「咁講都冇錯嘅～」王達尼同意。
「咁你哋兩個，點解會走嚟寶琳倖存區嘅？」瓦禮又問。
「因為我係個商人，遊走各地就好閒嘅～」
「我係...」我說不下去。
「佢鐘意周圍去，好似你啲女人想去旅行咁姐～」王達尼代我答。
「唔...」我點頭。
「不過，你諗住點返去？真係仲著住呢件死人袍同面具？」王達尼帶點暗示地說：「你知你呢個look......會嚇親人架啦。」
「唔知，或者我喺門口望下就算。」我隨口答。
「你痴線嘅，咁辛苦帶緊你返去，你喺門口望下就算？」
「所以......你哋想變裝？」瓦禮加插一把口。
「唔係我，佢姐～」王達尼說。
「你...有辦法？」我望住瓦禮。
瓦禮她舉一舉起自己握住的手提行理箱，說：「我帶咗好多衫褲裙之類嘅嘢，都幫到你嘅。」
「啱啊，係時候要執一執個樣架～」王達尼打量著我，說：「頭髮留咁長，你估係女人咩～」
「係囉，你都長過我。」瓦禮也認同。
「唔...」我心下默然：「一陣有冇得通去佛教志蓮小學先。」
「有～想點？」
「我想探下人。」
「人...嗰到仲有人咩？」王達尼幾秒後才會意：「喔...我明。」
由於我的私人要求，我們先從佛教志蓮小學的污渠爬出。
爬出污渠後，原本因為臭味而渾身不適的我，頓時清新了幾分。
「颼飀──簌簌──」寧靜的校園，連風聲也格外大。
幾月沒到，有如隔別十年。
這裡回復了校園本來的面目，那時候的屍體、武器、刑具，都通通不見了。
只餘下一片荒涼的感覺。
「大本營嘅人...」我望住其中一幅潔白的牆壁，問：「執哂手尾？」
「嗯～同埋不良人啲物資，應該夠大本營至少用一年。」王達尼與我目光一致：「呢幅牆有乜特別？」
「冇...」我到那幅牆的前，然後躬一躬身。
「雖然不良人同大本營係敵對關係，不過......少佐同你一樣，喺呢到對住同一幅牆躬身。」王達尼淡然地問：「點啊～真係冇特別？」
「瓦禮，係唔係可以幫我變一變裝？」我轉移這個黯然的話題。
「係，你準備好？」
「你咁靚，打扮方面都只可以信你一個。」我答。
於是，我們三人去了就近的洗手間，開始對住鏡子為我剪髮。
「瓦禮，得閒都幫我執一執。」王達尼站在一旁觀看。
瓦禮一邊剪髮，一邊閒聊：「哈哈，阿尼，我覺得呢個不修邊幅嘅樣幾型啊，有啲似梁朝偉嘅味道，好有佬味。」
抱住雙手的王達尼，無奈一笑：「果然，只要個底本身夠好，都唔洗太執。」
「呢啲與生俱來嘅風格係扮唔到。」瓦禮淺淺而笑。
「咁呢條友似邊個......？」王達尼盯住鏡子中的我。
髮碎一下一下的在我眼前落下：「......」
「似...呃......蔡一智？」瓦禮笑著說。
聽到這句的王達尼，禁不住大聲放笑：「哇哈哈哈哈哈...頂，啱啱你講完之後我望住塊鏡，真係有一秒見到佢同蔡一智個樣max埋。」
「哈，不過我只係講笑。」瓦禮認真地，打量著我：「其實......幾似《無間雙龍》入面嘅小栗旬。」
「咩...咩嚟？食得嘅...小粟子？」王達尼不明白。
「少少陰沉...好似令人難以靠近，但又帶住相當認真嘅眼神。」瓦禮拍一拍我的膊：「就係你。」
「...」我望住鏡中的自己。
「你打算留中長髮俾佢？」王達尼見瓦禮收起剪刀了。
「係，一個人要留住某啲嘢，都總有佢嘅原因。」瓦禮望住門外透射進來的暮光，說：「有人鐘意行走喺陽光之下，亦有人...係鐘意行走喺黑暗底下，不過我相信，陽光同黑暗都總有相交嘅一日，兩者交織出嘅......就係所謂嘅黎明。」
「大功告成？」王達尼似懂非懂的點頭。
「換埋件黑袍就得。」她說。
當然，瓦禮沒有把自己的女性衣服讓給我穿，因為我袍內本來就穿住件長袖襯衫。
