「母長，你認識一個叫譚國源嘅信徒？」我先拉開話題。
「認識，所有信徒都由我教導，佢哋執行嘅任務，亦由我幫主教傳達。」母長面無表情，語調急快：「我哋最近有委派佢去完成一件事情，但佢失去咗聯絡。」
「係？」我邊行邊問，先引導佢離開宿舍。
「去一位信徒嘅屋企，搵出「八赤刀」然後帶返嚟。」
「八赤刀？」
「我原本都唔知係咩，只係聽幫主教傳話，委派信徒去執行，但剛才......」母長回望宿舍，勾勒出詭異嘅笑容：「我已經全盤知道。」
「將一切講我知，作為交換，我可以引領你一窺「樂園」。」其實，我講嘅呢一句係廢話。
但人最想聽嘅，就係別人口中一派胡言嘅廢話。
「明...明白！！」母長著魔咁，將阿政同個女仔嘅說話內容講哂俾我聽。
我慢慢咁將佢引去教育營外，一處偏近山坡嘅位置。
母長將所有內容原封不動咁講俾我聽，我先知道世上原來仲有一把神器，係可以用嚟消滅兔子人。
八赤刀......
所以同阿政一間房嘅女仔，嚟呢到就係想睇下會唔會係重生會收埋咗把刀？如果真係，咁八赤刀最有可能收藏喺供品庫入面。
不過，母長剛才提到，譚國源本身嘅任務係去一位信徒嘅屋企，搵出八赤刀。
而據我所知，譚國源最近一次去嘅地方，就係阿政女朋友屋企。
阿政自己又喺佢外父嘅信件同電腦到發現，佢外父極可能係「重生會」成員......
咁即係，
八赤刀，
好可能喺阿政......
女朋友嘅屋企人手上。
我問，最後一個問題。
「點解要派譚國源去另一位徒屋企拎刀，而唔直接叫有八赤刀喺手嘅信徒，直接交上嚟。」
「因為嗰位信徒無準時上交八赤刀，失去咗聯絡，我就派譚國源上佢屋企睇睇。」母長望住天上昏紅嘅月色，笑一笑：「但係就連譚國源都失去咗聯絡......」
明白，
咁我都幾肯定，阿政嘅外父，
就係原本應該要上交「八赤刀」嘅嗰位信徒。
但點解，佢最後無交到？反而變成蛋。
「求導者！我可以點樣窺探......」母長企喺山坡前，快悅咁望向月光：「樂園！？」
原本我想食枝煙，去冷靜自己即將做嘅事。
但摸摸口袋，發現無帶入嚟。
我唯有以靜，去冷靜。
喺母長轉身嘅瞬間，我伸出一隻手推佢背脊，將佢推落山坡之下。
「認清......」我冷冷咁凝望佢視線，嗰一剎時間好似靜止：「你所謂嘅「樂園」，不過係地獄。」
人喺死亡前，永遠係最清醒。
我可以幫你覺悟嘅，就只有依樣。
如果上一個守夜嘅求導者，係因為睇到唔應該睇嘅嘢。
咁只能夠怪，母長佢聽到唔應該聽嘅嘢。
.
. . .
. . . . . .
「呯──」
樹林下發出沉悶嘅一響。
夜裡嘅鳥兒，都飛散而去。
我抬頭望向赤紅嘅月光，慢慢行返入教育營。
隻眼唔知點解，有少許灼痛。
明明上一秒睇到嘅事物，仲係教育營內嘅建築物。
下一秒，就忽然出現另一個地方嘅環境。
我撳住太陽穴，想要止住不明嘅痛楚。
「啊哈哈哈......」一把不明嘅笑聲，出現喺我前面。
我眼睛用力一睜，總算見得返現實世界嘅景象。
眼前發出笑聲嘅，係個掩住雙目而笑嘅求導者。
佢講咗句，令我在意嘅說話。
「你都......」佢慢慢垂低雙手，雙目流出血紅嘅液體：「見過呢一個世界呢。」
【阿政視覺】
最殘酷嘅事，莫過於一訓醒發現自己唔係身處喺夢境嘅人。
我起身嗰陣，沅彤已經一早醒咗，坐喺張床發呆。
「早晨...」我說。
「早...」佢望望我，說。
我行出房，去睇一睇個天，宜家應該係清晨。
但教育營內，已經有一部份信徒喺到活動緊。
我無記錯嘅話，一陣朝早應該有早課？
不過出奇地，嗰個叫母長嘅人無嚟到，亦無人做任何安排，好似放置住我哋喺間房咁。
於是乎，我又同沅彤傾起計。
「訓得好唔好？」我問。
「唔係太舒服，成晚好似俾人監視住。」
我都時常有呢種錯覺。
一段時間過後，宿舍嚟咗第二個信徒。
佢同我哋交代母長唔喺到，所以會由佢代課。
我哋堂課，主要係「認識重生會」。
佢喺間小小嘅活動室入面，同我哋講述教會一啲事情。
例如，點樣真正進入佢哋網頁，方法係要輸入一組特定字碼──「20030164」。
雖然數字嘅含意係咩，佢並無詳細講述。
總言之，學識咗一堆毫無意義嘅特別名詞，外加一堆強行填塞嘅解釋。
而且，佢哋依然係無提到「兔子人」。
「中午時間，你哋都可以見主教一次。」冗長嘅早課結束後，教我哋嘅人咁樣講。