我把奎斯帶到去村長的住處，要解釋的話實在太多要說，直接看會比較清楚。
「喀──」把門推開後，就見到被拷問得痛哭流涕的村長。
而王達尼，則靠在牆邊抽著煙，似乎已經知道了要知的事情。
「咦...」奎斯愕然。
「呢個村長係信奉病教嘅人。」我走上前，揚起淺淺的嘴角：「依個先係你真正調查嘅目的？病者平權組織。」
望住我的奎斯，猶豫了幾秒：「睇嚟......你一早就估到。」然後，也關上了門、慢慢步入屋子中。
「正常人都唔會揀喺到過夜，除非有真正重要嘅事情要做。」我的推測，總算沒有錯。
「聽人講過...病者平權組織每日都會去唔同倖存區宣傳，而今日正正係呢到。」奎斯打量著村長，說：「所以一早就嚟咗，打算睇下見唔見到佢哋蹤跡。」
「之後就順便發現埋，呢個人嘅信仰。」我圍繞住村長而行：「睇嚟都已經俾人洗咗腦。」
「原本我留喺到，就係想接近佢調查啲嘢......」奎斯望住地上的血班，說：「但估到...你哋比我更快手、比我更狠辣。」
「要喺人哋嘴巴撬出情報，呢個方法應該係最快。」我答。
「依方面我習慣謗敲側擊，咁樣做太殘暴。」奎斯單手握起了血跡斑斑的啞鈴，說：「都幾重。」
「你係邊個？」靠在一旁抽煙的王達尼，問。
「病獵公會嘅奎斯。」我向他介紹。
「我嚟係調查病者平權組織。」
「我嚟......係嚟拎番屬於自己嘅嘢。」王達尼對於寶石袋子的執念很大。
「你比起病獵公會嗰個賴桑，睇落踏實得多。」我繼續與奎斯對話。
「係？」奎斯露出個不經意的笑容，說：「佢同我行嘅路線唔同。」
「就好似我同黑鼠咁？佢係個全職商人。」我順道向他介紹王達尼和自己：「我係個保護佢免受病者襲擊嘅兼職獵人。」
「賴桑佢......係個處理內在勢力嘅人。」奎斯慎重地說。
「內在勢力？」
「寶琳區身為倖存者嘅大熔爐，自然會有住唔同嘅人，信仰病者嘅危險份子都係其中一種，佢哋唔單止喺外面會有蹤影......」奎斯在屋中取了個啤酒杯，倒了枝陳舊的老酒給自己：「就連內部，哪怕係皇室入面，都會有佢哋嘅影子存在。」
「所以你哋就一個處理外面，一個處理內在？」
「係，咁樣效率會好啲。」奎斯喝酒了。
「難怪，佢嘅穿著打扮咁......」接近皇室貴族成員的模樣。
「嗯，要出席寶琳一啲皇室同貴族之間嘅聚會，就難免要有小小浮誇嘅打扮。」奎斯低沉地笑，說：「世界越係淪亡，大家就越係唔介意浮華嘅穿著，因為呢啲事情根本係微不足道。」
「咁你聽日會去邊？」我問。
我很開心，這個世界尚算有奎斯這種正常人，我不是說外表，而是那個性及思想。
「咁就要先聽下你哋知道嘅情報。」奎斯望出窗外的，凝視那皎潔的亮月：「聽講無耐之前......病者平權組織去咗同將軍澳區嘅不良人開戰，最後兩敗俱傷，病者平權組織只係得番一小部分冇出去嘅成員生存，但我諗佢哋根據地都變咗，要重新搵過。」
「我已經問咗。」王達尼把煙弄熄了，盯住村長：「嗰條友話，佢今日去咗靈實協會嘅禮拜堂接受「恩賜」。」
「嗰一帶......」我苦笑，說：「係滿天嘅地頭。」
「滿天？」他們兩個不約而同地問。
