重生會口中「樂園」嘅概念，我估就同基督教話會上「天堂」嘅概念差唔多，都係一個極樂淨土。
我開始有啲佩服，宋文德嘅處變不驚。
「你點解闖入禁地......」對方仍然帶有懷疑。
「因為...」宋文德頓一秒，續說：「會內教主叫我嚟搵一樣嘢，一塊鏡，你有冇見過。」
「無...」
「咁你喺到做咩。」宋文德反客為主。
「守夜......」求導者愎慢行出寺廟，去返水井嗰邊：「防止，有凡人進入樂園。」
「樂園......」宋文德盯住水井，可能同我諗法一樣。
重生會口中所謂嘅「樂園」，就係喺井底之下。
加上從影片上見到，佢哋進行吟唱時，都係圍繞住內村嘅水井，通常宗教上嚟講，被圍繞住嘅事物往往都係主角。
「嗰個人，佢真係犯咗大罪。」突然，宋文德指向寺廟內嘅乾屍。
亦即係拍攝者。
「中斷...儀式進行......」求導者用力吐出一四隻字：「罪無可恕。」
宋文德一路透過誘導性說話，引出求導者講咗唔少資訊。
「你今晚有冇事情，要回報俾重生會聽？」
「有異類意圖接近「樂園」入口。」求導者瞪向我。
「做得好，順應規條。」說畢，宋文德就行返去我身邊，點起一枝煙。
狂風暴雨依然。
負責守夜嘅求導者，依然企喺水井一旁。
「佢唔會立即對付你，但俾重生會查出你底世後，你都會好危險。」宋文德呼出一口煙，續說：「個拍攝者，應該都係因為中斷佢哋儀式進行，先落得即時處死呢個下場。」
「咁點...」
「你應該知自己要點。」宋文德望向我。
我低頭，望向自己把狩獵小刀。
佢意思...係叫我殺人？
「得你有武器。」宋文德淡淡一笑，完全冇當殺人呢個話題係一回事咁。
果然，我猶豫緊。
「......」
今次宋文德食得特別快，並且好順手咁彈走煙頭：「借把刀嚟睇下。」
我不以為然，將把刀交咗俾佢，然後繼續決擇緊到底殺唔殺眼前呢一個，我幾乎唔認識佢，更加同佢無怨無仇嘅求導者。
即使佢同我女朋友件事有啲關連，我都唔可能......
等等......
宋文德...做緊咩？
佢...拎住把刀，慢慢行近求導者。
「赤日赤日紅神目......」宋文德一邊走近佢，一邊講。
「我等願意奉上......！」求導者哇啦一聲，痛苦咁撳住腹部。
宋文德......
一刀插咗入求導者個肚到。
「性命。」宋文德插一刀唔止，一隻手撳住對方背脊，一隻手不斷將刀插入佢腹肚位置。
直至求導者口含鮮血訓喺地下，先一刀插頸終結依一切，
由於山區嘅環境，真係一啲外來嘅污染光都無，加上落緊大雨.所以能見度真係極低，如果唔係，相信求導者見宋文德拎住把刀行過去嗰陣，已經逃走或者反抗，「你...你你...真係......殺咗佢！！？」我知道已經發生咗，但我都仲係好驚訝。
「唔殺佢，我同你就變做被掉落井嘅嗰個人......」右手沾滿血嘅宋文德，將把刀還返俾我：「俾返你。」
我拎返把刀，期間留意到宋文德嘅眼神。
我之前話過佢有另一面，我確信，
佢宜家嘅眼神，就係佢嘅另一面。
大雨滂沱下，宋文德蹲低身除走求導者嘅黑袍同吊咀。
「毀屍滅跡。」宋文德將吊咀收好入袋：「一齊掉佢條屍入井。」
事到如今，只可以咁做......
只可以怪，呢個求導者佢見到我哋嚟過。
「三、二、一。」
.
. .
. . .
「呯──」
我哋兩個合力將求導者條屍掉入井中。
但無諗過......
宜個行為，居然會招嚟無法想像嘅後果。