的活動燒烤區，我都沒有放過。
老實說，在同一個小區域中來來去去，問著重複的問題，的確是挺悶人。
不過...
如果找不回少佐的話，
那麼以後我再走得多遠、再爬得多高，都沒有意思。
他是大本營的未來，
所有人，都不能失去他。
「喂，哥仔！我留意咗你好耐啦～成大半日都喺到走嚟走去。」一名在廣場燒烤區負責看守的哨兵，從哨塔滑了下來。
「我搵緊人...」我說。
「搵人？走失咗個妹定個女啊？」哨兵哥問。
「朋友。」
「女仔啊？」
「男人。」
「......」他表情有些訝異，續說：「或者我幫到你？倖存區日日咁多人出出入入，啲人唔認得都正常。不過～其實我哋區入面某啲地方係有監控鏡頭，包括大門，所以可以追溯返睇，你要搵嘅人有冇嚟過。」
經他這麼一說，我便抬起頭望去大門那邊，果見角落安置住一部閉路電視：「仲以為係裝飾嚟...」
我應該要想到，康城倖存區的生活質素遠高於外面的地方，閉路電視這種東西也會存在的。
「嘻～不過呢，當然唔會咁易幫你啦，你估真係有免費午餐咩。」哨兵哥露出狡猾的笑容，看來這才是真面目。
「你要乜嘢回報？」我直接地問。
「今晚我就要繼續值班嘅，如果你可以頂到我個位～到時啦喎，閉路電視啲存檔你想睇咪自己開，哈哈。」哨兵哥抓抓頭，說。
「即係幫你頂班？」
「唔止！仲要借你身上嘅服裝一用！」哨兵哥繼續說：「如果我著住呢身衫去夜總會...會俾人發現！」
「成交。」我有點不情願，但應該只有這個方法了。
之後，我們兩人互相換了服裝。
他換上了一身黑袍和衣束，而我則穿住了類似軍服的套裝、軍帽和鳥嘴面具。
「咁樣...我去玩啦！我講咗你聽嫁啦，保安室嗰邊放咗閉路電視嘅所有畫面存檔。」哨兵哥歡樂地說。
「去玩吧。」我跟他說。
「祝你好運啦！」說畢，他就高興得一跳一跳地離開。
我也開始繼續執行自己的調查。
保安室位於倖存區出入口的左近，面積大概有一間課室大。
由外面望入窗戶之中，可以看見內裡跟一般辦公室無異，有塊板分隔著每張辦公桌的空間，而牆邊周圍則擺放著櫃子和各重要文件資料。
「沙啦沙啦...」
觀察得入神之際，天空就忽然下起毛毛雨來，我也趕緊進去，免得弄得一身是濕。
「呵欠～哇，咁型嘅個面具。」一個坐在電腦椅上，喝著咖啡休息的胖守衛對我笑道。
我無視他，一邊行一邊橫視著整間辦公室，不過在裡面走來走去又不做點什麼就太可疑了。所以待我經過一部咖啡機時，我拿了個紙杯就按「啟動」的按鈕。
「噓噓......」熱騰騰的咖啡落到紙杯上。
在這一段小空檔之中，終於給我發現了類似硬碟的物件，有線管是連接住外面的，很大可能就是存放閉路電視的硬碟。
這時，咖啡也落完了。
我輕輕揭開面具去小喝幾口，就走去把那硬碟拆走。
「你做咩啊？」此時，那個胖男人注意到我的舉動了。
「檢查、維修。」我答。
「呢啲自然有IT狗處理嫁啦～」這個胖男人都有一把年紀了，外形更像梁文韜一樣：「唔好搞咁多啊，一陣搞搞下壞咗都唔知點交代。」
「你理得我。」成功把硬碟拆除了。
「啊～你都幾串嫁喎，新嚟啊？」他盯住我。
沒有回應的我，打算拿著硬碟就往門口離開了。
沒想到的是，他居然站起來，擋住我的去路。
「呢家啲後生咁無禮貌嫁咩？！」他看起來，有些生氣。
「走開，」面具底下的我，直視著他：「唔會講第二次。」
「你...嚇我啊！想點啊！」他說得比我大聲之餘，頭也被我抬得要高。
我沒理會他，直接向前步進。
他立即變得怯懦，生怕會碰我一樣不斷後退，見無路可退後便自己往一旁走開：「喂...喂......」
「咔」開門聲。
我也拿著硬碟無礙地去到門前，離開保安室了。
這個上了年紀的胖守衛，只能目睹我開門離去的背影，在雨夜中漸漸遠去......
