嗰個求導者，好似喺草叢搵緊啲咩。
直到，有隻蝴蝶喺佢身邊飛過。
求導者目光注視喺蝴蝶身上，其後慢慢將手伸過去，蝴蝶亦不偏不移咁停喺求導者嘅手指上，張開咗翅膀。
佢有一雙美麗嘅水藍色翅膀。
可惜嘅係，下一秒，佢就被一道黑暗完全覆蓋住，然後全身被牙齒輾裂撕咬而死。
個求導者，將隻蝴蝶食咗落肚。
呢一個小小嘅慘烈場面，令我哋稍為瞇咗眼。
「我完全明白佢感受。」宋文德卻說。
「吓？」我唔明。
「喺入面嘅求導者，唔會被分配食物，每日只有一麥一麻提供，咁樣等同無嘢食一樣。」宋文德說。
「咁你嗰兩日點捱過嚟......」
「去廚房偷嘢食。」宋文德望住我，續說：「至於其他求導者，點樣可以唔餓死，就值得深究。」
「嗰個求導者好似未食夠。」沅彤目光仍然徘徊喺對面。
個求導者撳住肚皮，一面難受咁行返上山。
「跟住佢定點？」我問。
「照原定計劃，去教育營入面。」宋文德決定。
就係咁，我哋行多約莫兩粒鐘左右，就到咗教育營。
同一個地方，但係另一番景象。
成個教育營短短一晚間，好似唔同咗。
「係咪我錯覺，點解入面好似一個人都無咁......」我嘅直覺。
「入去睇睇。」
我哋無避忌，從正門直入。
果然，教育營入面好似唔見哂人咁......
「入宿舍睇下。」宋文德交代。
我同沅彤兩個行入去，入面都係無人。
十間房，十間房都係空嘅。
「正常呢個鐘數應該有信徒行嚟行去......」
對於教育營內異常詭異嘅情況，我哋都大感奇怪。
之後，我哋又搵埋禮堂，都係空無一人。
「咁嘅話，」我對住沅彤，講：「睇睇講台下嘅暗格。」
嗰個位，係我同沅彤收埋「重生會會計師條屍」嘅位置。
「會唔會好臭......」沅彤說。
「咁要......開咗先知！」我一手將小暗門打開，一陣濃烈而噁心嘅屍臭味立即傳出。
「哇......頂......」沅彤即刻掩住手鼻。
「條屍無處理，我諗應該無人發現佢死咗？」我將暗門閂返好。
「但會有人發現佢唔見咗。」宋文德一語道破。
「睇埋供品庫有冇人。」我提出。
供品庫入面都係空空如也，部份供品未俾人帶走。
「睇嚟走得好急。」沅彤說。
「但啱啱出現喺山上嘅求導者又係咩一回事。」我係指，如果佢哋走，無理由會賴低佢。
之後，我哋又去咗一啲嗰陣接觸唔到嘅地方睇，例如禮拜堂，即係要蒙眼先入得去見教主嗰間嘢。
咁次唔洗蒙眼，先見到入面係間同普通教堂無太大分別嘅地方，特別嘅係玻璃用咗紅色物料，陽光射入嚟嗰陣就會呈現淡淡嘅紅色。