最終，我細心觀查下，搵到泉叔屋企某個長櫃下聲音係傳得最亮，於是推開咗長櫃竟然發現一塊地板門，不過要用鎖匙開。
可能泉叔太方便，條鎖匙正正放喺長櫃嘅檯頭。
「咔」我解鎖，拉開地板門。
係一條通向地下室嘅樓梯。
我摸住牆慢慢行落去，因為周邊實在太黑。
最後，
我見到地下室盡頭係兩顆亮住鮮紅色嘅光點。
我好似飛蛾咁執意行過去，完全無思考過眼前嘅到底係咩嚟......
直至我同嗰兩顆紅光距離不到一米，我先見到嗰兩顆鮮紅嘅光點不停咁輕微激顫......
嗰一刻，我先意識到嗰啲係目光！
「嘶～」
我打開手機照明向前面嘅物體照明，果見係一隻污穢不堪嘅兔子人！
「呯！」
佢打算衝向前捉住我雙手，好彩嘅係佢俾一個鐵籠困住而限制咗行動，只可以喺籠裡發狂，以血紅嘅目光盯住我，口中不斷喃喃自語。
驚慌失措嘅我嚇到跌低，手機都跌埋落地，兩隻腳發軟，只可以好似電影入面嘅弱者咁，不斷兩隻手撐住退後。
籠入面嘅兔子人，顯然已經受過無數次嘅折磨，身上分唔出係皮髮定戲服嘅身體已經傷痕累累，而且面目並唔似戴住面具，更似係樣子生得缺憾嘅怪胎......
崩咗一角嘅兔唇、過長嘅耳朵、類似兔類嘅臉孔輪廓，用怪物嚟形容都不足為過。
但點解...
泉叔屋企會有呢啲嘢？
突然間，眼前嘅兔子人用頭不斷撞向鐵籠，每一下都極有力，無法再承受呢啲畫面嘅我，立即逃出地下室，推返好個長櫃喺原本位置。
聽住地下裡嘅兔子人撞頭聲仍然頻頻傳出，為咗分散注意力我只好周圍行嚟行去，搵啲嘢做，搵啲睇咁。
無諗過嘅係，我喺某張工作用嘅書檯上，見到幾樽藥同精神病嘅覆診紙。上面寫住泉叔全名，原來佢叫做周泉，已經踏入五十一歲。
無聊嘅我又上到二樓，發現係一間被空置嘅房間。
上面有細路仔玩具同拜祭神明嘅小壇，但一早鋪哂塵。
最引人入勝嘅，就係角落放住一個小型夾萬。
神壇有塊發霉嘅木牌，上面隱約寫住「因幡之白兔」五字。
壇中間，就放住塊外形奇怪嘅木頭，有啲殘舊。
呢個時候，泉叔貨van嘅引擎聲慢慢靠近，佢返嚟了。
佢一入屋就察覺到唔妥：「參觀得好開心咁。」
「都係無聊先周圍睇下......」我答。
「無所謂，唔好入地下室就得。」一講呢到，泉叔望一望原本放鎖匙嘅位：「...你入過去？」
我吞一吞口水，有啲緊張：「係......」
我決定如實相告，呢個時候咩都隱瞞感覺係作死。
泉叔頓一頓，續問：「無見到奇怪嘢嘛？」
「一隻疑似兔子人喺個籠入面......？」
「即係你又同佢哋對視咗？我入去之前，永遠會整到佢暫時失明先。」泉叔搖一搖頭。
「點解唔可以對視......」我問。
「因為我懷疑，人類變成復活蛋嘅其中一個原因，就係同呢種生物對視。」泉叔將啱啱買返嚟嘅日常用品，一一擺上茶几：「咁當然，我對佢哋嘅特性有了解。我老豆去到阿爺嗰陣，就已經開始狩獵呢種生物，邪惡嘅「兔子人」。」