「係狗...？」瑜小六對他牽著的狗感到好奇，越望越深入。
「嗯...佢叫Ricky，今年四歲。」那不明男子撥開掩住一邊眼睛的瀏海，善意地望住瑜小六：「你哋快啲走，一陣佢嚟到......你哋想走就難。」
「『佢』係啲咩？」對方似乎知道那把聲音的真相。
「病者。」他直接說出答案：「識模仿人類嘅聲音，指甲有又長又利嘅爪，見到佢嘅人通常都唔會生存到......係呢一區嘅「王」。」
「王...？」
「啱啱已經有一班人講唔聽，執意要前進...結果冇再返過嚟，如果你哋唔怕死我唔會阻止你哋～」牽犬男說。
「個班人...係咪七個男仔？」
「唔。」他點頭。
我心中一沉，但還是要向他道謝：「多謝你嘅情報。」
「唔洗，大家都係人類...唔會話睇住自己人去送死。」
「你叫咩名？」一直掩住肥西嘴巴的瑜小六主動問。
「我...係見你靚女先講～平時我唔會自報名字。」他又撥撥那被瀏海掩住的眼睛，望住瑜小六微微一笑：「我犬京。」
「我叫瑜小六，你唔落嚟？企喺二樓做咩。」
「咳...企喺二樓，好似型啲？」犬京尷尬地望向別的地方，假裝咳嗽一下。
「你點解都會喺到？」我有點疑惑：「理應呢到附近嘅物資都冇哂...」
犬京眼神滯空了幾十秒，沒有回答原因，反而叫我們快點離開：「你哋都係快啲走，唔好再返嚟呢區。」
「咁你呢？你唔走...？」小六問。
「我留喺到仲有事做。」犬京說。
「但...」
我望住瑜小六：「小六，走...佢講得冇錯，我哋返去再同大本營討論先。」既然對方不是我們熟識的病者，就不能傻傻地衝去送死。
「啱啊啱啊......！再唔走一陣冇機會走啊！」肥西連聲認同。
「犬京，你自己小心。」瑜小六心地挺是不錯，就算對方是個初初相識的點頭之交。
「收到，靚女小六。」犬京輕笑帶過，繼續跟自己的狗待在二樓欄邊。
在中途收到有新病者的資訊後，我們終止了這次短暫的搜救任務。打後的路上，肥西都帶住既感慨又悲憤的表情繼續說廢話。
「經過今次同你哋出生入死之後......我發覺人生其實好唔同！只要...只要勇於踏出勇氣嘅一步，再難嘅關我哋都會捱得住！病者啫～算得啲乜！？」肥西左右兩手搭住我們膊頭：「好兄弟！好姊妹！！」
「M......我可唔可以殺咗佢。」瑜小六像被一隻烏蠅纏了耳朵好久，有點忍不住了。
「唔好，佢仲有好多利用價值。」我揚起嘴角，望住小六。
「喔...咁遲啲先郁手～」小六打趣地道。
然而，正常人也知道以上對話只是隨口說說的笑，肥西卻當真一樣，怕得要死，一直到回路之中也在半哭求饒。
一穿過重重的障礙物及鐵板圍牆後，我們正式回到了大本營，入內一看的畫面就是憂心忡忡等待著我回來的大舊......
「M...！點啊？我班學生啊！！？」大舊馬上過來追問。
「佢哋...應該凶多吉少，我哋路上遇到一個倖存者，佢話A隊班人冇聽勸告...去咗搵一隻新型病者。」我如實道出。
「新...型病者？」大舊捏實拳頭，一條青筋暴露於臉骨中。
「所以我覺得未知道新型病者嘅能力同弱點之前，唔可以輕舉妄動。」我留意到大舊根本聽不入耳，只是強抑住內心的衝動：「一係搵埋少佐討論先？」
低住頭的大舊似是輕微地點了頭，見他充滿住負面的情緒像個計時炸彈一樣，我便先離他而去，讓他好好冷靜一下。
「M...唔洗理大舊...？」小六追上前問。
「由得佢冷靜下。」
「咁我呢家點算...？繼續跟住你...？」小六見肥西一入大本營已經火速離去，逃到不知哪去。
「你鐘意。」