我同宋文德成功趕喺變成落湯雞之前，入到鎖羅盆村，外村。
去到嗰陣，已經得返兩、三個零仃行山者準備走。
我同宋文德求其匿入一間屋到避雨。
「睇怕都要落成幾粒鐘。」我見個天烏雲密佈。
「唔緊要，宜啲情況我都遇唔少。」他說。
雖然呢到係間荒廢嘅村屋，但係日常用品同傢俱仲喺到，而增添咗一絲嘅詭異。
「我哋休息下先。」宋文德搵咗張木櫈坐。
而第一次到來嘅我，就周圍望嚟望去。
其中一間屋入面，牆壁上掛住幾把弓，特別吸引我注意。無意中，我又望到呢戶人嘅神主牌，分別係叫「周白」同「周水」嘅男人。
唔知點解，呢兩個名總係令我諗起啲咩咁。
「呢戶人，就係姓「周」嘅鎖羅盆外村獵戶。」宋文德見我望我入實，就一旁講解。
我想休息個陣，見到張木櫈太多蜘蛛絲，所以拎咗把狩獵小刀出嚟，想挖走佢。
就當我挖咗一下，我個腦就突然諗起，泉叔都係姓周......
而且「周白」同「周水」佢兩個嘅名，合起上嚟就係個「泉」字，呢家人又係做獵戶，莫非就係泉叔老家？
正當我為名字感到好奇時，見到宋文德行出屋簷外，將雙手伸出接住雨水，然後飲入口。
我都有樣學樣，行出去大開個口，對住個天，直接等雨水跌入我個口。
「政，你話你要救你女朋友，係咩一回事。」呢個時候，宋文德問起。
我仲未曾同宋文德講過呢件事，所以喺呢個小空檔我講咗來龍去脈俾佢聽。
「原來宜個......就係你咁執意要殺死兔子人，唔選擇避到春天嘅原因。」宋文德恍然大悟。
「就算...就...算，唔後真係救唔返......我都要消滅兔人。」講出宜句時，我算係狠下心腸。
宋文德托一托眼鏡，輕輕打量咗我一下：「到真係面對兔子人嘅時候，你真係有咁嘅決心？」
「......」我望住宋文德。
「唔好咁快回答我，諗清楚。」宋文德停一停，續說：「我會根據你嘅答案，而決定之後嘅回覆。」
我合埋眼，諗咗一諗。
女朋友失蹤、父母被殺，自己亦面臨受詛咒嘅下場。
我嘅選擇，
只有一個。
...
「只要世上有佢哋呢啲兔人嘅存在，我就會趕盡殺絕。」
「...」宋文德一怔。
「嗯，我明白。」宋文德點點頭，說：「呢個，算係你對我嘅承落。」
「......」我望住佢。
「咁我就放心，將嗰樣嘢交俾你。」
「嗰樣嘢？」
「之後我哋要入鎖羅盤......內村。」
六時正。
依然急風暴雨，樹木都東倒西歪。
宋文德帶我通向一條無道路通去嘅地方──鎖羅盤內村。
行去嗰到，需要闖入呼呼作響、樹影婆裟嘅樹林。
相信喺到稍為跟失咗宋文德，就會立即迷路。
「轟隆──！！！」
雷電響徹，彷彿一個危險嘅警號。
跟宋文德行咗大概十五分鐘，前方依然係一片草叢綠木，令我不禁開始生疑，但我暫時都係堅信住宜個人。