在我步出D大樓時，我不難發現營中經過見到我的人，都會用猜疑、不明、不安的眼神望住我，然後急步離開。
原來病爪的頭對他們來說，會引起如此大的驚慌。
不過為了執行Dr.D的任務，只好這麼做。
理所當然地，不久後...我便被人帶去問話，而那人正是少佐。多月沒見的他，似乎沒有改變，一副俐落能幹的神態、冷淡的腔調都在證明著。
大本營A橦一樓，拘留所內。
入面我只略略聽聞過，用來監禁住在大本營中犯法的人，例如偷竊、傷人等罪行，而他們則以「攜帶病者身體入營內的罪名」暫時收我入去，我應該是第一人。
「你叫咩名？」少佐把我帶到一間小房盤問。
我沒回答。
他見沒什麼反應，又說：「我好似第一次見你。啱啱收到通知，你攜帶病者嘅身體一部份入咗大本營，個頭呢家喺邊？」
「有罪？」我刻意壓沉聲線，不讓他識穿我的身份：「剛才你班睇門口嘅手下冇阻止我入嚟。」
「有常識都知，病者會感染人類。」少佐開始握起剛剛靠放在桌子旁的鐵製棒球棍，盯住我，說：「佢哋同我講...你帶入嚟嘅頭，都唔似個班眼耳鼻舌嘅樣。」
「嗯。」
「你仲未打算講出嚟？」少佐的棒球棍指住了我，一貫冷鋒的態度：「我知係病爪，我某個朋友，見到你帶返嚟嘅頭係病爪嘅頭。」
不用說，肯定是犬京告訴少佐。
「目的係咩。」少佐簡單地問一句：「而且你係點殺佢。」
「你準備要一棍毆死我？」我望住少佐手中的棒球棍，說：「定係你覺得我會同你講。」
「冇一個我滿意嘅答案，你可能要捱幾棍。」
「我喺老賢嘅人，我受傷你負唔起責任。」
「我冇收過老賢要對付病爪嘅命令，亦都冇收過佢消息話...即將會有個病爪嘅頭被帶入嚟營內。」
「咁只係因為你太低級。」我平白地說：「冇收到上位者嘅消息好正常，唔信？派人去問下老賢。」
少佐見我有如此的自信，便真的派人上去七樓問一下老賢，最後得回來的答覆是──「立即放走我」。
「你確定老賢係咁講？」少佐覺得疑信參半。
「係......佢明確咁同我哋講，要我哋放走佢。」少佐派去的調查員說。
「話咗。」我拾起雨傘、站起，準備離開了：「我都浪費咗好多時間。」
最終，事情弄到夜晚我才能離開。
在我離開的時候，少佐依然盯住面具中的我，看來...今後行動會有點阻滯。
「你覺得...Dr.D點解要你帶個返嚟。」老賢坐在長椅上，問。
「我都唔清楚。」站在他房間門口前面的我，走到窗旁：「我估都係研究之類嘅事...但係不得不佩服佢嘅成果，Dr.D佢研究病爪枝血三個月，就可以檢驗出佢嘅弱點係陽光。」
「呢個亦係我容許Dr.D有特別寬鬆自由度嘅原因。」老賢眼神放空，說：「佢可以話係全大本營最聰明嘅人，如果佢嘅研究係肯為人類付出...我絕對讚成總會全力支持佢。但基於佢嘅個性，我好難相信佢，而且仲要派人去監視佢。」
「雙面刃？」
「冇錯......Dr.D佢係一把雙面刃，當初病者好多弱點同特性，都係由佢觀察研究出嚟，再經我哋解釋俾營內大眾知。」老賢又說起一些往事：「我有冇同你講過，Dr.D曾經都有兩個手下...幫助佢完成研究，就做你依家類似嘅事情。」
「你好似講過。」
「但佢兩個最後嘅下場......」老賢淡然地說：「係失蹤。」
「你係指？」
「我係意思係，你喺適當嘅時候要識得抽身...當覺得Dr.D唔再信你嘅時候，就即刻離開，如果唔係下場可能同前兩個人一樣。」老賢說。
「佢呢家暫時仲係好信任我。」
「但你都唔好俾佢同化到。」老賢提醒我一句，說：「佢係一個聰明人，總係會喺你唔覺意嘅情況下......令你覺得佢係一個好人，值得跟隨信任嘅人。」
「我繼續調查下佢，我呢家大概已經可以喺佢管轄嘅地方出入自如。」
「嗯，你幫佢收集咗病爪嘅樣本。」