「冇嘢，之後呢？」我繼續問。
「之後，我啲寶石......應該就喺嗰到。」王達尼說。
「咁你哋諗住點處置佢？」奎斯望向一言不發的村長。
「以前嘅我會割咗佢聲帶，再切斷佢全部手指，防止佢走漏風聲俾對方。」王達尼站起，緩緩地走到村長面前，冷峻地說：「就睇你哋......同唔同意。」
「咁樣係生不如死。」我說。
「冇錯......」奎斯雙手插腰，很是同意：「不如搵個人收埋佢就算。」
「邊個？」王達尼問。
「漢木老伯得唔得，佢屋企好似有第三層，係密封住。」我回想起，今早爬窗入去的事情：「收喺嗰到，直至事件告一段落。」
「呢到啲村民會幫手？」奎斯問。
「俾錢就得，講到尾......對佢哋嚟講，呢個村長只係將自己人搵番嚟嘅嘢，白白送俾外人嘅麻煩友。」王達尼搖搖頭，說：「只係呢到嘅村民太和善，唔敢做到我哋呢一步。」
「咁趁夜媽媽，郁手吧。」我托起椅背。
我們三人合力把村長連同困綁住他的椅子，抬到去漢木老伯的家中。
一開始我們說明因由花費了好多時間，但一說到錢漢木老伯的抗拒心態便漸漸軟掉下來，最後以一百塊艾幣一天的價值，成功讓漢木老伯把村長收藏到三樓之中。
如果是一個月的話，即三十天，就代表要支付三千塊艾幣。
「嘿哈哈哈哈～你哋仲有幾多個人要收埋，都歡迎搵我！」漢木老伯接過王達尼手上的錢後，歡笑得不可開交。
「唉～」付錢的王達尼，看上去好想哭。
「你哋聽日都會去？病者平權組織嗰到。」奎斯在屋子外，問。
「會。」我跟王達尼一同答。
王達尼他要拿回自己的寶石袋，我則要趁機查明真相......什麼「恩賜」。
一個宗教勢力強大，斷不是開口說白話就可以，一定有其堅固的原因。
「好，咁我要一齊？可以互相有個照應。」奎斯說。
「嗯。」我答。
「唔...時間都唔早。」奎斯望望上空。
「去休息吧，」我對住他們二人，說：「聽日中午呢到集合。」
在睡夢中，我有時會自己一個在路上走著、走著，永無止境地。
天上會有很多烏鴉徘旋，既冰冷、又黑暗，直至背後有一泊光芒到來......回頭望往的我總會醒來。
張開眼，就望見窗外那刺亮的陽光。
「訓完都好似冇訓咁......」我如常地每日醒來後會做的事情，穿上黑袍、戴上面具。
彷彿，黑袍與面具都與我合為了一體，給予我很多的安全感。
我在木社旅館弄好麻煩的長髮後，便出去迎接新一天的陽光。
早上起來，村民都努力地工作起來。
有的人在餵養母雞、有的人在搬運原木、有的在維修村子，我一直沒發現，原來他們入口有塊維修中的牌子，上面刻寫著「松木村」三字，似乎是倖存區的名字。
我準時地到集合的地方去，原本以為自己會是第一個到的人，萬萬沒想到奎斯會比我早。
「你到咗好耐？」我走過去。
「三十分鐘。」奎斯點頭。
「我哋應該要等下......」我抱住雙手，說：「嗰條友應該要等一段時間。」
「出發！」一說完，王達尼便現身我們面前。
「...你咁早。」我有點意想不到。
「我差唔多成晚都訓唔著......」王達尼有住一雙深怨的黑眼圈：「去得未？」
「未得住，要買啲嘢先。」奎斯邊行邊說：「你哋唔洗準備？」
