我跌咗部手機落地，因為隻手顫到捉唔實。
係...
兔子人...。
「政...咩事？」泉叔察覺到我異樣。
「兔...兔...子人...」我不自覺咁，軟坐喺梳化上：「去咗，我屋企人到......」
泉叔皺一皺眉，拉起我手臂：「起身，你屋企喺邊？」
「樂...富...」
「去救你家啊！」泉叔拉起完全崩潰嘅我。
我真係再承受唔到......
多一個身邊嘅人離開。
「係...係...」我好下意識咁拎出泉叔俾我個把狩獵小刀衝咗出走廊，而佢就跟喺我身後。
車上，我諗過數百個可能。
兔子人食緊我父母？兔子人殺咗我父母？兔子人、兔子人、兔子人......
我宜家滿腦子都係兔子人，嗰個毛茸茸嘅形象，好似夢魔咁喺我腦海揮之不去。
泉哥以近乎衝紅綠燈咣駕駛方式送我到樂富，車都未停好我就急住開門要落地，搞到差少少仆親。
「政！唔好咁魯莽啊！」泉叔叫住我。
我不顧一切衝入大廈，連保安都嚇到。
「咁耐嫁......」我咬牙切齒，喺升降機門前等候。
「阿...阿先生，你係要去邊層？把刀你要唔要收好先？」看門嘅保安主動問。
「有冇見到一隻兔人入嚟！！？」保安一問我嘢，我反而問返佢轉頭。
「呃，兔人？」
「有冇啊！！？」
「呃啊啊......」保安成個身縮到講唔到嘢。
拎住獵槍嘅泉叔，即刻過嚟解圍：「政！冷靜啲啲......」
陣陣嘅無力感，強襲我全身。
升降機門一開，我即刻行入去撳自己屋企嘅樓層。
同時間，泉叔跟入嚟一邊上子彈，一邊監測住我情緒。
「就算見到兔人，你都唔好亂咁衝過去......」泉叔提醒我。
「我唔理啊！」我用力亂砍道門兩下，去發洩情緒。
「叮」到達樓層。
如同出閘嘅賽馬，門一開我就狂奔到父母嘅單位，行到過去就見到門係半虛咁開住......
「老豆！阿媽！！」我推門入去，橫視客廳。
但無任何人回應我......
到我慢慢推開門，入去佢兩個嘅睡房先，理智終於崩潰。
因為喺佢哋間房嘅床上，
有碎裂嘅蛋殼同血淋淋嘅黏液。
「啊啊啊啊呀呀！！！！！」我悲憤交加跪咗喺地上，用盡力大叫。
因為除咗咁，我無任何方法釋放自己情緒。
「頂住啊，細路......」泉叔下半身俾隻腳我扶住，上半身就警戒住周圍情況。
「泉叔！！佢哋死咗未啊呀！！！」我捉實佢隻腳，問自己父母生死。
泉叔望住一地嘅污跡同狼藉，無答我任何一句，只係輕輕拍我背脊。
「佢去咗邊呀！兔人去咗邊呀！！！」我已經係用情緒去行動。
突然，我被一塊白毛巾掩住口鼻，一呼吸即刻俾一陣濃烈刺激嘅氣體衝上腦，直接整暈成個人。
呢個，係我喺屋內最後嘅意識。
「咕」
最後聽到嘅，
仲有飲嘢嘅聲音。
我醒返嗰陣，已經喺嫁車上面。
微微嘅涼風，輕拂我嘅臉龐。
我模糊咁望住前方嘅街景，幾想呢一切都係場夢。
「醒咗？」一旁主駕位嘅泉叔，問。
「......」
「呢個，係我唯一為你做到。」泉叔俾塊包住咗某樣嘢嘅布我。