「粗暴又簡單，稱唔上計劃。」沅彤拎起唔知邊到執嚟嘅石頭，有成個手心咁大塊。
宋文德幫沅彤補充：「供品庫喺禮堂後台個倉入面，但永遠會有一個信徒喺到看守，佢係重生會嘅財政管理者，直接打死佢就可以。不過有一個難題，就係行入禮堂嗰陣，入面長期有嗰個特別求導者喺到。」
「佢好似可以睇穿人身上嘅事物咁。」沅彤說。
「係......」我點頭。
「所以最怕就係暴力偷完之後，佢會知道，所以我會負責引開佢。」宋文德視線移向沅彤，說：「原本我怕沅彤一個女仔，會唔夠力一下打暈對方，但政你返埋嚟兩個人合力就應該夠。」
「應該唔會有太大變數。」沅彤深呼吸、坐低。
打後嘅時間，我哋都喺房間裡渡過，想等凌晨夜深人少嗰陣先出手。
凌晨兩點。
我哋不約而同咁抬頭，定定望住對方。
大家都有個共識，
時候到了。
喺緊張嘅關頭，彼此嘅共時性就越係強烈。
宋文德帶領我同沅彤行出走廊，去到宿舍外面。
入夜之後嘅荒郊野外特別寒冷，一推開道玻璃鋼門北風就迎面而來。
「我入去先。」宋文德作為衝鋒，先入去引開長期喺禮堂中央位置進行冥想嘅特別求導者。
「你好。」宋文德正式入去。
「嘻...？」嗰名求導者緩緩轉身，凝視宋文德臉孔：「一副......滿含陰謀嘅樣子呢......嘿嘻嘻......」
宋文德俾佢講中，但都只係怔然咗一秒：「我有啲嘢想請教你。」
「你可以......直接講出嚟啊......我喺你身上...見到，你好有求導者嘅特質......同潛質...嘿嘿...」特別求導者一邊踱步，一邊打量住宋文德：「嘿嘿嘿嘻嘻......」
「...」
「尋找真相嘅過程...對你而言......就係求道嘅過程......」求導者將雙手從臉上垂低，通紅嘅眸子彷彿可以穿透宋文德嘅心靈。
呢種光澤，冇「紅目」咁鮮紅、咁富侵略性。
偏近發炎同紅眼症嗰隻顏色。
「關於最近，見到第二個世界嘅事情。」
「有更...多？見到嘅嘢......要同我分享...嗄！？」特別求導者眼神充滿渴求。
「嗯，最近我見到，更多。」
「好啊嗄嗄......」特別求導者終於肯跟宋文德出去禮堂。
不過，宋文德講最近又見到第二世界，到底係真定係假。
當時，我冇深究太多。
特別求導者一走，代表我同沅彤出入嗰陣可以完美避開佢。
「你掩嘴夠唔夠力？」沅彤問我。
「你打人夠唔夠力？」我問返佢。
我哋一步一步行近禮堂後台，經過走廊終於嚟到供品庫前方。
果然如同宋文德所講，重生會財政大臣條頸係掛住條鎖匙。
「兩位好，咁夜仲未作息？」佢對我哋問好。
我用腳尖敲地面三上，等沅彤配合我同一時間發動攻擊。
「噠」
「噠」
「噠」
「嗚嗚噫噫噫──！！！」
我箭步衝前，一隻手封喉，一隻手封嘴。
可能「殺人」呢個念頭，係會無形中影響一個人，沅彤喺拎住石頭要敲落去對方個頭嗰瞬間，係目露兇光，眼神充滿住殺氣。
「呯噠」
被敲咗一下之後，對方瞳孔暴瞪！
「繼續...！」我咁叫沅彤，因為佢仲未暈。
「呯噠！！」
呢一下，連佢眉骨打斷。
佢暈咗了。