面具的話，理所當然地需要脫下。
我把它們都暫時存放在這間學校中，待有天需要，再回來穿。
「繼續出發？」王達尼問。
我點頭。
之後，我們又使用地下污渠，穿梭到大本營據點底下，爬出來後正正是王達尼以前經常待的小型垃圾場。
「終於都返嚟。」王達尼猶如回到家中，輕鬆地吹起口哨。
而我，則像瓦禮般陌生，望住周遭的一切。
很熟識，但又很陌生。
「喂～」王達尼望住我，說：「應該唔洗我帶路啦。」
我點頭，就走到去大本營的廣場中。
昔日被Dr.D巨大化所破壞的D橦醫療大樓，已經用棚架搭建固定好，沒了倒塌的危機。
至於廣場上的兩邊，依然有不少人在擺地攤。
那些小朋友都坐了在C橦大樓的地下展覽中心，接受著生活技能的教學。
而抬起頭來，更可以見到不少的人在大樓的梯間、走廊移動，大樓的牆壁則掛放住各種勵志的標語海報。
見到這一幕，我心中多少都充斥住感動。
在大本營垂死的邊緣間，我們的力挽狂瀾，起了作用。
我亦能像個普通人般，光明地走在路上。
「咳...咳......」我掩住口，繼續於周圍遊走。
如少佐所言，大本營已經一洗頹氣。
從前不好言笑的人們，現在面上都添上一份笑容。
一個沉重與頹然的地方，變得綻放住活力。
我看，先去圖書館找少佐吧，跟他交代一聲我來了也好。
「好，各位小朋友，今日就講哈利波特嘅故事啦。」似曾相識的聲音，在圖書館出現。
得悉聲音方向的我，見到聲音的主人是誰了──阿玲。
沒想到，她還帶著那些孤兒。
接著，我往從前老賢的房間前進，那一間是領導人的辦公室。
沿途中，經過圖書館玻璃房的我，又遇到幾個熟人。
還有那個木訥的賴三老師，他正教著其他人一些野外求生技能。
「喀喀──」我敲門。
看來沒有人在。
「少佐唔喺到，大本營暫時由我代理。」又一把相熟的女聲，於我身後出現：「你搵佢有事？」
我轉頭望去，是以前C橦那個生活王──愛紗。
「你...係代理？」
「嗯，如果你係行政、資源方面有疑問，都可以同我講。」愛紗認不出我很正常，因為她頭一次見我的真面目：「如果係想加入搜索隊、申請外出嗰方面嘅事，你要去搵大舊。」
沒想到，這個小女生居然成為了大本營的代理。
也好，她生活方面幾乎十項全能，這麼聰明的女生，應該不成問題。
「少佐佢去咗邊？」
「我都唔太清楚...佢只係交低代理嗰位俾我，暫時要我同大舊幫手睇住大本營，你或者去問下大舊？」捧著一大疊數薄的愛紗，說。
大舊...
我想，他不是在活動室教導學生防衛術，就是在健身室操練。
接下來，我又去到大本營的活動室。
裡面有幾十個青年人正在接受著防身術的訓練，不出所料，大舊正擔當著他們的導師。
「揮拳、急退！箭步上前，再連打三下！！雙手舉起格擋！！！」大舊的教學，依舊充滿熱情。
站在活動室外面觀看的我，頓時回憶四起，一時間也忘了自己要來做什麼。
「大舊Sir...出面好似有人搵你？」一名學生留意到我站在外面。
「係咩？」大舊望了望外面的我，再對學生們說：「你哋繼續訓練啊！唔好偷懶。」
說畢，他就用毛巾抹一抹臉上的汗，然後開門出來：「係，你搵我？」
「我想問你...知唔知少佐喺邊。」我壓下了腔子。
「佢有啲事暫時離開咗。」大舊疑惑地望住我，說：「你...係邊個搵佢？」
「唔該。」我轉身、離去。
「唔...洗......」大舊他用住極度疑惑的目光，打量住我。
少佐會去了哪裡？作為領導人的他，應該會有交代過。
是晚，在王達尼的邀請下，我和瓦禮一起到了愛紗的宿舍用餐。聽說王達尼說，回來大本營以後，愛紗往往會做一頓豐盛的晚餐給他享用，這次也不例外。
只是，這次加上了我和瓦禮。
