去到銅鑼灣中央圖書館後，我哋入去問職員借咗部電腦。
「細路，識唔識播入面啲嘢出嚟睇睇。」泉叔拎住隻硬碟，直接問電腦部嘅職員。
「唔識。」嗰職員睇落廿歲都未夠，似係part time。
正當我見到泉叔又想伸手入褲袋，疑似想拎出一把名為叫「摺疊刀」嘅物體時，我即刻撳住佢隻手，然後喺自己銀包拎張五百大紙出嚟：「呢家識唔識啊？」
佢呆咗呆，然後即刻企喺身：「識、識、識。」
「Ben哥啊？」泉叔望一望佢塊職員牌，拍下佢膊頭：「麻煩哂。」
職員Ben拎咗硬碟後，將佢裝入一部空置嘅電腦到，然後點擊嗰日嘅閉路電視影片過我哋睇。
影片中可以發現兔子人入大廈一刻之餘，更可以發現當日保安完全冇收到投訴電話，就直接上Chloe屋企處理佢講嘅所謂「滲水問題」。
「嗰保安果然有啲嘢......」我握實拳頭，痛恨自己嗰陣無質問對方。
「嗰保安叫譚國源，都係近半年先入職。」泉叔拎起員工入職申請表睇：「而且我頭先問過保安室主管，佢話條友幾日前就辭咗職。」
「......」
「唔緊要，上面寫咗佢居住地址。」
「呢隻係...係咪......兔仔人...？」Ben對影片中嘅兔人，發出疑問。
「你識！？」我捉實佢膊頭。
「唔...唔係...」Ben好似嚇親，答：「只係最近上網...討論區...都見到有人話，半夜三更見到呢個著住兔仔服裝嘅人行嚟行去......覺得好恐怖......」
「咩討論區，開嚟睇睇！？」
阿Ben喺電腦打開該嗰個討論區網頁，然後撳入一個叫「神秘台」嘅地方，入面充斥住形形色色嘅神秘話題，其中一個標題就係──「屌！夜媽媽見到有條友著住戲服周圍走......」
一撳入去可以發現Post主喺遠距離偷偷影咗幾張相，而被影嘅對象我宜一生都唔會忘記......的確係兔子人。
形象同我當日見嗰隻差唔多......
髒亂嘅白毛漸漸泛黃，身上殘留住唔知係血液定排泄物嘅污跡，臉貌係似兔非兔嘅外表，兩邊眼窩之下滲出一行行血液，一副七竅流血嘅樣子，就連黃黃嘅牙齦上都係染血嘅污跡......
可能「神秘台」太多有趣嘅事，所以「兔子人」呢個Post無得到好大關注，留言嘅人都係求其放過驚嚇表情就算，除咗某個網民。
佢嘅回覆特別激動，特別上心。
宋文德：「拍攝者有看見兔子人否！？如對方有用紅色的目光凝視你，請立即聯絡我！任何人看到這則呼籲都請小心，無論真偽，看到兔子人都立即離開。」
「呢個人...」我抱手：「好似知啲嘢？」
「係，至少佢知道唔可以俾兔人用紅色嘅眼睛望住。」泉叔說。
「泉叔，你知唔知原因？」
「其實我都唔清楚，係上一輩我阿爺老豆叮囑我，但佢哋都無同我講到原因，叼能嗰陣我太細。」泉叔聳一聳肩。
「佢下面留低咗自己聯絡方法。」我事不宜遲，拎出手機加佢Telegram。
「原來電腦咁好用，可以交流咁多嘢。」泉叔好似摸小狗咁，摸摸電腦螢幕。
「呃......你哋用完未......」一旁年輕嘅電腦兼職員Ben，問。
「Ben哥，幫我上網search埋「重生會」，睇下香港有冇一個咁嘅機構。」我拍拍佢膊頭。
「知道...」