總監，是祁文傑在「玉郎」出版書系不時冠上的名稱，初爲監製，後榮升一大級，晉身總監。顧名思義，總監即是整體行政、創作、製作等的監製，對一本漫畫刊物完全負責，有功嘛，當然要攞，有鑊嘛，大大隻都要孭起。
祁文傑總監，你的大黑鑊來了！
星期四晚，晚飯後在報攤順手買了本已不是文敵創作的「賭神」第十七期，有關書中的一切，我未有興趣評論，但一翻到第二十六頁，嘩！震驚來了，甚麼東西令我驚愕不已呢？此頁右上方第一格的所謂「香港啟德機場」實景，竟然熟口熟面，唔係吖嘛，照印我哋「自由人」嘅書？
回公司小心查閱，找到了！志文的「天若有情」第十期「不在半空的空姐」，第十二頁同是右上方第一格，那格是志文組助理們一筆一線好艱辛晝出來的機場景，竟然被「賭神」一聲唔該都冇，影印後當色版就咁貼上稿上便出街，嘩！老友，你似乎唔多認識香港嘅法律喎。細嘅唔識，做大嘅都好應該睇到，立即修改，既然掛得個「總監」咁醒神、咁大嘅名銜。本書嘅封面，自然有責任承擔責任。呢個黑鑊，你孭梗囉！
分析事件，身爲總監，竟然旗下書刊發生如許勁抽「醜聞」，簡直係「玉郎機構」嘅大恥辱，理應引咎辭職。要是祁文傑身爲總監，職責上應該親眼過目所有晝稿，睇過都發現唔到，證明能力低、水準差，有乜資格學人做總監呢？又要是做總監都冇睇稿，咱總監又監D乜呢？爲乜又要掛上名銜？配嗎？
影印別人公司作品，用在自己公司稿件上，絕對是不道德的盜竊行爲，「自由人」絕對不會輕易算數，我們將會採取法律行動，對盜竊我們公司晝稿版權的窮追猛打！絕不是寫個專欄就算數，我們一定要討回公道！
不知所謂的影印盜竊行爲實在太過份！本來，要是助理質素未及要求，參考別的書本，甚至影印加工，勉強也可以原諒！但連大細也一樣，就咁剪掉有字的部份貼上稿，實在太過份了。監製毛名威今個月有收人工嗎？總監咁啱又放假忙於揾禮品贈送予讀者嗎？拿出你們的專業才能來！不要馬馬虎虎工作了事，就算玉郎機構冇人責罰，自己不覺得羞恥嗎？攞幾百萬年薪，竟有如此不知所謂醜聞！
再不是「玉郎」隻手遮天的昔日矣！影印照貼行爲實在卑劣低能，下次唔識畫，不妨來電本公司，向黃興豬經理聯絡，只要付出合理的唔夠一百元稿費，幫你趕格稿又點話，費事俾人恥笑一世啦，一百蚊唔懼得嘅，明白未？唉！點做人大佬架！