「另外我想講，我日後行動可能會受到少佐針對...」
「放心，遲下學堂正式開成，我會同全大本營宣佈一啲事，當中包括關於你嘅嘢。」
「我嘅嘢？」
「M，到時我會正式對外宣佈你嘅身份......係個外面嚟嘅病者獵手，然後任命你為學堂嘅「病者攻擊學導師」。」
「點解...」
「信我，因為你今日帶咗病爪嘅頭返嚟，之後落嚟大本營謠言就會開始散佈，唔俾一個同對抗病者有關嘅身份你去自圓其說，營內嘅人會開始對你不利。」
我不禁嘆氣：「人類的確好麻煩。」
明明我在幫助營內的他們，卻要辛苦自己。
「英雄啊。」老賢突然對我淡淡一笑，說：「M，英雄從來都分兩種。」
「...」
「一種係為大眾所知，受人歡迎，喺光明之上嘅英雄。」老賢凝望我面具內的眼眸，說下去：「而另一種，係喺黑暗之下默默付出...為咗令光明之上嘅英雄更加輝耀，佢哋唔受歡迎...就算死咗都唔會有人理會，不過佢哋貢獻最大，所承受嘅痛苦亦都係最大。」
「...」
「但我最尊敬嘅，就係呢一種英雄。」
我細嚼了一下老賢說話的意思，才淡笑：「我從來都唔受歡迎。」
老賢會心微笑，我亦離開結束今次的討論。
之那天後，如老賢所說，大本營人心惶惶，謠言就好比病毒散播一樣快速，大家都在背後討論著「那個長髮的人」、「烏鴉面罩」、「黑袍死神」等關於我的議題。
儘管內容不會傳到入我耳中，我都看得好清楚，不過我對別人的異光沒什麼大反應。
只是走到了天台之上，站住望著十年不變的曇天，靜靜的一個人，當是呼吸新鮮空氣。
天上的雲總是灰色一片，好像很混亂。
我每次上來，都會被一個人打破寧靜。
就是瑜小六。
我都差點忘了她的存在。
她每次上來後只是靠在欄杆前，望望外面的風景。除了欣賞風景和跳樓自殺之外，我真想不到天台對她來說，會有什麼用途。
原本我想瑜小六不是個天台的常客，最多一星期上來一、兩次，沒想到往後的幾十天，都能見到她的出現。她喜歡在這裡目無表情地咬著配給的乾麵包，失去了當初的活潑。
漸漸地，我都已經習慣了有她的天台。
一天，風勢特別猛烈。
吃著乾麵包的她，完全沒有為意放在地上的水瓶，於是強風一拂，水瓶便滾了過來我的腳旁。
我稍為望了腳邊一眼，再望住兩邊腮子都塞住麵包的她，手勢及動作都似是想過來拿，但表情上卻顯出不太敢靠近我。
這情況維持了好幾秒。
最後，我把水瓶拾起，再走到瑜小六面前交回給她。
瑜小六在我靠近後，臉色有點驚恐：「唔該...」接過水瓶後，才吞得下口中的麵包。
我轉身，繼續遠眺外面的風景。
之後她的注意力就從外面的景色，轉為到我的背影，忍不住口說：「我啱啱唔係有心咁抗拒你，係佢哋話......要小心啲你，對唔住。」
良久，我反問：「佢哋？」
「大本營入面嘅人...」
「我唔係為佢哋而生，習慣就好。」
「你係因為......」瑜小六不知出於什麼，開始跟我搭話：「唔想聽到佢哋閒言閒語...所以先上嚟？」
「只係鐘意，一個人上嚟靜下。」我說。
「唔...」瑜小六會意地點點頭，說：「我同你一樣都鐘意上嚟，不過...我係為咗記念一個人。」
「...」不用說，我也知道那個人就是我。
還未放得下嗎？
「我喺幾個月之前...」瑜小六無力地握住拳頭一下，心有不甘的合眼、閉唇：「累死咗佢...」
「個一日，天空同今日一樣咁灰？」
「係...」小六點點頭，用手擦一擦眼角：「一樣咁灰，但我覺得好靚。」
「嗯？」
「因為佢唔係個啲可以配得上藍天白雲嘅人......」瑜小六紅紅的眼角，淺淺地笑：「我覺得呢種天空係最襯佢，一個代表住佢嘅世界。」
「如今，」我望住瑜小六，說：「你算係走入佢嘅世界？」
「我好想知...佢一直以嚟，到底係望緊啲咩。」
