佢戴住鴨舌帽、牛仔背心，拎住枝唔知係真槍定氣槍嘅物體過嚟，第一時間就係用小刀幫我解除陷阱。
「上面...上，上面...！有隻兔...有隻兔想殺我呀！！」被畏懼壓抑成晚嘅我，極之激動。
「我知我知。」佢好熟手咁將陷阱拆開，然後背起我入一嫁貨van入面：「俾你累死...」
「嗄...啊...嗄...啊啊...報...報警啊......」我撳住劇痛嘅腳。
「你遇到嗰隻嘢，報警無用。」說畢，大叔踩油門急速駛離呢橦大廈。
「......」滲血嘅腳傷，令我痛到講唔到嘢。
「識得自己包紮啊？止止血先啦。」阿叔掟咗卷繃帶俾我。
我咬牙忍痛，手法粗糙咁將隻腳被夾傷嘅位置大概包一包。
車內沉默，只有窗外開始落下嘅雨聲。
大叔一路將我車到去某個偏離城市嘅郊區先停車：「你死得未啊？」佢向後望一望。
「未...」但我成身都好冰冷。
佢將我背起，背入一間郊區小屋入面，成間屋就好似係用鐵皮堆砌出嚟咁，雨水滴落鐵皮製嘅屋頂時會異常大聲。
「叫我...泉哥。」佢放我到床上。
「泉叔......唔該你。」我說。
佢放低枝唔知真定假嘅槍，然後去將鐵皮屋嘅門閂好。
「所以，你見到......」泉叔慢慢行過嚟，問：「嗰隻兔子人？」
「見到......」
回想嗰隻兔人嘅外貌，我仍然心有餘悸。
泉叔全間鐵皮屋，得床邊嘅吊燈係亮住火光，但唔知點解，就係覺得比起Chloe間屋安全好多。
泉叔望住我，好似思考啲乜。
「做咩...嗰隻兔人係咩嚟......」我追問。
「同你講都得。」良久，泉叔先繼續發言，「但首先，我會俾兩個選擇你。」
「選擇...？」
泉叔點枝煙，緩緩咁道出選擇：「一，你忘記今晚所有事情，就當宜一切無發生過；二，拋棄宜家一切嘅生活，我同你講關於兔子人嘅事。」
「......」
「揀唔落手？」佢笑一笑。
「俾啲...時間我。」
我居然要...諗。
我女朋友生死未卜，唔知去咗邊，我都居然要諗......
但無辦法，一旦諗起嗰隻兔人轉頭，用鮮紅嘅目光睜眼望住我嗰個畫面，我全身就不其然咁顫抖。
「包到一舊舊咁。」泉叔不屑咁盯住我腳傷繃帶位置一眼：「我去煮啲嘢食先，你慢慢諗。」
「轟隆──」屋外響起雷聲，密集嘅雨聲都掩蓋唔住。
係個風雨交加嘅晚上。
我打開手機望住螢幕上同Chloe嘅合照，其實我心入面已經做好決定。同埋我直覺認為，女朋友成家失蹤呢件事，同啱啱嗰隻兔人點都有牽連。
喺床上休息嗰陣，我無聊咁東張西望，見到啲牆貼住唔同嘅報紙，上面報導嘅都係離奇失蹤嘅案件，睇嚟泉叔係個會留意宜啲事嘅人。
泉叔間屋一共有兩層，頂部同外圍以鐵皮砌成為主，內部就用木材去搭建。
「出唔出嚟食啲嘢，不過你應該都無心情食。」泉叔入嚟問。
我的確無胃口，但都跟咗泉叔出去廳食嘢。
好整唔整，佢居然整炒蛋。
令我莫名想嘔。