「準備？」我想，我們比較遍向吃腦。
「無論對付病者定係惡意倖存者，都要準備充足。」奎斯彷彿教導著我們，如何成為一位基本的外出倖存者：「武器、後備武器、食糧、充足嘅水袋，仲有會用到嘅小工具。」
「會唔會太多嘢，搞到好重。」王達尼說。
「重得過你啲貨？」我揶揄。
奎斯先帶我們到武器店，購入了一些特製的木箭，前端刺頭是有鐵片，傷害力較一般木箭為大。然後再另購一把新的小短刀，因為昨天那一把短刀，幾乎被大耳的耳垢弄得不能再用了。
至於食糧，是幾塊肉乾方便攜帶。
食水就用水袋盛好了，方便隨時飲用。
小工具方面，則是繩子、繃帶之類的物品。
「我自己仲會整啲靈藥。」萬全準備的奎斯說。
「靈藥？」我疑問。
「喺病者身上收集返嚟造成嘅藥劑，我哋病獵公會都統稱做「靈藥」。」奎斯把自己腰袋插住的一小瓶透明藥劑，給我觀看：「呢枝你估下咩嚟。」
「呢枝......咁似口水？」我留意到，液體中有起沫泡泡。
「係舌女嘅唾液，腐蝕性好強。」奎斯為我解說著前所未有的知識：「適合用喺偷襲，只要準啲擲到去眼睛嘅位置，對方就會立即失明。」
「厲害...」我把靈藥握到手上，仔細凝視：「佢有冇名？」
「呃......毒辣的舌女靈藥？」奎斯笑答。
「仲有冇其他靈藥？」
「仲有黏合靈藥。」奎斯拿出另一小瓶濃稠的靈藥出來，說：「係收集病嘴嘅唾液做成。只要扔到去對方雙腳，就可以痴實對方喺地好難掙扎，一般用喺逃生個陣。」
「真係有趣......」我又拿起黏合靈藥到手上看。
「如果你真係有興趣嘅，可以去公會搵Nina問配方，佢係我哋之中識得調配最多靈藥嘅人。」奎斯把靈藥放回到腰袋中插住。
「唔掂......開始攰。」王達尼看起來真的一晚沒睡：「出發未？」
「唔。」
離開松木村前，我們到武器商店買了木盾和木矛給自己用，王達尼則買了長弓與箭。
在路上，奎斯有問我們：「你哋有冇帶埋軟木耳塞出嚟？」
「有，做咩？」我問。
「遇到病童嗰陣，可以完全無視佢哋嘅聲音。」奎斯輕淡地勾起笑容：「一陣可能會經過寶翠公園嗰頭，嗰到特別多。」
「係，我見過。」我回憶起跟白魂剛到那處，發現一切都是幻覺時，是如此的恐怖：「特別係嗰隻男病童......好似特別難搞。」
「男...病童？」奎斯聽到它的名字後，有點錯愕。
「嗰隻係寶康公園見到，一見到佢隻耳就會失衡咁，耳鳴得好勁......」我說。
「你...真係遇過......？」奎斯再問一次。
「係...有特別？」我疑惑。
「根據以前病獵公會資料文件記載......」奎斯凝重地說：「一般病變為病童嘅人類小孩，都係由６歲至１２歲嘅女性變成，而男性變成病童機率......幾乎只有0.60％，但恐怖嘅能力就遠超一般病童。」
「淨係...呢個機率之外嘅６歲至１２歲男仔，都會死？」我問。
「係。」奎斯確定地說。
「哼，即係你遇到嗰隻係極稀有品種，你捉佢賣去病者平權組織嗰啲地方～或者可以大賺一筆。」王達尼無時無刻都只想到錢。
「咁我無死喺佢手上...都算好彩。」我說。
