「你跟住大隊行。」宋文德匿喺一旁，無人見到嘅位置。
「你做咩？」
佢開始除自己件西裝同戴上吊咀，原來宋文德一早將件求導袍著咗入西裝入面，難怪睇落咁厚重。
「我會自己混入去，你自己執生。」睇嚟宋文德又要扮求導者。
「好...」
就係咁，我短暫同宋文德分開先。
我回一回頭望下泊車處，奇怪緊點解泉叔嫁車無跟嚟。
入去佢哋嘅正常版「樂園」前，仲要俾張遊戲卡看門人核對，保密功夫可謂做到足。
不過「重生會」搞呢一次聚會目的係咩？
我諗應該都有佢哋嘅目的。
入到去信徒們各有各玩，我先喺園內逐一觀察。
有啲小遊戲係唔關遊戲卡嘅事，但就有暗中洗腦嘅嫌疑。
例如，有個射靶嘅遊戲，宣傳圖係一隻兔仔拎住把槍瞄準住獵人。
雖然畫風係卡通，但就係有種說不出嘅詭異感。
而呢到嘅成員，都幾乎清一色係著白色衫，令到著襯衫嘅我顯得有啲格格不入，仲好似惹人注目咁。
如果可以嘅話，我都想換件白色衫。
「赤神赤神紅神目......」
唔知邊個突然唱宜呢首歌，令到我個心離咗一離。
我向歌聲來源望過去，係一個家庭主婦喺到唱緊。我行過去睇，先發現原來唱呢首歌係第一個遊戲卡挑戰，唱完成首就可以吸一個印。
嗰位家庭主婦略略唱完之後，遞張遊戲卡俾職員：「係咪可以吸個印啦？」
總係笑面盈盈嘅白衣職員，心情好似十五十六：「呃，好似唱錯咗一句，不過我都照......」
「唱...唱錯咗！！」突然間，攤位後面嚟咗個神色繃緊嘅男人：「係赤日赤日！！！」
睇佢嘅衣著，同佢嘅吊飾......
佢係一名求導者。
佢咁樣喝一喝法，成個場嘅歡樂氣氛一時間變得安靜。
「唔好意思，你挑戰失敗......」白衣職員見到求導者出嚟指證後，就轉口風講。
「喔......唔緊要。」家庭主婦尷尬咁拎返張遊戲卡。
然後，一切如常。
咁樣睇一睇，每個攤位嘅後面，原來都有求導者睇場，但同參加者溝通嘅，最主要都係會內嘅義務員工，即係好似譚國源嗰種身份咁。
呢到四面環山，場地就好似一個年宵嘅小維園咁。從遊戲卡上見到嘅關卡睇，數字越係高嘅關卡，攤位擺放嘅位置就越係深入，人流亦相對地稀少。
轉眼間，我已經無意見到嗰個年輕嘅少女，一個人企喺第五關遊戲攤位到。
「咁快...？」我有啲愕然，因為佢可以算係第一個挑戰到求導第五關嘅人。
第五關內容，生吞雞蛋。
到我抬返頭嗰陣，嗰女仔已經一手將雞蛋打碎，仰頭吞蛋。
蛋液慢慢流出嚟嗰下，我有十萬個不願千奇唔好係紅色嘅血漿......
好彩...
最後流落嚟嘅係正常嘅黃色蛋黃，但呢一幕都足以令我不忍直視。嗰女仔強行吞食完雞蛋後，遞張遊戲卡俾工作人員吸印，行動完全係似有目的性，而唔係享受緊重生會呢個所謂嘅「家庭日」。
因為佢比較特別，我期間一直留意觀察住佢。
見佢吞完蛋一陣過後，就跑咗過去遠處一個垃圾桶嘔吐，我諗佢都唔係太頂得順。佢嘔完之後，輕微咁喘氣，坐喺一張長櫈上休息。
「要唔要枝水。」我行過去，俾樽水佢。
佢望一望我，無任何表情轉變：「唔洗，唔該。」
我扭開樽水，離口飲咗啖：「樽水我喺出面帶入嚟。」
我咁樣講一講，佢又盯我一眼，但今次拎咗樽水：「唔該。」但佢唔係拎嚟飲，係拎嚟漱一漱口。