第七關，直接同我哋溝通嘅人，係求導者。
「最後一步，你哋要學會奉獻，更要係無條件地。」求導者伸出兩隻手，說：「將你哋身上最珍貴嘅物品，交俾我。」
「......」我同女仔都怔然。
「我好清楚，你哋身上最珍貴嘅嘢......嘻嘻嘻。」求導者就好似有對會看透人嘅雙眼。
「係...？」我首先俾咗張五百蚊大鈔佢。
但佢無接收到。
然後，我又將成個銀包連錢放落佢隻手，當中唔包括身分證。
微笑住嘅求導者，又搖一搖頭。
另一邊， 女仔佢學我放咗銀包落佢隻手，睇嚟大家對珍貴嘅定義差唔多，都係錢。
「你哋肯定仲有更視為珍貴嘅事物......」求導者一邊行近我哋，一邊口中喃喃唸。
佢用一雙枯乾、灰暗嘅手摸向我袋口，從入面拎咗塊鏡出嚟......
「呢塊......好鏡！嘿嘻嘻嘻。」求導者咧嘴笑起。
點...
點解佢會知道！？
我塊八方鏡......
我愣然之間，求導者問我一次：「塊鏡要奉獻出嘛？嘿嘿嘿嘻嘻......從你嘅表情，已經睇得出有幾珍貴。」
我身邊嘅女仔望見到八方鏡之後，反應都幾乎同我一致，愣然無比。
「八...方鏡？」個女仔，居然講得出塊鏡個名！
我同佢對望咗一眼，大家眼神中似乎都隱藏住一啲秘密。
「唔交得......」女仔好細聲咁講。
「我...」我仲猶豫緊。
「你有三秒時間。」求導者張嘴一笑，露出泛黃嘅牙齒。
唔交嘅話......
啱啱所做嘅一切都會白費......
一諗宜到，我忍痛交出八方鏡。
但同樣令我在意嘅係，個女仔知道八方鏡為何物。
只見佢一見到我交出八方鏡後，眼中滿懷住不捨咁睇住塊鏡被收入求導者袍內。
「通關。」求導者喺我張遊戲卡上吸最後一個印：「你係第一個成功完成挑戰嘅人，今個「家庭日」第一個「信徒」，往後嘅求導路上會係更困難，更艱辛呢嘿嘿......」
「到你。」求導者將視移向女方。
「我......」女仔回神。
「我都知......你身上最珍貴嘅事物......」求導者又行去佢身邊，喺佢身上打量：「你自己都應該清楚......」
女仔佢芳齡廿四左右，輪廓可以用清雅形容，身形都叫俾一般女仔高少少，難道宜個求導者想......
突然！
求導者從袍內拎出交剪，一下向女仔嘅後頸方向刺去！！
「嘶」的一聲，秀髮應聲散落。
女仔用紅髮繩紮住嘅馬尾，俾求導者用交剪一刀剪咗落嚟。
「願意奉獻出？」求導者問。
「......」女仔仲呆住，點一點頭。
「嘿嘿...」求導者將女仔嘅髮尾連同紅髮繩，一同收於袍內。
求導者幫佢吸印之後，緩緩轉身返入前方一橦兩層高，白色外牆嘅禮堂中。
「無嘢......可以瞞過我眼睛啊......」求導者掩住雙目，似笑似哭咁離開：「啊哈哈啊啊......」
我同女仔，都呆呆企喺原地，似乎仲有啲震驚。
咁係因為對方真係好似識讀心咁.....
將我哋身上最珍貴事物，被「奉獻」走。
「恭喜你兩位，正式成為重生會嘅「信徒」。」嗰位中年女課長，又再次行到我們面前，笑意盈盈咁向我哋介紹：「可以叫我做「母長」，你哋今晚可以喺前面嗰間宿舍住宿一晚，夜晚我哋會安排你哋見主教。」
「...」我同佢，依然未能講得出嘢。
「知道？」母長溫馨地再問一次。
「知道...」我哋異口同聲。
挑戰過後，我哋兩個不發一言，驚魂未定咁行往宿舍方向。
嗰到係只有一層高，但係面積大概有學校一整層課室連埋一齊咁大。入到宿舍前要拉開一道玻璃鋼門，而入面係一條冷冰冰嘅長廊，格局真係好似課室咁，分咗唔同房間，而宿舍兩邊盡頭就分別係男廁女廁。
走廊嘅燈光雖然係白色，但燈力好弱，令到走廊某啲位置都係偏暗。