宋文德又俾人打斷：「......卡邦尼意粉，唔該。」
「我唔洗啊。」我有啲不耐煩，對侍應講。
「一旦直視過「紅目」，就代表你中咗詛咒。」
「詛...咒...」我全身上下漸漸覺得毛骨悚然。
「呢個詛咒，會令直視過嘅人喺一段時間內「蛋化」。」宋文德咁樣解釋：「「蛋化」，即係身體結構會退化成一隻類似復活蛋嘅外表......」
「但點解我...」我明明直視過。
「你直視過，但係無事？」宋文德知我想講咩。
「係。」
「嗰陣時，隻兔子人有冇咩特別？例如驚慌、受傷之類......」
我沉默半晌，說：「我偷偷喺佢背後，向佢條頸插咗一刀。」
「嗯，應該就係宜個緣故弱化咗佢，令你救咗自己一命。」宋文德飲啖黑啡，講落去：「但唔代表咁就結束......」
「......」
「兔子人唔會放過任何俾佢用「紅目」直視過嘅人類，因為喺佢哋眼中，佢哋即將會成為美味嘅食糧。」
「但點解佢哋可以知道我父母住喺邊......」我逐漸握實拳頭。
除咗跟蹤我，根本無宜個可能。
但當時我係朝早去到屋企，兔子人點暴露喺日光之下？
「唔排除......」宋文德托托眼鏡，說：「俾佢直視過嘅人，身上都會散發某種分泌或者氣味，去吸引佢哋跟蹤，根據舊時非官方一啲資料文章記載過，當受詛咒嘅人越係絕望、越係悲憤，化蛋嘅時候就會越美味，味道更濃郁。實際上係依咩根據係推論？我暫時答你唔到。」
「即係真係我害死咗......」我用力打咗張檯一下，難以壓抑情緒。
「冷靜......你咁樣，對佢哋而言只會越嚟越美味。」宋文德捉住我隻手，說：「咁佢哋襲擊你嘅機率，就會大大增加，你只要捱過今個春天就安全。」
「我知你可能有親人遇害，但你宜家面對嘅......」宋文德一貫地，保持理智：「係一種非人生物。」
「我可以相信你？因為...我唔係要逃避，我係要對付兔子人，我要搵返我化蛋嘅女朋友。」我好堅決咁同宋文德講：「既然我喺女朋友屋企搵唔到任何蛋殼碎同血汁液，咁代表佢無即時俾兔子人食落肚！？」
「的確，的確係有方法對付兔子人。」
「......」
「但條件極為苛刻，但宜個之後再講，我介紹返自己先。」面對焦急嘅我，宋文德先不緩不急咁介紹自己：「我係一個民俗學家，研究咗香港嘅民俗學好多年，其中最令我在意嘅，就係「兔子人」。」
「民俗學」同「兔子人」，好似完全拉唔上關係。
但我都即管聽埋佢講，因為眼前嘅宋文德睇落係可信。
「兩者之間有關連？」
「當然有，畢竟「兔子人」並唔係接觸化學物品基因突變、都唔係天降外星人而嚟，佢哋嘅起源可以追溯返三、四十年代嘅香港。」
「咁遠？嗰陣你都未出世......」
「的確係。」宋文德抿嘴一笑，得體咁食一口意粉：「但我屋企人，我父親都係個民俗學者，我宜家嘅研究，比較珍貴嘅一部份都係繼承佢以前得落嘅史料，包括對付兔子人嘅真正方法。」
「係？」
「我諗呢到講嘅話，同上堂無分別，會太沉悶，哈哈。」轉眼間，宋文德竟然已經食完成碟意粉：「我帶你去現場實地考察，你感受會比較深。」
之後個半日，宋文德搭小巴帶我到烏蛟騰，然後再行一段極之長嘅山路。