無端，我諗起「重生會」嗰三個格言，於是行入房喺譚國源面前講出。
「出生。」
「...」
「再生。」
「......」
「重生。」
「弟兄......誰人指引你到來？」譚國源出聲了。
聽到佢講嘢嘅泉叔，差啲咽親。
「我係洪家嘅一員，洪善瑜嘅細佬。」無錯，我喺到扮緊細佬，我女朋友一家姓洪。
既然「重生會」寄信俾佢哋，又得悉佢哋每一個家族成員嘅名，咁雙方應該都同呢個教會有所聯繫。
而當日，譚國源喺間屋無拎走啲蛋，而係入屋周圍望嚟望去，咁我估計佢係「監測」緊某啲嘢。
「儀式...未...完結...？」年過五十嘅譚國源咳咗幾聲，續說：「你應該......化蛋......」
聽到「化蛋」一字，我同泉叔都不經意咁睜大咗眼睛。
但理智壓制住我哋，要慢慢，唔可以急。
「儀式...？」我續問。
「果然......遺留咗你。」譚國源繼續講啲，無人明嘅說話：「跟你家人...一同前去「樂園」，一端吧嘻嘻嘻哈哈哈......」
譚國源突然流露出詭異嘅笑聲。
「......」我無法言語。
泉叔聽到佢笑之後，反而替我嬲埋一份，決定起身出手。
「你仲有腳甲。」泉叔蹲低，拎出摺疊刀反開佢塊腳甲。
「咔──」
「咔咔──」
「呀呀呀！！！！」譚國源嘅嘴巴，即俾泉叔用牛皮膠紙封上。
時間去到深夜十一點。
譚國源雙腳，都已經失去所有腳甲。
泉叔一個人喺洗手盤到洗手同抹刀，我就坐喺梳化上思考，思考兩者嘅關連。
儀式...
莫非「重生會」，
可以利用某種邪門嘅「儀式」，令人類變成「復活蛋」？
如果係咁嘅話，
點解佢哋又要咁做，
兔子人又同佢哋有冇關係？
種種思路，喺我腦中縱橫交錯。
呢個時候，手機又再響起。
今次唔係父母，而係嗰位叫宋文德嘅網友終於喺Telegram覆我。
宋文德：「你好？」
我：「你好！你係咪知道兔子人嘅嘢！？我女朋友全家變蛋，俾兔子人帶走咗......」
宋文德：「冷靜，時間、地點？有被「兔子人」直視過嗎。」
我：「上星期三凌晨時份，喺我女朋友寶琳嘅屋企，我有俾佢兔人直視過。」
宋文德：「哪兔子人直視你的時候，雙目呈現鮮紅色嗎。」
我：「有...」
宋文德：「立即跟你家人、朋友保持距離！千萬不要跟他們接觸，找個山頭待一晚，我明早去找你。」
先唔理宋文德係咩人，但佢咁樣講一講，我當下就諗起老豆老母。
我二話不說，打電話返去屋企。
「......」
等咗好耐，先換嚟一句：「唔好意思，你所打嘅電話暫時未能接通......」
之後，我又個別打過去老豆同老母個手機號碼，但兩個都無人接通。佢兩個都到退休之年，平時都唔會咁早訓......
我行嚟行去，打咗三十幾次電話俾佢哋，換來嘅都係冰冷嘅一句未能接通。
就係我心急如焚，唔知第幾次嘗試之後，終於接通......
「喂！！阿爸！有冇事啊！？鎖好門啊，仲有窗呀！喂......！？」一接通，我將所有嘢吐哂出嚟。
「喂...」我真係心急到想喊咁濟：「聽唔聽到呀！？」
.
. .
. . .
「嘶～」