「我阿爺以前成日咁同我講，我宜一生注定要同兔子人周旋。」
「但泉叔...你一個人唔驚？」
「我後生嗰陣緊係驚，面對一個你唔知點解要對付佢嘅生物......」泉叔又飲一啖酒，好似有啲壓力：「但慣咗就無嘢。」
「慣...」我應該，一世都慣唔到。
「以前...我都妄想過，可以過正常人嘅生活，但換嚟嘅，當然只有悲劇。」講完，泉叔就將酒一下飲到盡。
見泉叔有些少失落，我都唔再追問落去佢口中嘅「悲劇」。
「食飽未？食飽就落去問下，入你女朋友間屋嘅保安係邊個。」泉叔直接將成隻碗連湯掉入垃圾桶。
「係...食飽。」其實我都無乜心情食，打算洗埋碗就走人。
「你係咪痴線，人都唔喺到仲幫人洗碗。」泉叔行過嚟，將我隻碗都埋掉落垃圾桶。
落到樓下，我拎住手機影到個保安嘅樣俾樓下看更睇：「阿伯，你識唔識呢個同事？」
「呢個......」看更阿伯諗咗一諗，答：「好似新嚟嫁喎。」
「佢今日有冇返工？同埋有冇一個星期前嘅閉路電視睇？」我追問。
「呢啲你去管理處問下好啲。」阿伯一副事不關己嘅樣子。
「行啦，諗下都知得管理處有呢啲資料。」泉叔率先動身，行出大廈：「阿政，一陣你唔好入管理處，我入去問先。」
「點解？」
「係人都知佢哋唔會隨便交出員工個人資料，你宜啲身家清白嘅，唔啱做犯法嘢。」講完之後，泉叔喺條褲拎出一把摺疊刀。
原來泉叔嘅方法係，如果對方唔肯交，就拎把刀嚟威脅人......
「咁做...真係......」我對泉叔嘅方法有所保留。
「宜家到底係我要救你女朋友全家，定係你要救女朋友全家？」泉叔咁樣反問法，我真係駁唔到。
「......」
佢指一指自己手上嘅腕錶：「春天，好快過。到時就再無任何機會。」
「泉叔......你身家好唔清白咩......」
「如果唔係，你覺得我點解要住喺郊區？留喺到等我。」泉叔單手推門，入去管理處。
雖然我企喺門口，但我都隱約聽到入面一啲鬧事嘅聲音。
而我亦都高估咗，香港人對於私隱同保密嘅重要性。
泉叔行出嚟嗰陣，已經拎住一張嗰位保安嘅「入職資料表」同「一卷錄影帶」。佢車上同我講返，個主管一見到自己拎刀上手，即刻嚇到咩都願意交出嚟。
或者過於安日嘅人就係咁，當一件事未發生之前，你會自我認為地誓死保護佢。
但當危險真係上頭時，你會不惜一切嚟換取安全。
就好似我...
當日無救Chloe，無勇於對付兔子人咁。
泉叔教會我，一切嘅內心剖白都係多餘，
行動最實際。
「哈哈哈哈，我諗佢哋應該報緊警，不過香港啲警察廢嘅，我又冇殺人又冇搶好大舊錢，警察唔會放太多心機去跟我，只要我喺馬路轉多幾個彎，入多幾個街口，佢哋已經唔想再處理單案。」泉叔一邊咬住煙，一邊輕笑。
作為某程度上嘅同犯，我心情居然仲緊張過泉叔。
「泉叔...宜家我哋去邊？」
「去中央圖書館，嗰到應該有機，可以播到呢啲錄影帶。」其實泉叔口中所謂嘅錄影帶，就係一個硬碟。
可能泉叔經常留意到我左望右望，所以佢特登提我：「唔洗驚喎阿政，兔子人傍晚先會開始出現，朝早你唔會見到佢哋。」
「你完全讀到我心思咁。」我說。
沿路上，泉叔開大咗車入面嘅歌，可能想消除我嘅緊張。依然係美國八、九十年代當時嘅流行歌，更不時自己哼上幾句，似乎佢係個嚮往西方懷舊嘅人。