「後生可畏！」他舉起姆指，點頭讚賞道：「好有氣勢嘅男人...他日必然會成為大器，就好似我咁，呵。」
夜晚下著微雨的廣場，沒太多人逗留，除了一些情侶感覺氣氛不錯，來冒雨觀星之外，都沒太多人徘徊在附近。
拆除了硬碟之後，我要到的地方是資訊室。
只有那裡，才有器材能夠播放影片。
當然，那位哨兵哥也早就跟我說了資訊室的位置，因此我很快就去到該處。
康城某大樓的一樓至三樓也是資訊室，進去後可以看見很多電腦零件也散滿一地，就像一般維修電腦的店舖。
「係...有咩幫到你？」一位青年見我進來，並留意到我所穿的套裝，便問：「你係保安室嘅人？」
「我要播片。」我把剛帶走的硬碟拿出。
「喔～明白明白，跟我嚟。」他一臉笑意的，帶著我行。
這位主動的青年，把我帶到資訊室的二樓：「睇呢啲嘢當然要秘密啲～哈哈。」
「...」也對，被人發現我公器私用也不太好。
最終，他把我帶到一部電腦面前，然後跪下來忙碌地把很多條電線接駁著一部電腦之中。
「做緊咩？」我問。
「因為呢...要開電腦做一啲簡單嘅運算都要好多嘅電力，所以成個三樓都係放住發電機，我依家就係接駁緊啲線，咁樣睇睇下就唔會因為電力唔夠而死機黑畫面。」他向我解釋：「咁你又帶咗啲咩嚟睇啊，哈哈，你班保安成日帶自己啲珍藏上嚟，搞到我都特登拎咗幾卷紙巾嚟呢到用。」
「珍藏？」
「你唔係帶咗啲片嚟睇咩？」他問。
「係。」我答。
「咁就得啦，今次關於啲咩嫁～哈哈，等我都期待下。」這位青年雖然多問題，但這麼熱心，也一說無妨。
「要搵番一個失蹤嘅人。」我說。
「咁搵番之後......會唔會發現佢其實係喺一個不見天日嘅地方，而且身邊好多人呢，嘿嘿嘿嘿。」他突然淫笑起來。
「...或者。」
「好啦好啦，今晚都唔會太悶喇～！」他接駁著眾多縱橫交錯的電線時，是笑著的。
康城的人......真的如此熱愛自己的工作嗎。
「上次呢～我睇咗套片叫《夜勤病棟馬姑娘恐怖實錄》，真係嚇餐死！你唔會都係拎呢啲奇怪嘅獵奇片俾我睇啊嘛？」他問。
「就只係...普通用閉路電視影低嘅片。」
「哇！變得天才諗出嚟......！」他有點讚嘆，說：「用閉路電視嘅視覺嚟令條片增加真實感......真係要欣賞下。」
怎麼...
