「咁的確幾奇怪，我打兔打咗二十年都有，兩隻兔出現同一個地方，第一次見。」
「所以，我都懷疑係將個守夜嘅求導人掉入水井之後，觸發咗某種......事情？」我推測完，再追問：「係喎泉叔，我有啲嘢想問你......你到底係點追蹤兔子人？」
「......」泉叔依啖飯，嘴嚼得特別耐：「你未到宜個級數，聽咗都無用。」
「講下都得嘅。」
「講咗你就會衝動。」泉叔講得淡然。
「其實你係咪唔鐘意食燒味飯？上次又係見你食下食下咁，但係食得過半盒都無。」我見泉叔好似食之無味咁。
「嘿，我呢啲山區人食慣啲野味，點同你哋城市人，啲嘢淡到咁。」泉叔都唔再掩飾，蓋低個發保膠蓋。
「話說......鎖羅盆村，係你家鄉？」我問。
「係，不過係我老豆個代，我出世嗰陣已經搬咗去第二個山區住。」
「居然...！？唔怪得知我喺外村見到有個神主牌，係寫住「周白」同「周水」，估唔到真係你屋企嚟......」
「我幾乎無點返過去，嗰啲神主牌都係我死鬼老母放。」泉叔說。
泉叔見我食完，就企起身：「政仔，帶你學啲狩獵技巧。你有嗰塊神奇鏡，加埋我嘅技巧，就萬無一失。」
泉叔去廚房拎把刀，帶我去到相對空曠嘅公屋走廊。
「政，你當我係兔子人，而你拎住把刀，你會點做？」泉叔交把刀俾我。
「我...」我作勢揮斬幾下：「應該會一嘢斬落你到？」
「然後？」
「再斬、再斬...再斬，直到你反抗唔到。」
「咁你就錯，狩獵應該針對獵物嘅弱點去作出攻擊。」泉叔一手搶過我把刀，我完全反應唔直：「你一用刀，要攻擊嘅地方就係頸、關節、手肘仲有眼，仲有用插，唔好用劈。唔好為咗阻止佢埋身而劈兔子人，咁係無用，你更應該學識下閃避。」
泉叔咁樣講一講，突然覺得自己攻擊好無效率。
「然後兔子人佢嘅其中一個特性，係耳朵好靈敏。」泉叔戳住我胸口，十足魔鬼教官：「我要你手機又好、鬧鐘又好，隨身帶一個可以發出極高分貝嘅物品喺身，用喺脫身到。」
「明白...」
「仲有我最鐘意嘅嘢──汽油彈，呢樣我諗係對兔人造成最大傷害嘅嘢。最好就直接喺佢身上淋油，再用打火機點火，明？」
「明...」
我隻耳聽得明，但我都知有啲嘢，
係要真係做過，先真係明。
「咁點樣殺佢哋？」我問出最了當嘅問題。
泉叔笑咗笑：「好遺憾，暫時無方法殺得死佢哋。」
「......」
「好似我間屋嗰隻咁，困住佢一世，已經算係最接近嘅方法......殺死佢嘅自由。」泉叔過嚟拍下我膊頭，說：「唔好諗殺唔殺到，你宜家嘅目標係搵出兔子人嘅巢穴，救返你女朋友。」
「Chloe佢到底仲......」
泉叔打斷我說話：「佢哋會儲食糧。如果唔係，點會四年出嚟獵食一次？你宜家最好希望佢哋唔會當你女朋友同佢屋企人係零食咁，隨手放入口過下口癮就得。」
泉叔略略教完我一啲基本嘢之後，我自己都喺間屋拎把刀練習。因為我都係個短期嘅獵人，佢只係教我最易嘅嘢，過份複雜例如佢之前夾傷過我嘅捕獸器陷阱，佢就無教。
但總體感覺上，泉叔教我嘅嘢好似仲係有所保留。
兩日後。
我哋一齊出發去「重生會」家庭日嘅集合地點。
至於譚國源，宋文德就用求導者mode，叫佢喺屋企每分每刻都持續跪拜，但臨踏出屋企之前，泉叔都係覺得唔安全，於是又將譚國源五花大綁。
地點上所講嘅龍尾村公所，其實我都唔太知邊到嚟，但有老司機阿泉叔負責開車，又有唔知點解會勁了解嗰到歷史嘅宋文德做旁白，我都叫對嗰個地方有少少初步印象。
簡單啲嚟講，即係比華利山別墅嘅右上方。