負責協助我爲「狄克戀曲」編劇的WAN仔問我，爲乜要經營漫畫行業呢？很好的問題。
小寶、牛佬、肥良等分別曾在專欄中不斷強調漫畫是自己的第二生命，又乜又物，簡直永世要擁抱着它云云。我嘛，不錯，經營漫畫是我童年夢想，然而，我卻未講過這是我惟一夢想。說眞的，我又唔係只懂得爲漫畫創作故事，我又唔係自小入行冇路走，我畢竟跟絕大部份同行的忠實支持者不同，大家的最終目標一定是漫畫。我嘛，天空海闊，甚麼也可以！
當初加入漫畫行業，主要是覺得這個行業大有可爲，更加上興趣，便毅然投身。做吓做吓，陰公，D所謂前輩、老細們，乜咁蠢嘅？又冇市場策略、又冇拓展計劃，又冇人材儲備、又冇商業智識。我初試牛刀，斬乜都掂，更覺他人蠢鈍，終導致忍唔住自己示範成功法門，導人向「掂」！
我份人最憎D人唔講道理反對我的創建意念，從前當編劇人微言輕，講乜都俾上司窒，「慶」上心頭，既然別人不認同自己，一於自己創立公司，以事實來引証我的一切才是眞理。基本上，我做任何挑戰性大事的動機，全是基於要証明自己才是對。咪以爲我係隨口噏，我做齊資料搜集、經過詳細分析，唔好以爲你係我上司或老細就扮晒瓣瓣叻過我，我會做出成績來証明對的是我、蠢的是你！
漫畫是低下層CHEAP的產品？不！所以我加進了意識，連專業人仕、扶輪社等朋友也認同！漫畫業老細必須懂得繪畫？不！自由人作了先鋒証明！香港人只能接受薄裝漫畫？不！自由人專賣店的精裝書多的是…。太多的創見，我一直不覺得自己叻，只係覺得別人蠢而已。又點解D人咁蠢呢？就係因爲佢哋以爲自己好叻，得閒唔睇多D進修學問嘅書，唔分析吓麥當勞點解咁成功，唔虛心D，稍有成就，一味識得揸靚車，吃喝玩樂，自以爲是，對一切自己的見解「不求甚解」，知其然而不知其所以然。大佬，咁樣一定死火啦！
劉定堅就算買賣廠房，資料掌握與及市場分析都一定比一般資深地產經紀更勝一籌。我會考查一切，先了解疑問，明白晒才行事。唉，日對夜對自己D多單位，D經紀就全港九四圍撲，咁都輸蝕過人，撞頭埋牆自殺好過囉！
我喜歡經營漫畫，更高興是可以爲它付出，融合它達成我的理想。然而每個人在某一方面總會有個頂點，我遠眺神州，燃起挑戰火燄。溫瑞安與我的意見一樣，劉定堅最大力量並不是在創作，而是在統籌、推廣。我做生意肯定叻過做創作，所以我所賺的錢因創作而來只佔很小部份。我罵了又罵，責備文敵點解仲唔完全取代自己，眞的，人又怎可能永遠停步不前哩！
不要貪戀自己已擁有的成就，不肯突破狹窄框框，只是反映着內心自卑、缺之自信而已！起來吧，天大地大，冇話死得人嘅，朋友也好、敵人也好，請挺起胸膛努力向前，香港需要創造新機的挑戰者。突破框框吧，來吧！殺吧！