早課解散後，大家一聲不出坐喺原地，好似唔知自己本身就有自由活動同言論嘅權利，就算講嘢都要好似身處喺戲院咁細細聲，呢種感覺好怪。
呢段時間入面，我哋七個新加入嘅信徒亦逐個逐個咁被重生會高層帶去見主教。我開始想像緊，到底建立呢個教會嘅人，會係個點嘅人。
由於實在忍唔住活動室內侷促嘅空氣同異常沉靜氛圍，我行咗出去外面抖抖氣，咁啱就見到宋文德喺禮堂行出，佢好似成晚無訓咁，隻眼有少少赤紅。
「你冇訓過？」我行過去，但冇直接對住佢個人講嘢，免得引人懷疑。
「係。」宋文德都好識做，望向我嘅一邊：「你知唔知，你哋琴晚嘅對話，俾人偷聽到。」
「我...哋？我同沅彤？」
「嗯，母長一直喺外面偷聽你哋講嘢。」
「咁...？我哋宜家即刻走！？」宋文德講出呢件事時，我個心真係收縮咗一下。
因為琴晚走廊外面，明明一啲動靜都無。
而且我哋亦都特登收細音量去說話。
「你唔發現佢今朝唔見咗？」宋文德反問。
「母長......」我神情慢慢愕然起嚟，聽得出宋文德話中帶意：「你......」
「塊鏡仲未拎得到，個供品庫二十四小時有人看守住。」雖然我唔知宋文德做咗啲咩，但我都大概知道佢做咗咩事情。
我無追問「母長」嘅事，因為我知道真相......
係殘酷，係醜陋。
有好多事情，我哋都只想聽到結果。
「一定要入到去供品庫，因為除咗塊八方鏡之外，仲要搵下有冇......」我想講落去嗰陣，宋文德就講出咗。
「八赤刀。」
「你都知？」
「嗰母長「消失」之前，已經講哂所有偷聽你哋嘅內容我知，如果嗰把刀真係可以用嚟殺死兔子人......我哋就有入供品庫嘅必要。」宋文德頓一頓，說：「但我亦打探到情報，事情係指向你外父。」
「Chloe嘅爸爸？」
「母長話，你外父作為信徒，原本奉重生會命令，要去一個地方拎八赤刀，結果好似拎完之後，無上交到去重生會，所以先派另一個信徒譚國源上去你女朋友屋企，搵嗰把刀喺邊。」
「結果就撞正我返嚟，佢又搵唔到把刀......」我開始重思細想，難掩心中嘅激動：「即係八赤刀，可能唔喺重生會到，而係喺我女朋友屋企！？」
「嗯，但唔可以走住，呢到感覺上仲收埋咗好多事情，加上我隻眼見過第二個世界，我覺得事情唔係咁簡單。」宋文德瞧向後山被封鎖嘅路段：「而去了解嘅機會，就得呢一次。」
「唔係咁簡單係......？」我問。
「唔係拎把刀殺哂所有兔人，就解決事情。」
我知道宋文德唔單純係想消滅兔子人，更想嘅係知道事情嘅來龍去脈。
「你朋友好似想行過。」宋文德留意到企喺活動室門外嘅沅彤。
「沅彤？」我望見佢。
佢似乎留意到我同緊著住求導袍嘅宋文德有交流，而唔敢輕舉上前。
「你自己慢慢同佢解釋，今晚九點，男廁入面等。」宋文德返入禮堂。
宋文德離開後，我先行到去沅彤面前：「頭先嗰個，係重生會內鬼，同我係同一陣線。」我簡單解釋。