外面嚟嘅一群人，佢哋都捧住一大煲鍋，應該就係今日嘅晚餐。其中一個男人，佢身高兩米，戴住個兔仔樣嘅紙面具，感覺有少少詭異。
「呢位係「父長」，佢係負責營內一切雜務，好受大家尊敬。」母長向我哋介紹嗰個兩米高嘅男人。
時間去到七點半咁上下，終於食得飯。所謂嘅晚餐，就係熱飯配上爛溶溶嘅奇怪芡汁，外加一塊午餐肉、一隻煎蛋，真係食之無味。
食飯期間，有一位新加入嘅信徒向母長發問：「我想問下......求導者佢哋唔需食飯？點解唔一齊過嚟食。」
「求導者每日只需要喝一水一麥、食一米一麻，就足夠維持需要。」母長用一個溫馨嘅面容，講出一啲都唔正常嘅說話。
一水一麥？
一米一麻？
咁樣宋文德應該好快會死......
難怪每個求導者睇落都甩皮甩骨，瘦骨嶙峋咁。
母長補充：「要成為「求導者」，遠比你哋想像中困難，因為佢哋係受選可以獲得重生之人。」
正當其他信徒食得起勁，白飯扒完又扒嗰陣，只係得我同沅彤食晚飯咗幾啖。身處喺令人不安嘅環境，食欲都唔會好得去邊，更何況係重生會俾嘅食物。
飯後，我哋最先返去宿舍，嗰陣經已八點左右，除咗營地有少少燈火之外，其餘地方都係暗夜嘅叢林，貿易出去就肯定會迷路。
「你好似無點食過咁。」我坐喺張床，說。
「跪到攰，無胃口。」沅彤望住地下，再望向我：「但就算有胃口，都唔會食佢哋嘢。」
「同你一樣。」我點點頭，好高興有個思想正常嘅人同房。
「我去沖涼先。」
「嗯，我一陣先沖。你女廁喺右邊嘅走廊盡頭，小心遇到啲奇怪人。」我提醒佢。
佢抿一抿嘴，就出咗去
男浴室就比較近，行出房轉個彎就到，佢就要行到走廊盡頭。
但其實有得沖涼，你都會無沖涼嘅意欲，事關宜到得冷水用，我出去沖涼入到浴格嗰陣都諗住速戰速決。
「噹」某個人嚟咗男廁，入咗我隔離嘅浴格。
不以為然嘅我，繼續用凍水洗頭。
「政？」原來浴格隔離嗰條友，係宋文德。
「宋文德？」我回應。
「搵咗你好耐，暫時有冇咩情況出現。」
「無...咩兔子人嘅線索都未有。」我說。
「我全日行出行入，已經大概摸清呢個教育營嘅地圖。」宋文德喺上高遞咗張紙俾我，說：「你喺呢到記好地圖之後，就用水沖爛佢。」
我接過宋文德手畫嘅地圖，上面粗標明咗其他地方係咩嚟，包括有禮堂、禮拜堂、貢獻品室等等。
「宋文德我有啲嘢對唔你住......」我有啲難以啟齒嘅感覺：「塊鏡，宜家喺重生會身上，佢最後一關要我交出身上最珍貴嘅物品，個求導者好似有天眼通，知道我塊鏡最貴重。」
宋文德靜咗一陣，答：「我夜啲幫你嚟返。」
「你拎到？」宋文德講到好似入自己廚房咁。
「塊鏡唔可以失去，我會幫你睇下點拎返。總之喺呢個教育營，必要時我會提你逃走。」
「仲有......聽講你係無晚餐食？」我多問一句。
「有，一粒米、一粒麥。」宋文德嘆一嘆氣，說：「夜啲我會搵下有冇其他嘢食。」
喺浴格短暫交流完後，宋文德就離開呢到，睇嚟佢係專登嚟宿舍搵我。
我自己沖完後，用毛巾抹乾身就返去房入面準備作息。
大半夜，手機唔喺隔離，就好似無咗一部份安全感。
空蕩蕩嘅房間，令我無心入眠。
沅彤雖然比我早去，但比我遲返。
好彩今晚呢間房到，唔係得我一個。
如果唔係無鬼都俾我諗到有鬼。
時間一點一滴流逝，外面經已毫無人聲。
間房靜咗良久，沅彤無啦啦出聲：「訓咗？」
「未...」
「你都訓唔著？」