「好好去你嘅「樂園」，享受極樂。」宋文德向井底下已死去嘅求導者講。
「已經五點幾......」我望一望手機，嘆咗口氣：「呢晚...好似特別長。」
更加無諗過......
會以殺人作收場。
「淋咗咁多雨，希望唔會病。」宋文德仰望天空。
突然...
井底下有啲動靜。
一聲極長極響亮嘅刺耳聲音，從井下傳出......！
陣陣不祥嘅惡意，爬上我嘅脊椎，令我全身毛髮都豎起。
我認得，呢把係兔人嘅嘶叫聲！但就遠比我以前見過嘅兔人，嘶叫得更為響亮，猶如魔音刺入我嘅耳朵......
「啊嗄......」我好辛苦咁撳住兩隻耳，想隔住聲音。
「唔通佢變咗兔人！？」宋文德即刻拎手機照住井底。
求導者條屍無發生任何改變，但兔子滿懷惡意嘅嘶叫聲就傳遍整個山頭。
倏地，井底下發出慢慢冒出鮮艷嘅紅光，成個山頭都喺到震動......
不明嘅地震引致到草樹欲搖，葉子不停飄散喺空中，再降落到地上，
「發生咩事啊！？」我大喊。
下一秒，井底亮出強烈嘅紅光！
宋文德立即用手掩住視線，離開水井範圍：「我都唔知咩事，不過......依家最好走！」
我捉住仆低嘅宋文德起身，然後一齊逃出鎖羅盆內村。
跑入叢林前，我回頭望鎖羅盆內村最後一眼......
水井下，亮出赤紅嘅光芒。
「你見到井底啲咩？」我跟實宋文德，因為得佢識路出去。
「我諗......我見到第二個世界。」宋文德喘氣喘得好快。
「咩意思......」
「我諗...就係佢哋所講嘅......」宋文德心有餘悸，吐出宜隻字：「「樂園」。」
「......」我又再回頭多望一眼內村。
山搖地動並無停止，一直持續到我哋跑出草叢，去到外村為止。
途中更因為泥地濕滑，我哋各人都仆咗一兩次，長褲都俾樹枝勾爛。
逃到外村後，震盪嘅感覺雖然退去，但係雨勢落得更加之大，就好似呢座山，呢個天，都唔想俾我哋兩個喺黎明之前離開到。
就彷彿，
得罪咗神明。
狼狽嘅我哋，走入外村其中一戶家庭入面坐低。
由宜家開始，每滴雨都似針咁，打落塊臉都會痛，而能見度亦縮短到三米以內，其餘範圍一切都係濃濃嘅雨霧。
「你ok？仲落到山？」我見宋文德有啲分神。
「可以...」宋文德抹一抹眼鏡上嘅雨水，說：「只係我個腦不斷浮現緊，啱啱見到嘅事物。」
「...」
「話唔定...」宋文德將頭緩緩抬向我：「真係有第二個世界。」
「轟隆──！」
外面連續劈出幾道狂雷，天空不斷閃爍，但更令人震驚嘅係......
「政...政！」宋文德雙眼盯實門外，不斷拍我隻手：「出面！」
有個沉沉嘅影子，喺泛濫嘅雨勢下走向屋子呢到。
隨著來者走近，影子亦開始成形，只見佢頭部有兩塊豎立嘅大耳朵......
然後，冒出一雙鮮紅嘅目光。
「兔...兔子人...！」
兔子人嘅身影逐漸納入眼內，只見佢全身皮毛經已濕漉漉。
「合埋眼啊！」宋文德提醒我。
及時嘅合眼，令到我唔洗變成復活蛋。
聽腳步聲，兔子人似乎意圖入屋，我同宋文德都望住地下做人，而兔子人亦都經已走到屋子嘅入口前，企喺到望住我哋。
感覺只需要一下嘅風吹草動，佢就會不惜一切撲向我哋其中一人。
「嘶！」
宋文德成為咗目標！身高接近兩米嘅兔人，衝向咗宋文德。
拎住狩獵刀嘅我，毫不猶豫擋喺宋文德前面，再用刀喺佢身上狂砍。可惜佢有堅韌嘅血肉之軀，我嘅斬擊最多做成佢幾下僵硬，講到真係要撕殺......