「咦...係你？」愛紗認得出，我是今早找少佐的那個人：「原來你係阿尼朋友啊。」
「嗯啊～你哋見過對方？」王達尼坐到宿舍的沙發上。
「今朝見過。」我答。
「你叫瓦禮啊可？」做了一碟碟小菜的愛紗，愉快地笑著：「隨便食啊，聽阿尼講你想搬嚟大本營住？你聽日可以去七樓圖書館同我申請搞一啲手續。」
「好，唔該你啊。」瓦禮她禮貌地點頭。
「少佐係大本營嘅領導人，又會唔喺到。」我扮成無心裝載地說。
吃著燻魚排的王達尼，問：「少佐唔喺到？」
「係啊，唔知點解......佢幾日前交低咗職權俾我同大舊之後，就自己一個唔知去咗邊。」愛紗說。
「咩都唔留唔講，就咁出咗去......都幾危險。」我說。
「...都有留嘅，留低咗一份文件喺圖書館個辦公室。」愛紗說下去：「不過佢叮囑我同大舊，如果佢一星期之內未返嚟，先可以打開。」
「介唔介意俾我睇下係咩嚟～」王達尼揚起邪惡的嘴角。
「當然唔得啦！呢啲大本營機密，點可以周圍俾人睇，特別係你呢啲死黑商。」愛紗抗拒地說。
「咁我唔喺到嗰陣～大本營有冇發生啲咩大事？」王達尼轉問。
「有嘅...」愛紗有點失落，說：「最近，大本營嘅人外出失蹤率提升咗。」
「咩意思？」
「即係...啲人有去無回。」愛紗的一句，使歡樂的聚餐氣氛沉重下來：「所以你見到大本營周圍都貼住尋人啟示。」
「咁...恐怖？」王達尼吞一吞喉：「俾病者襲擊啊？」
「唔似，因為就算俾病者襲擊都會變成病者，然後喺附近徘徊。」愛紗說出理據：「但係，嗰啲人直頭係人間蒸發咁，唔見咗。」
「係惡意倖存者做嘅事？」我說。
「有機會...」愛紗點頭。
愛紗見氣氛下降了，便轉移話題：「咁阿尼，今次你喺艾寶琳倖存區又有咩經歷啊？又呃咗幾多人錢啊？」
「冇喎～」王達尼攤手，說：「只不過搞掂咗一個叫「病者平權組織」嘅嘢，然後解救咗好多人～仲入咗皇宮接受皇室待遇。」
「你吹水啊～？」愛紗說。
「信不信由你～」王達尼苦笑：「你跟我去咪知。」
「唔啦，我先唔會陪你行污渠，咁唔衛生～」愛紗說。
當晚，聚餐結束後，我繼續在大本營的四周逛逛，果見貼住了很多尋人啟示。
「夜晚十二點囉，唔好周圍行囉～」一名報鐘的大本營居民，邊敲鐘邊說：「一陣失蹤咗，就返唔到嚟囉。」
「失蹤？」我望住他。
「最近大本營好多人喺出面失蹤啊～所以夜晚就乖乖地訓覺啦。」他答完，就繼續報鐘。
之後，漫無目的逛著的我，又在四樓遇到一個因為天色太暗，而不敢獨自回去宿舍的小孩。
「哥哥...可唔可以帶我返去圖書館？」他問。
「你咁夜仲喺到？」我問。
「因...因為我今日唔想上堂，嚟咗呢到偷懶訓覺，一訓醒個天已經咁暗啦...」那男小孩說。
「好，跟住我。」我為他帶路。
「我好驚啊......」他拉住我的衣袖，跟緊著我。
「驚咩？」
「好驚失蹤...老師話...唔可以自己一個亂走。」
看來最近的失蹤事件，都使得大本營人心惶惶。
把害怕的小男孩送回圖書館後，我那後天的探員觸角又彷彿引導著我，直覺告訴我，少佐驀然的離去，並不簡單。
於是，我先去了他以前住的宿舍一敞。
我開了開門，被鎖了。
為了開鎖，我特意在半夜找來王達尼。像他這樣的爆竊專家，不費吹灰之力，便用一條幼幼的鐵絲把門扭開了。
「呵欠～計你錢啊，咁夜仲叫我起身......」他一面疲倦地說。
「借埋嚟用。」我拿走他手上的鐵絲。
「唉～得啦得啦，聽日見。」說畢，他就回去休息了。
少佐的房間，跟以前沒多大分別。
在他的唱機上，放住了一隻唱片。
好奇的我，按下了「播放」，一首經典的歌曲隨即徐徐地於宿舍中環徊......
「朋友我當你一秒朋友朋友我當你一世朋友」