「你真係好幸運，我差唔多呢一、兩年隔日就出去倖存區，都未遇過男病童。」奎斯說。
「或者有啲人遇過，不過都已經死喺佢手上。」我說。
我們以靈實協會禮拜堂為目的地，沒打算繞什麼路。
只要在寶康路上一直往前，最後轉入靈康路的彎路就能到達。
但世上往往沒有那麼便宜的事，衪才不會讓你平淡地渡過一段路，哪怕只是一小段路。正當我們通往靈康路之際，已經分別有數隻病嘴與病牙向我們靠近。
它們拖著看似緩慢的步伐，一步一步的走向我們。病嘴的口腔永遠流下著濃黏的唾液，和那恰似中風的嘴巴十分相襯。
病牙的長相則較為兇殘，每一隻都有不同的尖齒形狀。有的兩隻犬齒極其尖銳能撕破一切，有的門牙極為巨大能咬碎一切，共同點除了該死的紅點外，就是那可憎的樣貌。
我有時覺得，如果它們長得像喪屍還好，至少還能看得出是人類的輪廓。
但這些怪物，分明就要扭曲其身為人類的過去。
「兩隻病牙，一隻病嘴......」奎斯略略觀察了情況，拉起了弓：「同我哋有一定距離之後，佢哋會突然加快腳步衝過嚟，喺之前搞掂佢哋。」
「咻──」鐵箭射到病牙的臉上。
「嘻...嘿......啊～唚哞......」病牙發出了不明的聲音，但顯然毫髮未傷。
「要搵個人引到佢打開嘴巴先......」我說。
話未說完，三名病者就分別向我們衝來！
「黑鼠！佢拉低嗰病嘴！」奎斯立即下令：「黑鴉......」
手持木矛的我踏前一步，刺出了長矛向病牙的腹部，防止它的前進。同時，進入了攻擊範圍的它亦都張大了恐怖深密的嘴巴，想要對我張口大咬，奎斯馬上對其口腔發箭！成功擊殺一件。
「嗚...嗚嗚嗥！！」另一隻病牙也衝向我們。
另一邊廂，除了有隻病嘴追住王達尼之餘，更忽地飛來了一隻病翼，鎖定了他做目標。被兩隻病者追趕住的他，在大馬路上跑過不停。
這次我們要對付的病牙跑得很快，雙手更捉住了奎斯想要將他吞噬的樣子，奎斯極力抵抗，我亦趁機會從側面用長矛刺入到病牙的腦中！「嘶」的一聲，病牙腦中貫穿了一根木矛。
「嗄...嗄唹...喲喲......」病牙動作有所緩慢起來。
奎斯當機立斷地把它按低，將取出短刀快捷地刺進其口腔之中，並在一秒之間極速收手。病牙就像鱷魚般，想要咬手不成，繼而死去。
「啊......！！！」聞聲，我們才得知王達尼被病翼抓住肩膊到半空上。
「咻──」奎斯二話不說，拉弓、發箭。
「嘶──」箭射中了病翼的背部，讓它痛苦不已。
奎斯沒有停下來，繼續一貫快敏的發箭技巧，箭在他身上就如不用錢般，一直射過不停。病嘴亦留意到這樣的它，想要衝過去制止住。
我馬上用長矛從旁橫向伸出，絆倒病嘴的腳，使它黏性極強的嘴部緊緊地貼住了地面。緊接，我繼續抬頭望住半空不上不落的王達尼，他兩手空空的掙扎，似乎想要迫使病翼下墜。
但身中數枝的病翼，就是死死支撐著，想要飛升到一定距離後把王達尼放開，讓他活活摔死。
「接住！」我從下方向他喊了聲，把長矛拋向了上方的他。
約空中六米高的王達尼勉強地接住木長矛，再全力往抓住自己的病翼一刺！它的嘶叫聲釋出，終於痛苦地下墜，我跟奎斯二人合力在下方打算把他接住......