「既然佢死咗，你就放低佢，唔好再浪費時間。」
「點會係浪費時間...」
「你記住嘅人，只不過係無人問津嘅廢物。」我抱住手，望住瑜小六：「既然有時間留戀，不如去裝備自己......下次唔好再累人。」
「...我已經，我已經有好努力去鍛練。」瑜小六一副心有不憤的神情，但雙眼又滿含內疚：「我已經報名參加咗學堂嘅班...已經準備好同病者對戰。」
「咁祝你好運。」她硬是要記念我的話，我阻止不到吧。
再過一個星期後，關於我的謠言已經滿天飛，更有人說我是「不良人」派來的內奸，目的是要感染整個大本營的人。
漸漸地，人們的內心都對我有不好的印象，所以老賢已經決定在某夜舉行一場演講，大概是一些振奮人心的說話，並在最後介紹我的身份。
那一晚，整個大本營前所未有的齊人，平時在宿舍、休息室、圖書館、醫療室等地方工作的人，都走出來廣場坐在地上聽老賢的講話，就連八、九樓的權貴也在欄杆旁聽著，頭一次感受到人山人海的感覺。
老賢德高望重，幾乎每一句說話完結後大家都真誠地拍掌。一個人要受人尊敬和追隨，的確要有仁、義、道、德才行，我看大本營除了老賢之外，大舊已經算是最接近的一個，只是他缺乏了一個腦袋。
「之後落嚟，我諗大家都知道大本營嘅學堂即將要成立。」老賢持續了兩小時的演說，還未感疲倦：「成立原因，基於過往都只係得大舊舉辦嘅「病者防禦學」課程，大家都認為未夠全面，真正令到所有人認識我哋嘅敵人──病者。」
準備要出場...
「經過我諗過同討論之後，大本營學堂大致上會由以下幾人出任。」老賢開始逐一介紹所有學堂老師：「首先係照顧孤兒同幼童嘅老師，有金美娜小姐、Ann小姐、夏晴小姐、阿玲同阿登。」
沒想到...阿登和夏晴也有份。
不過阿登是大學生，夏晴又天生容易接近小孩，應該沒什麼問題。
我想，是阿玲先拉攏夏晴一起工作，之後夏晴再拉了阿登一起來工作吧。
另外兩個看服飾，都知道是權貴的代表。
他們五人站到講台之上，在全場陣陣掌聲之中，向各位微笑、揮手，今後大本營的基本學術教育，應該到放在他們五人身上了。
掌聲維持了好幾分鐘後，老賢又開始介紹另一伙人。
「之後落嚟，就係關於對抗病者嘅老師...係依一層，我哋物識咗好耐。因為大本營中勇於走出街外嘅人唔多，同病者有過對抗經驗嘅人更係十分之少。」老賢的沉穩之中，帶有一種老人的仁慈：「所以，我哋好不容易搵到幾個人，而佢哋都樂於接受我提出嘅職位......」
「第一位，大舊老師，佢今後將會繼續負責學堂嘅「病者防禦學」課程。」老賢宣佈第一位老師。
大舊一出場，在營中年輕人的支持度顯然是最高，不少青年都高呼大叫大舊的名字，大家也十分受落。
「大舊老師我愛你呀！」、「大舊幾時教我操肌啊！？」、「大舊老師加油呀！！！」看來在青年人眼中，大舊真的是一位好老師。
喜歡在營內穿住白色背心的大舊站在台上大笑，一手插腰一手揮手。
「第二位，會係教導「搜索環境地理學」課嘅賴三老師，好多嘅物資地點同病者來源、動向都係由佢發掘。」
這人穿住黑色的羽絨褸，頸上掛住一部單反相機，沒有揮手，只是對台下的淡淡微笑。
台下比較像老一輩的人對他拍掌最為激烈，眼神對他十分信任。
「第三位，「病者攻擊學」導師，佢喺外面有過好長嘅生存經驗，對付過唔同嘅病者，直至最近喺我邀請之下先入嚟大本營。」老賢介紹我了：「相信大家都聽過呢位導師嘅一啲謠言，不過謠言止於智者......關於帶頭入大本營個件事，係我下嘅命令，所以請各位唔好再作出不實嘅猜測。」
老賢...幫我背鍋了？
「啪啪啪啪啪──」說完之後，掌聲依然四起，大家都照常拍掌。
我一上台，老賢便伸手跟我一握：「繼續努力。」
我點頭，面向台下眾人。