「阿政，咁你喺到查下先。」泉叔舉起譚國源張入職申請表，說：「我去宜個奇怪嘅看更屋企搵一搵佢本人。」
「喔...好。」
「有咩事，電聯。」說畢，泉叔就先離開圖書館。
「重生會...係咪呢個？」Ben打開個網頁過我睇。
「嗯...同封信嘅logo都一樣。」我搶去滑鼠使用權，自己喺嗰網站到遊走。
「出生、再生、重生」
三隻字，擺正喺網站正上方。
除此之外，網站簡陋得奇怪，一啲可以認識佢哋機構嘅途經都無。又無聯絡電話、又無聯絡地址，感覺空空如也。
而網站背景，係一片草地配上藍藍嘅天空，加上正中央嘅太陽，成個感覺好明麗。
「就係咁？」Ben都奇怪。
之後嗰半日時間，我自己借用電腦搵下其他網址，睇下會唔會有關「重生會」嘅資訊，但就係一啲都搵唔到。
奇怪之處，就喺到。
既然一啲聯絡方法都無，當初Chloe佢哋一家係點樣接觸到「重生會」？知道關於佢哋嘅資訊。
由於係超自然事件，我又喺圖書館搵書搵報紙，睇下有冇舊聞。果然如泉叔所講，每隔四年嘅春季，大約復活節前後，香港嘅失蹤人數就會不尋常咁增加。
但係多年以嚟，都無受到正視。
我整咗小筆記，寫低最近得出嘅線索。
暫時最可疑都係「兔子人」同「重生會」，但兩者又好似拉唔上任何關連。
忽然，電話響起，原來係阿媽。
「喂？」
「阿政，你最近好忙啊？做咩唔覆你老豆訊息。」
「有搵過我咩？」
我望一望手機，老豆果然兩日前就喺家族群組搵過我，叫我返去幫手睇睇政府寄嚟嘅文件。
由於老豆老母唔係太識字，所以一有咩政府文件，佢都會影相放上家族群組，然後叫我用語音解話一次。
「不如我一陣上嚟。」我說。
既然我已經暴露喺生死之中，為咗救Chloe隨時有被兔子人殺嘅風險，咁我都向父母交低所有嘢先，至少銀行儲蓄之類。
「咁就最好啦！我哋幾耐無見你。」隔住電話，都感覺到阿媽好開心。
收線後，我用電腦寫咗封信，大概係遺書咁嘅嘢，上面交低所有我銀行戶口嘅密碼之類，諗住一陣返到屋企放喺間房嘅枕頭低下。
如果到最後，我可以無事就最好，燒咗封遺書佢。
但有事嘅話......
就等唯有阿媽執床嗰陣，佢會發現到。
我屋企人住樂富，搭地鐵一陣就到。
上到去我知佢哋一定會問：「Chloe呢？」
所以撳門鐘之前，我已經做好表情管理。
「叮噹～」
「咁早嘅？呢家晏就咋喎，唔洗返工咩？」阿媽以為我夜晚先到。
「今日早放。」我苦笑，行入門口。
「Chloe呢？」
「去咗旅行...」
「你去幫你老豆睇睇啲文件先。」阿媽急步返入廚房。
行入廳，我見到老豆拎老花眼鏡睇緊報紙。
「喂，明明字都唔識多隻，睇咩報紙。」我對老豆嘅開場白。
「哈哈，睇圖都得啫。」老豆塞咗一疊政府信俾我：「幫我睇睇去，係咪有咩稅之類未交......」
「嗯。」我拎咗疊信入自己間房，順便將遺書放入枕頭下面。
一路睇嗰陣，我居然無啦啦諗......
以後，仲有邊個幫我老豆老母睇信？
心情越嚟越失落，我大可以拋低一切，唔理Chloe死活......
繼續過自己人生，就將一切都忘記，就當一切都重生開始。
「老豆，俾返啲信你，都係啲廢話無咩特別。」睇哂之後，我將信掉到佢面前。
但我知道，我唔能夠咁做。
「麻哂你啊。」
因為...
「唔麻煩...」
我係佢男朋友。
「你啱啱喊完嚟啊？」