「咁到底佢哋係一種咩生物？」我虛心咁坐喺一邊。
「每隔四年嘅第一個春季，接近復活節前後嘅日子佢哋就會出現，平日行動都喺夜晚，以人類靈魂為食。兔子人皮厚肉韌，但行動手法都似人類，我定義為......算係一種半人生物。」泉叔終於擺哂所有嘢上檯。
檯上面有一半嘅位置......
都係擺放住一打打雞蛋。
「泉叔......你買咁多雞蛋做咩？」我好奇一問。
「俾下面隻怪物。」
果然，泉叔喺到養緊隻兔子人......
「養佢嚟做咩？我見危險...佢好有攻擊性...」我說。
「唔養住佢，就好難知道其他兔子人下落。」泉叔即刻扭開一樽威士忌，暢飲一口：「雖則我用過百幾種方法試驗都整唔死隻怪物，正常佢都應該唔會餓死。」
似乎，佢真係一個同兔子人打過好多交道嘅人。
泉叔將威士忌遞向我：「我都未識你，點叫你？」
「我叫阿政...」
「阿政，政哥！」泉叔一手搭住我肩膊：「睇你都係啲城市仔，唔慣喺野區活動，出去曬太陽先。」
就係咁，我俾泉叔半迫半推咁帶咗出去釣魚。
佢間鐵皮屋附近二十分鐘路程，有個幾寬闊嘅湖，好適合俾人喺到放鬆下心情。
宜家嘅藍天白雲，感覺就同嗰日嘅景象完全相反。
「我家人，代代都係獵戶嚟。」釣魚期間，泉叔同我透露。
「間鐵皮屋......都係爺輩嗰代傳落？」我問起。
「唔係，都搬過幾次家，曾經為咗家人都住過城市一陣子。」泉叔又轉移話題落我身上，問：「你呢，你有咩......優點？同缺點，總之關於你嘅嘢，講嚟聽聽，我唔想等自己一個講，口水都乾。」
「優點...缺點...我都諗唔到，我就係一個平凡人。」我低頭，凝望住水面嘅倒影：「一個面對恐懼事物會畏懼嘅懦夫......」
「咁阿懦夫，你呢生最幸福嘅事又係咩？」
「有個...好似西野七瀨咁樣嘅女朋友。」
「咁最失落？」
「失去最愛嘅女朋友。」
「你孤兒仔嚟？」泉叔居然直接咁問人。
「呃...唔係，只係我自己住咗幾年，好少見老豆老母，都無咩感情可言。」
泉叔嘴角淺淺一揚：「真係仆街仔......」
「......」
突然間，魚桿抖動了。
我隻腳雖然廢咗一半，但我雙手無廢到，用盡宜幾日以嚟一直休息嘅力量全力拉上上釣之物！
「好...大力...！」可惜，我依然拉唔到上嚟。
「睇過，捉實！」泉叔走到我後面，幫手拉埋一份。
費盡九牛二虎之力，總算將池中之物釣起。
上吊之後，池面一直泛起股波動，唔少魚喺水面跳嚟跳去。
「好大條...」上釣嘅，係一條我都唔識形容嘅大魚。
色澤深，體形大，兩個字「霸氣」。
「第一次就釣到勁嘢。」我望向泉叔。
「放咗佢。」點不知，泉叔幫佢脫勾，拋返佢落海。
「吓...？」
阿釣魚冠軍，你釣唔到魚都唔洗咁啊......
呢條魚賣去酒樓都應該成皮嘢......
條魚放返入湖泊後，波動嘅水面回歸平靜。
「我哋之獵戶之間，一直有個不成文規定。」泉叔講起。
「嗯？」
「過於年長嘅動物，我哋都唔會食，會選擇將佢放生。」
「因為肉質唔好？」
「因為......」泉叔點枝煙，呼出一口氣：「我哋怕得罪神明。」
泉叔果然係個有少少迷信嘅人，從佢二樓嘅壇就得知。
「有啲年齡睇落好高又特別嘅動物，話唔定就係神明嘅化身。」講完，泉叔就收拾好釣魚工具：「後日準備再去你女朋友屋企，睇下搵到咩線索。」
「係...」
不經不覺，一星期已經過去。