好像有點不對勁。
「差少少渣...等下啊！」他辛勞地說。
十分鐘後。
「搞掂...！嗄...嗄......」他喘住大氣的抹汗：「先苦後甜...！你放個硬碟落部主機到啊。」
我照他所言，把硬碟安放到主機之中，再啟動了電腦。
「嗚──嗚──」電腦隨即發出牛般的叫聲，顯然開機的這個動作，負荷已經十分大。
接著，那名青年使用著電腦，打開那個硬碟的資料：「哇......仲有唔同日子拍低嘅喎，揀邊一條睇先比較好啊？」
少佐大概在一星期前離開，就先選我去到大本營之前日子的影片來看吧。
「呢條開始先。」我指住其中一條影片檔案。
他滿懷期待地點擊進去，隨即播放出康城倖存區大門閉路電視攝錄住的畫面。
我開始認真地觀看：「較兩倍速度，咁樣太慢。」
「啱......快啲入正題姐。」青年點點頭，抱起雙手細心觀賞。
一小時後。
「喂...喂...大佬......」那名十分熱誠的青年，轉眼變得虛弱無比：「到底...幾時先出現......」
「唔知，隨時都有可能。」我答。
「我...喺到...陪你睇咗都有一粒鐘...咳咳......」他滿面紅筋，全身通紅：「我谷得好辛苦啊......嗚...」
「你洗唔洗去廁所解決先？」他是怎麼回事，肚痛或小解怎樣忍著，不會自己去洗手間嗎。
「唔得...！我用咗咁多時間去駁電線搞電腦......我先唔要突然間走咗去...！！」他緊握著滑鼠，說：「萬一錯過咗就，噫......！！！」
「你去先，唔急在一時，仲有成晚時間睇。」
「你...又啱嘅...！」他想著想著，就拿著一本寫真雜誌跑去洗手間了。
見此，我覺得觀看的速度還是太慢了，索性把幾天的閉路電視畫面同一併開出，然後同時觀看。
大概半小時之後，那名電腦青年又再回來了：「呼......我有冇錯過啲咩啊？」
「未，仲未出現。」我一直盯緊畫面不放。
「咁就好啦。」他坐回到原位：「咦...你同時開哂七條片嘅？咁樣電腦負荷會好大......」
「已經冇時間一條一條咁睇。」我說。
歷時一整晚了吧。
我跟身邊的好青年，已經看了閉路電視鏡頭足足一整晚，他更因為太倦的關係不知不覺睡去了，只餘下我獨自觀看著。
這漫長、無趣的過程，真的出外探險還要辛苦。
儘管如此，這個電腦青年也盡了最後一分的體力，去陪我觀看閉路電視的畫面，可見康城居民對工作不單是狂熱，更是在自我實現的要求上，有所追求。
這一點，我不得不佩服。
太過敬業了。
「呵欠...」原本，我都快要睡著了。
看看掛在牆上的時鐘，都已經凌晨五時光，還有一小時左右就天光了。
但就在我視線回到畫面的那一瞬間，他出現了。
少佐的身影，在畫面中出現了。
...
不法者監獄。
監獄二樓陰深的走廊之中，再次傳來了腳步聲......
原本深睡著的明雲，身處於這種不安的地方，很容易就被不明的聲音弄醒過來。
「...邊個」
「早起的鳥兒有蟲吃。」是那把，唯一在獄中會陪伴著他的聲音：「咁早起的董倫～？」
明雲替他說下去：「好撚煩。」這兩天，他已經被董倫勾起很多不堪的回憶。
董倫又靠在牆邊，微笑：「親愛嘅明哥之子，你話哂都係我曾經會長嘅兒子，我哋彼此之間應該要尊重，而唔係惡言～」
「我同你根本就無嘢好講......」明雲說。
「喔～我覺得你應該要拎返啲領導人嘅氣勢出嚟～」董倫仰笑：「就好似你老豆咁。」
「我唔會做我老豆......我唔會好似佢咁...呢一點，你同我記清楚。」明雲斬釘截鐵地說。
「唔好咁～佢都有值得人學習嘅地方。」董倫使用金鷹頭拐杖，輕敲著囚住明雲的鐵門：「雖然你繼承咗佢個老鷹巢～但睇起上嚟，你仲只係一隻雛鳥。叫我哋呢啲一早離咗巢嘅老獵鷹情何以堪～？」
「我嗰區嘅人生活得好好，唔需要你多心。」明雲又被迫聽著那煩人的敲門聲。
「就係太好～」董倫低頭一笑，說：「你根本就無為意到，危險就喺附近。」
「...」
「點解用嚟囚禁不法者嘅監獄，會變咗用嚟囚禁你～？」董倫直白地說：「唔通，你認為呢班人走咗仲係一件小事？～你就冇諗過追查落去，怕危險嘅話，危險就會主動接近。」
「你係咪知道啲嘢......」明雲走近到牢門前。
「我乜都唔知～我就只係以第三者身份嚟觀察佢嘅變化。」董倫感嘆地笑著：「要蛻變成鷹，佢只係差一步。」
「你一直咁強調......」明雲反問：「咁你自己，你自己又點。」
「某程度上，你父親係助長咗我成長～我應該心懷感激先係。」董倫沒有任何表情，說：「而我嚟見你，就已經係最好嘅回報～」
「你係想殺咗我？」明雲苦笑一聲，說：「咁我應該慶幸自己係囚禁喺入面。」