「啊──」可是，我們二人也臂力不足，始終讓他摔了一跤。
「嗄...嗄......」就像，經歷了一場浩劫。
「唔洗死已經算好彩...嗄...話哂我哋喺「死亡之路」入面。」奎斯回過神，說。
「病者仲會繼續嚟，走。」我扶起了王達尼。
「嗄...嘿嘿嘿......嘰嘰...」什麼聲音。
「等...等陣...」奎斯叫住了我們，並凝視住靈康路的草叢：「有笑聲......」
「仲嚟...！？」王達尼有點激動。
「嘻嘻......」有隻不知什麼原因，斷了兩腳的舌女從草叢中爬出，生前更是沒有衣著穿在身上。
其灰褐色的皮膚配上了紅點，儘管它生前輪廓是個美女，長長地垂下著的舌頭，亦讓它增添了一種恐怖的深怨。
「睇嚟呢條女，生前發生過一啲慘事......」王達尼望住想要爬過來的它。
「咻咻──」奎斯向它連續發了三箭在舌頭中，終結了它。
「就快到。」我望住前方的靈實醫院。
解決這場突如其來的危險後，我們三人繼續上路。
現在除了病者之外，我們更要提防病者平權組織的人。
我們從坡林的泥路接近去目的地，偷偷觀望，附近沒有什麼人行過。
經過一會也沒有太大動靜後，我們決定出發去查看。
「呢個教會對門鎖咗。」我望住那條鐵鏈。
「咁點？去附近睇下？」王達尼問。
「附近仲有療養院個啲，或者嗰班平權友就喺入面生活。」我說。
「再去附近睇下。」奎斯提議。
於是，我們打消了進入禮拜堂的念頭，轉為在附近觀察。
不出所料，確有實病者平權組織的人在此處活動。
他們身穿白衣，拿著一本叫書的唸唸有詞......
「果然仲有餘黨...」我盯住了那人。
「殺！」王達尼對寶石的執念太強大。
「唔好輕舉妄動，可能對方有我哋意想唔到嘅秘密。」
如是者，我們在外圍先作一段觀察，約莫數十分鐘後，就找了個沒人注意的空檔潛入他們的根據地。
那是一橦寧養院，設有幾座坐落於附近，還有一間名為基督教靈實協會的教堂，相信這幾橦建築物必定有住一定關連。
跟滿天所在的靈實醫院距離不遠，百步之內必定到達。
「睇嚟佢哋真係元氣大傷......」奎斯蹲在一邊，說：「以前佢哋根據地附近總係好多人。」
「你以前就有留意佢哋？」我盯住前方不遠處的白衣教徒。
「嗯，不過......當時佢哋勢力仲係好強大，我一個人根本做唔到啲乜。」
「呢方面你要多謝佢。」王達尼拍拍我膊頭，對我露出個意味深長的笑容。
「係？」奎斯不明所以。
「唔洗理佢...」我上下打量了建築物一陣：「你諗住點入去。」
「我哋可以遊繩、潛行，應該得呢兩種方法。」奎斯說。
「噹～噹～噹～噹～」忽然，一陣鐘聲響起。
「喺附近間教堂傳嚟......」我更聽得出，是昨日病者平權組織前去松木村倖存區時，所敲響的鐘聲。
「呢個鐘聲對佢哋嚟講，似乎...有住特別嘅意義。」奎斯托住下鄂。
「喂...！入得去未！」王達尼低聲說：「我啲寶石......」
「睇清楚情況先，盲頭烏蠅咁亂入虎穴，只係自尋死路。」我說。
鐘聲響起一會後，我們能開始聽到寧養院內的白衣教徒開始移動腳步，他們紛紛走了出來，向著某個地方前進。
「佢哋去緊教堂嗰到...」奎斯留意到：「睇嚟...個鐘聲係召集佢哋過去。」
「係機會...！」王達尼一直焦急到現在。
「我知道你好愛惜啲寶石，但你都要愛惜自己條命。」我對他說。
不一會後，病者平權組織的白衣教徒都似乎進去教堂了，寧養院沒有什麼動靜，王達尼便把心一橫，從草叢衝了過去寧養院後門，再偷溜進去。
我們想叫，也叫不住了，索性放任他自己去，不要連累到我們就好了。
「佢...唔會有事呱？」奎斯問。
「佢都算係個聰明嘅人，只係喺錢面前智力會下降少少......」我盯住王達尼的背影，說：「不過我相信佢自己一個可以。」